ਨਵੀਂ ਦਿੱਲੀ: ਦਿੱਲੀ ਸਰਾਫਾ ਬਾਜ਼ਾਰ 'ਚ ਮੰਗ ਸੁਸਤ ਰਹਿਣ ਕਾਰਨ ਅੱਜ ਸੋਨਾ ਲਗਾਤਾਰ ਚੌਥੇ ਦਿਨ ਗਿਰਾਵਟ 'ਚ ਰਿਹਾ। ਪਿਛਲੇ ਦਿਨ ਦੇ ਮੁੱਲ 29,750 ਰੁਪਏ ਦੇ ਮੁਕਾਬਲੇ ਸੋਨਾ 29,650 ਰੁਪਏ ਪ੍ਰਤੀ ਦਸ ਗ੍ਰਾਮ 'ਤੇ ਆ ਗਿਆ। ਸੋਨੇ ਦੇ ਖਰੀਦਦਾਰਾਂ ਲਈ ਇਹ ਚੰਗਾ ਮੌਕਾ ਹੋ ਸਕਦਾ ਹੈ ਕਿਉਂਕਿ ਪਹਿਲਾਂ ਕੀਮਤਾਂ 31 ਹਜ਼ਾਰ ਦੇ ਨੇੜੇ ਸੀ। ਹਾਲ ਹੀ ਦੇ ਹਫਤੇ 'ਚ ਲਗਾਤਾਰ ਗਿਰਾਵਟ ਕਾਰਨ ਸੋਨਾ ਇਸ ਹੇਠਲੇ ਪੱਧਰ 'ਤੇ ਉਤਰਿਆ ਹੈ।
ਇਸ ਦੇ ਇਲਾਵਾ ਉਦਯੋਗਿਕ ਮੰਗ 'ਚ ਸੁਧਾਰ ਨਾਲ ਚਾਂਦੀ 'ਚ ਅੱਜ ਗਿਰਾਵਟ ਰੁਕ ਗਈ। ਦੋ ਦਿਨਾਂ ਦੀ ਗਿਰਾਵਟ ਤੋਂ ਉਭਰਦੀ ਹੋਈ ਚਾਂਦੀ 200 ਰੁਪਏ ਵਧ ਕੇ 37,900 ਰੁਪਏ ਪ੍ਰਤੀ ਕਿਲੋਗ੍ਰਾਮ 'ਤੇ ਪਹੁੰਚ ਗਈ। ਪਿਛਲੇ ਦੋ ਦਿਨਾਂ 'ਚ ਇਹ ਕੀਮਤੀ ਧਾਤੂ 975 ਰੁਪਏ ਡਿੱਗੀ ਸੀ।
ਹਾਲਾਂਕਿ ਚਾਂਦੀ ਸਥਿਰ ਰਹੀ। ਅਗਲੇ ਹਫਤੇ 12 ਅਤੇ 13 ਦਸੰਬਰ ਨੂੰ ਅਮਰੀਕੀ ਫੈਡਰਲ ਰਿਜ਼ਰਵ ਦੀ ਬੈਠਕ ਹੋਣੀ ਹੈ। ਉਸ 'ਚ ਵਿਆਜ ਦਰਾਂ 'ਚ ਵਾਧੇ ਦੀ ਸੰਭਾਵਨਾ ਹੈ। ਇਸ ਲਈ ਅਜੇ ਨਿਵੇਸ਼ਕ ਸਾਵਧਾਨੀ ਵਰਤ ਰਹੇ ਹਨ, ਜਿਸ ਕਾਰਨ ਸੋਨੇ 'ਤੇ ਦਬਾਅ ਹੈ।