ਮੁੱਖ ਮੰਤਰੀ ਚੰਨੀ ਨੇ ਕੈਪਟਨ ਦੇ ਖ਼ਾਸਮ-ਖ਼ਾਸ ਰਾਣਾ ਸੋਢੀ ਦੇ ਘਰ ਜਾ ਕੇ ਖਾਧਾ ਖਾਣਾ
ਹੁਣ ਪੰਜਾਬ ਕਾਂਗਰਸ ਅੰਦਰ ਵੀ ਇਕ ਵਾਰ ਫਿਰ ਸਿਆਸੀ ਸਮੀਕਰਨ ਬਦਲਣ ਲੱਗੇ ਹਨ।
ਚੰਡੀਗੜ੍ਹ, 31 ਅਕਤੂਬਰ (ਭੁੱਲਰ): ਹੁਣ ਪੰਜਾਬ ਕਾਂਗਰਸ ਅੰਦਰ ਵੀ ਇਕ ਵਾਰ ਫਿਰ ਸਿਆਸੀ ਸਮੀਕਰਨ ਬਦਲਣ ਲੱਗੇ ਹਨ। ਨਵਜੋਤ ਸਿੱਧੂ ਨਾਲ ਮੁੜ ਤਾਲਮੇਲ ਬਣਨ ਤੋਂ ਬਾਅਦ ਹੁਣ ਮੁੱਖ ਮੰਤਰੀ ਚੰਨੀ ਨੇ ਕੈਪਟਨ ਸਮਰਥਕ ਰਹੇ ਵਿਧਾਇਕਾਂ ਤੇ ਸਾਬਕਾ ਮੰਤਰੀਆਂ ਨੂੰ ਅਪਣੇ ਪਾਲੇ ਵਿਚ ਲਿਆਉਣ ਲਈ ਸਿਆਸੀ ਦਾਅ ਖੇਡਣੇ ਸ਼ੁਰੂ ਕਰ ਦਿਤੇ ਹਨ।
ਕਹਾਣੀ ਅੱਜ ਪੰਜਾਬ ਦੇ ਅਧਿਕਾਰੀਆਂ ਨਾਲ ਮੀਟਿੰਗ ਖ਼ਤਮ ਹੋਣ ਤੋਂ ਬਾਅਦ ਸਿੱਧੇ ਕੈਪਟਨ ਦੇ ਖ਼ਾਸਮ-ਖ਼ਾਸ ਰਹੇ ਸਾਬਕਾ ਮੰਤਰੀ ਰਾਣਾ ਗੁਰਮੀਤ ਸੋਢੀ ਦੇ ਘਰ ਗਏ ਅਤੇ ਉਨ੍ਹਾਂ ਨਾਲ ਹੀ ਰਾਤ ਦਾ ਖਾਣਾ ਖਾਧਾ।
ਜ਼ਿਕਰਯੋਗ ਹੈ ਕਿ ਸੋਢੀ ਕੈਪਟਨ ਮੰਤਰੀ ਮੰਡਲ ਵਿਚ ਸ਼ਾਮਲ ਸਨ ਪਰ ਚੰਨੀ ਸਰਕਾਰ ਬਣਨ ਬਾਅਦ ਉਨ੍ਹਾਂ ਦੀ ਛਾਂਟੀ ਹੋ ਗਈ ਸੀ। ਅੱਜ ਚੰਨੀ ਵਲੋਂ ਰਾਣਾ ਦੇ ਘਰ ਜਾ ਕੇ ਖਾਣਾ ਖਾਣ ਨਾਲ ਮਾਮਲਾ ਹੁਣ ਸਮਝ ਵਿਚ ਆ ਸਕਦਾ ਹੈ। ਰਾਣਾ ਸੋਢੀ ਨਾਲ ਮਿਲ ਕੇ ਵਾਪਸ ਪਰਤਣ ਸਮੇਂ ਮੁੱਖ ਮੰਤਰੀ ਨੇ ਕਿਹਾ ਕਿ ਰਾਣਾ ਗੁਰਮੀਤ ਸੋਢੀ ਪਾਰਟੀ ਦੇ ਸੀਨੀਅਰ ਨੇਤਾ ਹਨ ਤੇ ਪਾਰਟੀ ਵਿਚ ਸੱਭ ਲੀਡਰ ਸਨਮਾਨਯੋਗ ਹਨ। ਕਿਸੇ ਦੇ ਘਰ ਜਾਣਾ ਕੋਈ ਮਾੜੀ ਗੱਲ ਨਹੀਂ ਹੈ।