'ਕੀ ਤੁਸੀਂ ਕਦੇ ਆਰ.ਐਸ.ਐਸ. 'ਚ ਔਰਤਾਂ ਨੂੰ ਨਿੱਕਰ ਪਾਈ ਵੇਖਿਆ ਹੈ?'

ਗੁਜਰਾਤ 'ਚ ਚੋਣ ਪ੍ਰਚਾਰ ਦੌਰਾਨ ਰਾਹੁਲ ਦੇ ਬਿਆਨ 'ਤੇ ਭੜਕਿਆ ਵਿਵਾਦ

ਵੜੋਦਰਾ, 10 ਅਕਤੂਬਰ: ਕਾਂਗਰਸ ਮੀਤ ਪ੍ਰਧਾਨ ਰਾਹੁਲ ਗਾਂਧੀ ਨੇ ਅੱਜ ਰਾਸ਼ਟਰੀ ਸਵੈਮਸੇਵਕ ਸੰਘ (ਆਰ.ਐਸ.ਐਸ.) ਅਤੇ ਭਾਰਤੀ ਜਨਤਾ ਪਾਰਟੀ (ਭਾਜਪਾ) 'ਤੇ ਦੋਸ਼ ਲਾਇਆ ਕਿ ਉਹ ਔਰਤਾਂ ਨੂੰ ਮਾਣ ਨਹੀਂ ਦਿੰਦੇ ਅਤੇ ਸਵਾਲ ਕੀਤਾ ਕਿ ਲੋਕਾਂ ਨੂੰ ਸੰਘ ਦੀਆਂ ਬ੍ਰਾਂਚਾਂ 'ਚ ਕਿੰਨੀਆਂ ਕੁ ਔਰਤਾਂ ਨਜ਼ਰ ਆਈਆਂ? ਉਨ੍ਹਾਂ ਕਿਹਾ ਕਿ ਇਸ ਦੇ ਉਲਟ ਕਾਂਗਰਸ 'ਚ ਹਰ ਪੱਧਰ 'ਤੇ ਔਰਤਾਂ ਕੰਮ ਕਰਦੀਆਂ ਹਨ।ਉਨ੍ਹਾਂ ਵਿਅੰਗਮਈ ਅੰਦਾਜ਼ 'ਚ ਕਿਹਾ, ''ਉਨ੍ਹਾ ਦਾ ਸੰਗਠਨ ਆਰ.ਐਸ.ਐਸ. ਹੈ। ਆਰ.ਐਸ.ਐਸ. 'ਚ ਕਿੰਨੀਆਂ ਐਰਤਾਂ ਹਨ। ਕੀ ਤੁਸੀਂ ਕਦੀ ਕਿਸੇ ਔਰਤ ਨੂੰ ਬ੍ਰਾਂਚ 'ਚ ਨਿੱਕਰ ਪਾਈ ਵੇਖਿਆ ਹੈ? ਮੈਂ ਤਾਂ ਨਹੀਂ ਵੇਖਿਆ।'' ਖਾਕੀ ਨਿੱਕਰ ਆਰ.ਐਸ.ਐਸ. ਕਾਰਕੁਨਾਂ ਦੀ ਪਛਾਣ ਹੈ ਜੋ ਉਹ ਪਹਿਲਾਂ ਬ੍ਰਾਂਚਾਂ ਅੰਦਰ ਪਹਿਨਦੇ ਹੁੰਦੇ ਸਨ। ਹਾਲਾਂਕਿ ਇਕ ਸਾਲ ਪਹਿਲਾਂ ਉਨ੍ਹਾਂ ਨਿੱਕਰ ਦੀ ਥਾਂ ਪੈਂਟ ਪਾਉਣੀ ਸ਼ੁਰੂ ਕਰ ਦਿਤੀ। ਜ਼ਿਕਰਯੋਗ ਹੈ ਕਿ ਆਰ.ਐਸ.ਐਸ. 'ਚ ਔਰਤਾਂ ਨੂੰ ਮੈਂਬਰੀ ਨਹੀਂ ਦਿਤੀ ਜਾਂਦੀ ਬਲਕਿ ਔਰਤਾਂ ਲਈ ਵਖਰੀ ਜਥੇਬੰਦੀ ਬਣਾਈ ਗਈ ਹੈ।