ਚੋਣ ਨਤੀਜਿਆਂ ਤੋਂ ਬਾਅਦ ਵਧ ਸਕਦੈ ਬਸਾਂ ਦਾ ਕਿਰਾਇਆ

ਪੰਜਾਬ ਰੋਡਵੇਜ਼ ਸਾਲ ਤੋਂ ਕਰ ਰਿਹੈ ਮੰਗ

ਜਲੰਧਰ, 28 ਫ਼ਰਵਰੀ (ਸਮਰਦੀਪ ਸਿੰਘ) : ਨਵੀਂ ਸਰਕਾਰ ਸੂਬੇ 'ਚ ਚੋਣ ਨਤੀਜੇ ਤਾਂ ਦੇਵੇਗੀ ਹੀ ਪਰ ਇਸ ਦੇ ਨਾਲ ਹੀ ਆਮ ਲੋਕਾਂ ਨੂੰ  ਵੀ ਵਧਦੀਆਂ ਸਰਕਾਰੀ ਕੀਮਤਾਂ ਦਾ ਸਾਹਮਣਾ ਕਰਨਾ ਪੈ ਸਕਦਾ ਹੈ | ਪੈਟਰੋਲ ਤੇ ਡੀਜ਼ਲ ਦੀਆਂ ਵਧੀਆਂ ਕੀਮਤਾਂ ਤੋਂ ਇਲਾਵਾ ਯਾਤਰੀ ਬੱਸਾਂ ਦੇ ਕਿਰਾਏ ਵੀ ਵਧ ਸਕਦੇ ਹਨ | ਚੋਣਾਂ ਦਾ ਵਰ੍ਹਾ ਹੋਣ ਕਾਰਨ ਜਿੱਥੇ ਪਿਛਲੇ ਕੁਝ ਮਹੀਨਿਆਂ ਤੋਂ ਤੇਲ ਦੀਆਂ ਕੀਮਤਾਂ ਨੂੰ  ਕਾਬੂ ਹੇਠ ਰੱਖਿਆ ਗਿਆ ਸੀ | ਉਥੇ ਹੀ ਸਰਕਾਰੀ ਟਰਾਂਸਪੋਰਟ ਸੇਵਾਵਾਂ 'ਚ ਯਾਤਰੀ ਬਸਾਂ ਦੇ ਕਿਰਾਏ 'ਚ ਵੀ ਵਾਧਾ ਨਹੀਂ ਕੀਤਾ ਗਿਆ | ਹਾਲਾਂਕਿ, ਪੰਜਾਬ ਰੋਡਵੇਜ਼ ਪਿਛਲੇ ਇਕ ਸਾਲ ਤੋਂ ਡੀਜ਼ਲ ਦੀਆਂ ਕੀਮਤਾਂ 'ਚ ਵਾਧੇ ਦੀ ਦਲੀਲ ਦਿੰਦੇ ਹੋਏ ਯਾਤਰੀ ਕਿਰਾਏ 'ਚ ਵਾਧੇ ਦੀ ਮੰਗ ਕਰ ਰਿਹਾ ਹੈ | ਪੰਜਾਬ ਰੋਡਵੇਜ਼ ਜੋ ਸੰਚਾਲਨ ਲਾਗਤ 'ਚ ਲਗਪਗ 22 ਫ਼ੀ ਸਦੀ ਦੇ ਘਾਟੇ ਦਾ ਸਾਹਮਣਾ ਕਰ ਰਹੀ ਹੈ, ਨੇ ਵੀ ਫ਼ਰਵਰੀ 2021 'ਚ ਸਰਕਾਰ ਨੂੰ  ਯਾਤਰੀ ਕਿਰਾਏ 'ਚ ਵਾਧਾ ਕਰਨ ਦਾ ਪ੍ਰਸਤਾਵ ਦਿਤਾ ਸੀ | ਪੰਜਾਬ 'ਚ ਯਾਤਰੀ ਕਿਰਾਏ 'ਚ ਆਖਰੀ ਵਾਰ 1 ਜੁਲਾਈ 2020 ਨੂੰ  6 ਪੈਸੇ ਪ੍ਰਤੀ ਕਿਲੋਮੀਟਰ ਦੀ ਦਰ ਨਾਲ ਵਾਧਾ ਕੀਤਾ ਗਿਆ ਸੀ | ਪੰਜਾਬ ਰੋਡਵੇਜ਼ ਹੈੱਡਕੁਆਰਟਰ ਨੇ ਦਲੀਲ ਦਿਤੀ ਸੀ ਕਿ ਜੁਲਾਈ 2020 ਤੋਂ ਫ਼ਰਵਰੀ 2021 ਤਕ ਡੀਜ਼ਲ ਦੀਆਂ ਕੀਮਤਾਂ 'ਚ ਕਰੀਬ 27 ਫ਼ੀ ਸਦੀ ਦਾ ਵਾਧਾ ਹੋਇਆ ਸੀ | ਜਿਸ ਕਾਰਨ ਯਾਤਰੀ ਕਿਰਾਏ 'ਚ ਵਾਧਾ ਕਰਨਾ ਜ਼ਰੂਰੀ ਸੀ |