Farmer died due to electrocution
ਸੁਨਾਮ : ਸਥਾਨਕ ਸੁਨਾਮ-ਬਿਗੜਵਾਲ ਸੜਕ 'ਤੇ ਖੇਤ 'ਚ ਰਹਿੰਦੇ ਇਕ ਕਿਸਾਨ ਨਾਲ ਵੱਡਾ ਭਾਣਾ ਵਾਪਰ ਗਿਆ ਹੈ। ਕਿਸਾਨ ਦੀ ਕਰੰਟ ਲੱਗਣ ਕਾਰਨ ਮੌਤ ਹੋ ਗਈ ਹੈ। ਮ੍ਰਿਤਕ ਕਿਸਾਨ ਦੀ ਪਛਾਣ ਦਵਿੰਦਰ ਸਿੰਘ ਉਰਫ ਫੰਬੀ (43) ਪੁੱਤਰ ਸੁਖਦੇਵ ਸਿੰਘ ਵਜੋਂ ਹੋਈ ਹੈ।
ਦੱਸਿਆ ਜਾ ਰਿਹਾ ਹੈ ਕਿ ਕਿਸਾਨ ਦਵਿੰਦਰ ਸਿੰਘ ਆਪਣੇ ਖੇਤ ਦੇ ਆਲੇ-ਦੁਆਲੇ ਅਵਾਰਾ ਪਸ਼ੂਆਂ ਤੋਂ ਫਸਲਾਂ ਦੇ ਬਚਾਅ ਲਈ ਲਗਾਈ ਕੰਡਿਆਲੀ ਤਾਰ ਦੇ ਨੇੜਿਉਂ ਦੀ ਲੰਘ ਰਿਹਾ ਸੀ ਕਿ ਖੇਤ ਉੱਪਰ ਦੀ ਜਾ ਰਹੀ ਹਾਈ ਵੋਲਟੇਜ ਬਿਜਲੀ ਦੀ ਲਾਈਨ ਦੇ ਖੰਬੇ ਨਾਲ ਛੂਹ ਰਹੀ ਕੰਡਿਆਲੀ ਤਾਰ ਨੂੰ ਅਚਾਨਕ ਉਸ ਦਾ ਹੱਥ ਲੱਗ ਗਿਆ ਜਿਸ ਕਾਰਨ ਕਿਸਾਨ ਦਵਿੰਦਰ ਸਿੰਘ ਫੰਬੀ ਦੀ ਮੌਕੇ 'ਤੇ ਹੀ ਮੌਤ ਹੋ ਗਈ। ਮ੍ਰਿਤਕ ਕਿਸਾਨ ਦੇ ਪਰਿਵਾਰ ਨੇ ਸਰਕਾਰ ਤੋਂ ਮੁਆਵਜ਼ੇ ਦੀ ਮੰਗ ਕੀਤੀ ਹੈ।