'ਤੁਹਾਡਾ ਬਾਂਦਰ, ਤੁਹਾਡੀ ਸਰਕਸ', ਮੈਂ ਕਿਸੇ ਦੇ 'ਸ਼ੋਅ' 'ਚ ਨਹੀਂ ਦਿੰਦਾ ਦਖ਼ਲ : ਜਾਖੜ

ਚੰਡੀਗੜ੍ਹ, 30 ਨਵੰਬਰ (ਅੰਕੁਰ ਤਾਂਗੜੀ) : ਪੰਜਾਬ ਕਾਂਗਰਸ ਨਾਲ ਕਾਂਗਰਸ ਦੇ ਸਾਬਕਾ ਪ੍ਰਧਾਨ ਸੁਨੀਲ ਜਾਖੜ ਦੇ ਸਬੰਧ ਸੁਧਰਦੇ ਨਹੀਂ ਨਜ਼ਰ ਆ ਰਹੇ ਹਨ | ਜਾਖੜ ਲਗਾਤਾਰ ਪਾਰਟੀ ਅਤੇ ਪਾਰਟੀ ਦੇ ਨਵੇਂ ਪ੍ਰਧਾਨ ਨਵਜੋਤ ਸਿੱਧੂ 'ਤੇ ਅਪਣੇ ਦਿਲਚਸਪ ਟਵੀਟਾਂ ਰਾਹੀਂ ਟਿਪਣੀ ਕਰਦੇ ਰਹਿੰਦੇ ਹਨ | ਇਸ ਵਾਰ ਜਾਖੜ ਨੇ ਅਜਿਹਾ ਕੱੁਝ ਕਹਿ ਦਿਤਾ ਜਿਸ ਦੀ ਕਾਂਗਰਸ ਸ਼ਾਇਦ ਕਦੇ ਉਮੀਦ ਵੀ ਨਹੀਂ ਕਰ ਸਕਦੀ | ਨਵਜੋਤ ਸਿੱਧੂ ਦੀਆਂ ਫੇਰੀਆਂ ਅਤੇ ਮੁਲਾਕਾਤਾਂ 'ਤੇ ਨਿਸ਼ਾਨਾ ਸਾਧਦੇ ਹੋਏ ਕਿਹਾ, 'ਤੁਹਾਡਾ ਬਾਂਦਰ, ਤੁਹਾਡੀ ਸਰਕਸ', ਮੈਂ ਇਸੇ ਕਹਾਵਤ ਨੂੰ  ਮੰਨਦਾ ਹਾਂ | ਮੈਂ ਨਾ ਤਾਂ ਕਿਸੇ ਹੋਰ ਦੇ 'ਸ਼ੋਅ' 'ਚ ਦਖ਼ਲਅੰਦਾਜ਼ੀ ਕੀਤੀ ਹੈ ਅਤੇ ਨਾ ਹੀ ਕੋਈ ਸੁਝਾਅ ਦਿਤਾ ਹੈ | ਜਾਖੜ ਪਹਿਲਾਂ ਵੀ ਸਿੱਧੂ ਅਤੇ ਕਾਂਗਰਸ ਸਰਕਾਰ 'ਤੇ ਅਜਿਹੇ ਟਵੀਟ ਕਰ ਚੁੱਕੇ ਹਨ | ਮੀਡੀਆ ਰੀਪੋਰਟਾਂ ਮੁਤਾਬਕ ਜਾਖੜ ਨੇ ਇਹ ਟਵੀਟ ਨਵਜੋਤ ਸਿੱਧੂ ਵਲੋਂ ਸੰਗਠਨ ਬਣਾਉਣ ਵੇਲੇ ਜਾਖੜ ਦੀ ਸਿਫ਼ਾਰਸ਼ 'ਤੇ ਅਮਲ ਨਾ ਕਰਨ 'ਤੇ ਕੀਤਾ ਹੈ | ਦਸਣਯੋਗ ਹੈ ਕਿ ਜਾਖੜ ਦੀ ਬੇਨਤੀ ਅਨੁਸਾਰ ਪ੍ਰਧਾਨ ਜਾਂ ਹੋਰ ਅਧਿਕਾਰੀ ਨਿਯੁਕਤ ਨਹੀਂ ਕੀਤੇ ਗਏ | ਜਾਖੜ ਨੇ ਸਪੱਸ਼ਟ ਕੀਤਾ ਕਿ ਉਹ ਪੰਜਾਬ ਕਾਂਗਰਸ ਵਿਚ ਦਖ਼ਲ ਨਹੀਂ ਦੇ ਰਹੇ ਹਨ | ਨਵਜੋਤ ਸਿੱਧੂ ਨੂੰ  ਹੀ ਪਤਾ ਹੋਣਾ ਚਾਹੀਦਾ ਹੈ ਕਿ ਇਸ ਵਿਚ ਕੀ ਕਰਨਾ ਹੈ |