ਵਟਸਐਪ ਨੇ ਭਾਰਤ 'ਚ 23 ਲੱਖ ਖਾਤਿਆਂ 'ਤੇ ਕਿਉਂ ਲਗਾਈ ਪਾਬੰਦੀ?
ਅਕਤੂਬਰ ’ਚ ਬਲਾਕ ਕੀਤੇ ਗਏ ਖਾਤਿਆਂ ਦੀ ਗਿਣਤੀ ਸਤੰਬਰ ਮਹੀਨੇ ’ਚ ਬੈਨ ਕੀਤੇ ਗਏ 26.85 ਲੱਖ ਅਕਾਊਂਟ ਦੇ ਮੁਕਾਬਲੇ ਕਰੀਬ 13 ਫੀਸਦੀ ਘੱਟ ਹੈ।
ਨਵੀਂ ਦਿੱਲੀ: ਇੰਸਟੈਂਟ ਮੈਸੇਜਿੰਗ ਪਲੇਟਫਾਰਮ ਵਟਸਐਪ ਨੇ ਬੁੱਧਵਾਰ ਨੂੰ ਦੱਸਿਆ ਕਿ ਅਸੀਂ ਅਕਤੂਬਰ 2022 'ਚ 23 ਲੱਖ ਤੋਂ ਵੱਧ ਭਾਰਤੀ ਅਕਾਊਂਟਸ ਨੂੰ ਬੈਨ ਕਰ ਦਿੱਤਾ ਹੈ। ਅਕਤੂਬਰ ’ਚ ਬਲਾਕ ਕੀਤੇ ਗਏ ਖਾਤਿਆਂ ਦੀ ਗਿਣਤੀ ਸਤੰਬਰ ਮਹੀਨੇ ’ਚ ਬੈਨ ਕੀਤੇ ਗਏ 26.85 ਲੱਖ ਅਕਾਊਂਟ ਦੇ ਮੁਕਾਬਲੇ ਕਰੀਬ 13 ਫੀਸਦੀ ਘੱਟ ਹੈ। ਵਟਸਐਪ ਨੇ ਭਾਰਤ ’ਚ ਕਿਹਾ ਕਿ 1 ਅਕਤੂਬਰ 2022 ਅਤੇ 31 ਅਕਤੂਬਰ 2022 ਵਿਚਕਾਰ 23.24 ਲੱਖ ਵਟਸਐਪ ਖਾਤਿਆਂ ’ਤੇ ਬੈਨ ਲਗਾ ਦਿੱਤਾ ਗਿਆ ਹੈ। ਇਨ੍ਹਾਂ ’ਚੋਂ 8.11 ਲੱਖ ਖਾਤਿਆਂ ਨੂੰ ਐਕਟਿਵ ਰੂਪ ਨਾਲ ਬੈਨ ਕਰ ਦਿੱਤਾ ਗਿਆ ਹੈ।
ਵਟਸਐਪ ਨੇ ਆਪਣੀ ਸੂਚਨਾ ਤਕਨੀਕੀ ਨਿਯਮ 2021 ਦੇ ਤਹਿਤ ਦੱਸਿਆ ਕਿ ਉਸ ਨੂੰ 5 ਮਿਲੀਅਨ ਤੋਂ ਵੱਧ ਉਪਭੋਗਤਾਵਾਂ ਵਾਲੇ ਪ੍ਰਮੁੱਖ ਡਿਜੀਟਲ ਅਤੇ ਸੋਸ਼ਲ ਮੀਡੀਆ ਪਲੇਟਫਾਰਮਾਂ ਨੂੰ ਮਹੀਨਾਵਾਰ ਪਾਲਣਾ ਰਿਪੋਰਟਾਂ ਪ੍ਰਕਾਸ਼ਿਤ ਕਰਨੀ ਹੁੰਦੀ ਹੈ, ਜਿਸ ਵਿਚ ਉਨ੍ਹਾਂ ਨੂੰ ਉਸ ਮਹੀਨੇ ’ਚ ਮਿਲੀਆਂ ਸ਼ਿਕਾਇਤਾਂ ਅਤੇ ਉਨ੍ਹਾਂ ’ਤੇ ਕੀਤੀ ਗਈ ਕਾਰਵਾਈ ਦੀ ਜਾਣਕਾਰੀ ਦੇਣੀ ਹੁੰਦੀ ਹੈ।