Abohar Mechanic Burns: ਹਾਈ ਵੋਲਟੇਜ਼ ਤਾਰਾਂ ਦੇ ਸੰਪਰਕ ਵਿੱਚ ਆਉਣ ਕਾਰਨ ਮਕੈਨਿਕ ਝੁਲਸਿਆ

 ਅਬੋਹਰ ਦੇ ਅਜ਼ੀਮਗੜ੍ਹ ਵਿੱਚ ਅੱਜ ਦੁਪਹਿਰ ਇੱਕ ਸਟੀਲ ਗਰਿੱਲ ਮਕੈਨਿਕ ਹਾਈ ਵੋਲਟੇਜ਼ ਤਾਰਾਂ ਦੇ ਸੰਪਰਕ ਵਿੱਚ ਆਉਣ ਤੋਂ ਬਾਅਦ ਬੁਰੀ ਤਰ੍ਹਾਂ ਝੁਲਸ ਗਿਆ। ਉਸ ਦੇ ਸਾਥੀਆਂ ਨੇ ਉਸ ਨੂੰ ਤੁਰੰਤ ਹਸਪਤਾਲ ਪਹੁੰਚਾਇਆ ਜਿੱਥੋਂ ਉਸ ਨੂੰ ਮੁੱਢਲੀ ਸਹਾਇਤਾ ਤੋਂ ਬਾਅਦ ਰੈਫ਼ਰ ਕਰ ਦਿੱਤਾ ਗਿਆ। ਡਾਕਟਰਾਂ ਅਨੁਸਾਰ ਉਸ ਦੀ ਹਾਲਤ ਨਾਜ਼ੁਕ ਦੱਸੀ ਜਾ ਰਹੀ ਹੈ।

ਜਾਣਕਾਰੀ ਅਨੁਸਾਰ 25 ਸਾਲਾ ਸੰਦੀਪ ਕੁਮਾਰ, ਜੋ ਕਿ ਆਲਮਗੜ੍ਹ ਪਿੰਡ ਦੇ ਵਸਨੀਕ ਕ੍ਰਿਸ਼ਨ ਲਾਲ ਦਾ ਪੁੱਤਰ ਹੈ, ਜੋ ਕਿ ਇੱਕ ਸਟੀਲ ਮਕੈਨਿਕ ਦੇ ਸਹਾਇਕ ਵਜੋਂ ਕੰਮ ਕਰਦਾ ਹੈ, ਅੱਜ ਦੁਪਹਿਰ ਅਬੋਹਰ ਦੇ ਅਜ਼ੀਮਗੜ੍ਹ ਦੇ ਢਾਣੀ ਘੋੜੇਲਾ ਵਿੱਚ ਇੱਕ ਵਿਅਕਤੀ ਦੇ ਘਰ ਦੀ ਛੱਤ ’ਤੇ ਸਟੀਲ ਦੀਆਂ ਗਰਿੱਲਾਂ ਲਗਾ ਰਿਹਾ ਸੀ, ਜਦੋਂ ਸੰਦੀਪ ਕੁਮਾਰ ਦੇ ਹੱਥ ਵਿੱਚ ਪਾਈਪ ਉੱਪਰੋਂ ਲੰਘਦੀਆਂ 11,000 ਵੋਲਟ ਦੀਆਂ ਤਾਰਾਂ ਦੇ ਸੰਪਰਕ 'ਚ ਆਈ ਤਾਂ ਉਹ ਬੁਰੀ ਤਰ੍ਹਾਂ ਝੁਲਸ ਗਿਆ।

 ਸੰਦੀਪ ਕੁਮਾਰ ਨਾਲ ਕੰਮ ਕਰਨ ਵਾਲੇ ਹੋਰ ਕਰਮਚਾਰੀ ਉਸ ਨੂੰ ਤੁਰੰਤ ਹਸਪਤਾਲ ਲੈ ਗਏ, ਜਿੱਥੇ ਡਾ. ਪ੍ਰੇਮਲਤਾ ਨੇ ਕਿਹਾ ਕਿ ਸੰਦੀਪ ਦੀ ਹਾਲਤ ਬਹੁਤ ਗੰਭੀਰ ਸੀ ਕਿਉਂਕਿ ਉਹ 50 ਪ੍ਰਤੀਸ਼ਤ ਸੜ ਗਿਆ ਸੀ, ਜਿਸ ਕਾਰਨ ਮੁੱਢਲੇ ਇਲਾਜ ਤੋਂ ਬਾਅਦ ਉਸਨੂੰ ਫ਼ਰੀਦਕੋਟ ਰੈਫ਼ਰ ਕਰ ਦਿੱਤਾ ਗਿਆ।