ਬਿਨਾਂ ਟੀਕੇ ਦੇ ਲਗਣਗੇ ਤਿੰਨ ਡੋਜ਼
ਨਵੀਂ ਦਿੱਲੀ, 1 ਜੁਲਾਈ : ਭਾਰਤੀ ਕੰਪਨੀ ਜਾਇਡਸ ਕੈਡਿਲਾ ਨੇ ਅਪਣੀ ਕੋਰੋਨਾ ਵੈੱਕਸੀਨ 'ਜ਼ਾਇਕੋਵ-ਡੀ' ਲਈ ਭਾਰਤ ਦੇ ਡਰੱਗਜ਼ ਕੰਟਰੋਲਰ ਜਨਰਲ (ਡੀ.ਸੀ.ਜੀ.ਆਈ.) ਤੋਂ ਐਂਮਰਜੈਂਸੀ ਵਰਤੋਂ ਲਈ ਮਨਜ਼ੂਰੀ ਮੰਗੀ ਹੈ | ਬੱਚਿਆਂ ਲਈ ਸੁਰੱਖਿਅਤ ਦੱਸੀ ਜਾ ਰਹੀ ਇਸ ਕੋਰੋਨਾ ਵੈਕਸੀਨ ਵਿਚ ਕੁਝ ਖ਼ਾਸ ਹੈ | ਇਹ ਪਹਿਲੀ ਪਾਲਸਿਮਡ ਡੀਐਨਏ ਵੈਕਸੀਨ ਹੈ | ਇਸ ਦੇ ਨਾਲ-ਨਾਲ ਇਸ ਨੂੰ ਬਿਨਾਂ ਕਿਸੇ ਸੂਈ ਦੀ ਸਹਾਇਤਾ ਫ਼ਾਰਮੇਜੈਟ ਤਕਨੀਕ ਨਾਲ ਲਗਾਇਆ ਜਾ ਸਕਦਾ ਹੈ | ਜਿਸ ਨਾਲ ਸਾਈਡ ਇਫ਼ੈਕਟ ਦੇ ਖ਼ਤਰੇ ਘੱਟ ਹੋਣਗੇ |
ਜਾਇਡਸ ਕੈਡਿਲਾ ਦੀ ਕੋਰੋਨਾ ਵੈਕਸੀਨ 'ਜ਼ਾਇਕੋਵ-ਡੀ' ਦਾ ਤੀਜਾ ਪੜਾਅ ਟਰਾਇਲ ਕੀਤਾ ਗਿਆ ਹੈ | ਇਸ ਵਿਚ 28 ਹਜ਼ਾਰ ਲੋਕਾਂ ਨੇ ਸ਼ਿਰਕਤ ਕੀਤੀ | ਇਹ ਭਾਰਤ ਵਿਚ ਕਿਸੇ ਵੀ ਟੀਕੇ ਦਾ ਹੁਣ ਤਕ ਦਾ ਸੱਭ ਤੋਂ ਵੱਡਾ ਟ੍ਰਾਇਲ ਹੈ, ਇਸ ਦੇ ਨਤੀਜੇ ਵੀ ਤਸੱਲੀਬਖ਼ਸ਼ ਦੱਸੇ ਗਏ ਹਨ | ਦੂਜੀ ਕੋਰੋਨਾ ਲਹਿਰ ਦੌਰਾਨ ਦੇਸ਼ ਦੀਆਂ 50 ਕਲੀਨਿਕਲ ਸਾਈਟਾਂ 'ਤੇ ਟਰਾਇਲ ਕੀਤਾ ਗਿਆ ਸੀ | ਇਸ ਨੂੰ ਡੈਲਟਾ ਵੇਰੀਐਂਟ 'ਤੇ ਵੀ ਪ੍ਰਭਾਵਸ਼ਾਲੀ ਦਸਿਆ ਜਾ ਰਿਹਾ ਹੈ |
ਖੋਜ ਵਿਚ ਪਤਾ ਲੱਗਾ ਹੈ ਕਿ ਜਾਇਡਸ ਕੈਡਿਲਾ ਦੀ 'ਜ਼ਾਇਕੋਵ-ਡੀ' ਕੋਰੋਨਾ ਟੀਕਾ 12 ਤੋਂ 18 ਸਾਲ ਦੇ ਬੱਚਿਆਂ ਲਈ ਸੁਰੱਖਿਅਤ ਹੈ | ਇਹ ਫ਼ਾਰਮਾਜੈੱਟ ਸੂਈ ਰਹਿਤ ਤਕਨੀਕ ਦੀ ਮਦਦ ਨਾਲ ਲਾਗੂ ਕੀਤਾ ਜਾਵੇਗਾ | ਇਸ ਵਿਚ ਸੂਈ ਦੀ ਲੋੜ ਨਹੀਂ ਹੈ, ਬਿਨਾਂ ਸੂਈ ਵਾਲੇ ਇੰਜੈਕਸ਼ਨ ਵਿਚ ਦਵਾਈ ਭਰੀ ਜਾਂਦੀ ਹੈ, ਫਿਰ ਇਸ ਨੂੰ ਇਕ ਮਸ਼ੀਨ ਵਿਚ ਲਗਾ ਕੇ ਬਾਂਹ ਤੇ ਲਗਾਇਆ ਜਾਂਦਾ ਹੈ | ਮਸ਼ੀਨ ਦੇ ਬਟਨ ਨੂੰ ਦਬਾਉਣ ਨਾਲ ਟੀਕੇ ਦੀ ਦਵਾਈ ਸਰੀਰ ਦੇ ਅੰਦਰ ਪਹੁੰਚ ਜਾਂਦੀ ਹੈ |
ਕੰਪਨੀ ਨੇ ਸਲਾਨਾ 10-12 ਕਰੋੜ ਖ਼ੁਰਾਕਾਂ ਬਣਾਉਣ ਦੀ ਗੱਲ ਕਹੀ ਹੈ | 'ਜ਼ਾਇਕੋਵ-ਡੀ' ਦੀਆਂ ਕੁੱਲ ਤਿੰਨ ਖ਼ੁਰਾਕਾਂ ਲੈਣੀਆਂ ਪੈਂਦੀਆਂ ਹਨ | ਤਿੰਨੋਂ ਖ਼ੁਰਾਕਾਂ ਸੂਈ ਤੋਂ ਬਿਨਾਂ ਲਗਾਈਆਂ ਜਾਂਦੀਆਂ ਹਨ ਅਤੇ ਇਸ ਨਾਲ ਸਾਈਡ ਇਫ਼ੈਕਟ ਹੋਣ ਦਾ ਵੀ ਡਰ ਨਹੀਂ ਰਹਿੰਦਾ | (ਏਜੰਸੀ)