ਬਹਾਨੇ ਨਾਲ ਬੱਚਿਆਂ ਨੂੰ ਛੱਤ ਤੇ ਲੈ ਗਈ ਔਰਤ,ਇੱਕ-ਇੱਕ ਕਰ ਪੰਜਾਂ ਨੂੰ ਸੁੱਟਿਆ ਹੇਠਾਂ

ਨਵੀਂ ਦਿੱਲੀ: ਝਾਰਖੰਡ ਦੇ ਸਾਹਿਬਗੰਜ ਤੋਂ ਇਕ ਸਨਸਨੀਖੇਜ਼ ਘਟਨਾ ਸਾਹਮਣੇ ਆਈ ਹੈ। ਇਹ ਘਟਨਾ ਐਤਵਾਰ ਸਵੇਰੇ ਨਗਰ ਥਾਣੇ ਦੇ ਪੁਰਾਣੀ ਸਾਹਿਬਗੰਜ ਵਿਖੇ ਵਾਪਰੀ, ਜਿੱਥੇ ਇਕ ਔਰਤ ਨੇ ਸਾਰੇ ਬੱਚਿਆਂ ਨੂੰ ਇਕ-ਇਕ ਕਰਕੇ ਆਪਣੇ ਦੋ ਮੰਜ਼ਿਲਾ ਮਕਾਨ ਦੀ ਛੱਤ ਤੋਂ ਹੇਠਾਂ ਸੁੱਟ ਦਿੱਤਾ, ਜਿਸ ਵਿਚ 2 ਬੱਚਿਆਂ ਸਮੇਤ ਇਕ ਨੌਜਵਾਨ ਜ਼ਖਮੀ ਹੋ ਗਿਆ।

ਪ੍ਰਾਪਤ ਜਾਣਕਾਰੀ ਅਨੁਸਾਰ ਬਿਹਾਰੀ ਲਾਲ ਮੰਡਲ ਭਵਨ ਵਿੱਚ ਆਸ ਪਾਸ ਦੇ ਕੁੱਝ ਬੱਚੇ ਟੀਵੀ ਵੇਖ ਰਹੇ ਸਨ। ਘਰ ਦੀ ਇਕ ਔਰਤ ਬਹਾਨੇ ਨਾਲ ਬੱਚਿਆਂ ਨੂੰ ਛੱਤ 'ਤੇ ਲੈ ਗਈ, ਫਿਰ ਸਾਰਿਆਂ ਨੂੰ ਛੱਤ ਤੋਂ ਹੇਠਾਂ ਸੁੱਟ ਦਿੱਤਾ। ਇੱਧਰ ਮੁਹੱਲੇ ਦੇ ਬੁੱਢਣ ਮੰਡਲ ਅਤੇ ਸ਼ਰਮੀਲਾ ਨਾਮ ਦੀ ਲੜਕੀ ਨੇ ਕਈ ਬੱਚਿਆਂ ਨੂੰ ਬਚਾਇਆ।

ਦੂਜੇ ਪਾਸੇ ਅੰਸ਼ ਕੁਮਾਰ ਮੰਡਲ (12) ਅਤੇ ਆਯੁਸ਼ ਕੁਮਾਰ (10) ਗੰਭੀਰ ਰੂਪ ਵਿੱਚ ਜ਼ਖਮੀ ਹੋ ਗਏ, ਜਦੋਂ ਕਿ ਬੁਢਣ ਮੰਡਲ ਵੀ ਬੱਚਿਆਂ ਨੂੰ ਬਚਾਉਣ ਦੀ ਕੋਸ਼ਿਸ਼ ਵਿੱਚ ਜ਼ਖਮੀ ਹੋ ਗਿਆ। ਤਿੰਨਾਂ ਨੂੰ ਇਲਾਜ ਲਈ ਸਦਰ ਹਸਪਤਾਲ ਲਿਜਾਇਆ ਗਿਆ, ਜਿਥੇ ਡਾਕਟਰ ਨੇ ਅੰਸ਼ ਕੁਮਾਰ ਨੂੰ ਰੈਫ਼ਰ ਕਰ ਦਿੱਤਾ। ਉਥੇ ਮੌਜੂਦ ਲੋਕਾਂ ਦਾ ਕਹਿਣਾ ਹੈ ਕਿ 10 ਬੱਚੇ ਉਥੇ ਖੇਡ ਰਹੇ ਸਨ, ਜਿਨ੍ਹਾਂ ਵਿਚੋਂ  ਪੰਜਾਂ ਨੂੰ ਔਰਤ ਨੇ ਸੁੱਟ ਦਿੱਤੇ ਸਨ।

ਮਾਮਲੇ ਦੀ ਜਾਣਕਾਰੀ ਮਿਲਦੇ ਹੀ ਐਸਡੀਪੀਓ ਵਿਜੇ ਅਸ਼ੀਸ਼ ਕੁਜੂਰ ਅਤੇ ਨਗਰ ਥਾਣੇ ਦੇ ਏਐਸਆਈ ਪ੍ਰਮੋਦ ਕੁਮਾਰ ਨੇ ਘਟਨਾ ਦੀ ਜਾਂਚ ਕੀਤੀ। ਦੱਸਿਆ ਜਾ ਰਿਹਾ ਹੈ ਕਿ ਇਹ ਔਰਤ ਦਿਮਾਗੀ ਤੌਰ ‘ਤੇ ਬੀਮਾਰ ਹੈ।