ਚੰਡੀਗੜ੍ਹ : ਕਰੀਬ ਦੋ ਹਜਾਰ ਕਿਸਾਨ ਧਰਨੇ ਉਤੇ ਬੈਠੇ ਹਨ। ਉਨ੍ਹਾਂ ਨੇ ਸਰਕਾਰ ਨੂੰ ਅਲਟੀਮੇਟਮ ਦੇ ਦਿਤੇ ਹਨ ਕਿ ਜੇਕਰ ਮੰਗਾਂ ਨਹੀਂ ਮੰਨੀਆਂ ਗਈਆਂ ਤਾਂ ਉਹ ਜਾਨ ਦੇ ਦੇਣਗੇ। ਉਥੇ ਹੀ ਪ੍ਰਸ਼ਾਸਨ ਨੇ ਉਨ੍ਹਾਂ ਦਾ ਪਾਣੀ ਬੰਦ ਕਰ ਦਿਤਾ। ਉਹ ਘਰ ਤੋਂ ਸਹੁੰ ਖਾ ਕੇ ਆਏ ਹਨ। ਸਰਕਾਰ ਮੰਗਾਂ ਮੰਨਦੀ ਹੈ ਤਾਂ ਠੀਕ ਨਹੀਂ ਤਾਂ ਪ੍ਰਦਰਸ਼ਨ ਕਰਦੇ ਹੋਏ ਹੀ ਜਾਨ ਦੇ ਦੇਣਗੇ।

ਚੰਡੀਗੜ੍ਹ ਵਿਚ ਸੈਕਟਰ - 25 ਸਥਿਤ ਰੈਲੀ ਗਰਾਊਂਡ ਵਿਚ ਪਿਛਲੇ ਤਿੰਨ ਦਿਨਾਂ ਤੋਂ ਧਰਨੇ ਉਤੇ ਬੈਠੇ ਕਿਸਾਨ ਅਪਣੀਆਂ ਮੰਗਾਂ ਉਤੇ ਅੜੇ ਹੋਏ ਹਨ। ਪੰਜਾਬ ਦੇ ਲੱਗ-ਭੱਗ ਹਰ ਜ਼ਿਲ੍ਹੇ ਤੋਂ ਕਰੀਬ ਢਾਈ ਹਜਾਰ ਕਿਸਾਨ ਚੰਡੀਗੜ੍ਹ ਪਹੁੰਚੇ ਹਨ। ਇਹ ਸਾਰੇ ਅਪਣੇ ਨਾਲ ਟ੍ਰੈਕਟਰ - ਟਰਾਲੀਆਂ ਵਿਚ 6 ਮਹੀਨੇ ਤੱਕ ਦਾ ਰਾਸ਼ਨ ਲੈ ਕੇ ਆਏ ਹਨ। ਅਗਲੇ ਕੁੱਝ ਮਹੀਨਿਆਂ ਤੱਕ ਹੁਣ ਚੰਡੀਗੜ੍ਹ ਹੀ ਉਨ੍ਹਾਂ ਦਾ ਡੇਰਾ ਹੈ।

ਬਹੁਤ ਸਾਰੇ ਕਿਸਾਨ ਚੰਡੀਗੜ੍ਹ ਦੇ ਬਾਰਡਰ ਦੇ ਨੇੜੇ ਬੈਠੇ ਹਨ। ਉਨ੍ਹਾਂ ਨੂੰ ਅੰਦਰ ਆਉਣ ਦੀ ਇਜਾਜਤ ਨਹੀਂ ਦਿਤੀ ਗਈ। ਕਿਸਾਨਾਂ ਦੀਆਂ ਮੰਗਾਂ ਹਨ ਕਿ ਸਵਾਮੀਨਾਥਨ ਕਮਿਸ਼ਨ ਦੇ ਅਨੁਸਾਰ ਉਨ੍ਹਾਂ ਦੀ ਫ਼ਸਲ ਦੀ ਲਾਗਤ ਦੇ ਆਧਾਰ ਉਤੇ ਡੇਢ ਗੁਣਾ ਲਾਭਕਾਰੀ ਮੁੱਲ ਤੋਂ ਹਿਸਾਬ ਕੀਤਾ ਜਾਵੇ ਅਤੇ ਕਿਸਾਨਾਂ ਦਾ ਸਾਰਾ ਕਰਜ਼ ਮਾਫ਼ ਕੀਤਾ ਜਾਵੇ।