Harsimrat Kaur Badal

ਬਠਿੰਡਾ : ਪਿਛਲੇ ਲੰਮੇ ਸਮੇਂ ਤੋਂ ਚਰਚਾ ਵਿਚ ਚੱਲੇ ਆ ਰਹੇ ਦਿੱਲੀ-ਅੰਮ੍ਰਿਤਸਰ-ਕਟੜਾ ਐਕਸਪ੍ਰੈਸ ਵੇਅ ਵਿਚ ਹੁਣ ਇਕ ਨਵਾਂ ਸੰਪਰਕ ਬਣੇਗਾ। ਇਸ ਨਵੇਂ ਸੰਪਰਕ ਤਹਿਤ ਕੇਂਦਰ ਵਲੋਂ ਕੀਤੀ ਸੋਧ ਅਧੀਨ ਇਸ 'ਚ 5 ਵੱਡੇ ਸਿੱਖ ਧਾਰਮਕ ਅਸਥਾਨਾਂ ਨੂੰ ਜੋੜਨ ਵਾਲਾ ਸਿੱਖ ਧਾਰਮਕ ਯਾਤਰਾ ਸੰਪਰਕ ਵੀ ਸਿਰਜਿਆ ਜਾਵੇਗਾ।

ਇਹ ਪ੍ਰਗਟਾਵਾ ਕਰਦਿਆਂ ਅੱਜ ਇਥੇ ਇਕ ਬਿਆਨ ਵਿਚ ਕੇਂਦਰੀ ਮੰਤਰੀ ਤੇ ਬਠਿੰਡਾ ਲੋਕ ਸਭਾ ਹਲਕੇ ਤੋਂ ਐਮ.ਪੀ. ਬੀਬੀ ਹਰਸਿਮਰਤ ਕੌਰ ਬਾਦਲ ਨੇ ਇਸ ਦੇ ਲਈ ਅਪਣੇ ਸਾਥੀ ਮੰਤਰੀ ਨਿਤਿਨ ਗਡਗਰੀ ਦਾ ਧਨਵਾਦ ਕੀਤਾ। ਬੀਬੀ ਬਾਦਲ ਨੇ ਕਿਹਾ, ''ਗੁਰੂ ਸਾਹਿਬਾਨਾਂ ਨੂੰ ਸਨਮਾਨ ਦਿੰਦੇ ਹੋਏ, ਨਵੇਂ ਐਕਸਪ੍ਰੈਸ ਵੇਅ ਦਾ ਨਾਂਅ ਉਨ੍ਹਾਂ ਦੇ ਨਾਂਅ 'ਤੇ ਰੱਖਣ ਦੇ ਦਿਤੇ ਭਰੋਸੇ ਲਈ ਉਹ ਗਡਕਰੀ ਜੀ ਦੀ ਬਹੁਤ ਸ਼ੁਕਰਗੁਜ਼ਾਰ ਹਨ।''

ਕੇਂਦਰੀ ਮੰਤਰੀ ਨੇ ਕਿਹਾ ਕਿ ਹੁਣ ਕਰਤਾਰਪੁਰ ਅਤੇ ਅੰਮ੍ਰਿਤਸਰ ਦਰਮਿਆਨ ਪਵਿੱਤਰ ਗ੍ਰੀਨਫੀਲਡ ਅਤੇ ਦਿੱਲੀ ਦਰਮਿਆਨ ਸਿੱਧੇ ਸੰਪਰਕ ਨੂੰ ਯਕੀਨੀ ਬਣਾਉਣ ਲਈ ਇਕ ਵਾਧੂ ਗ੍ਰੀਨਫੀਲਡ ਹਾਈਵੇ ਦਾ ਨਿਰਮਾਣ ਕੀਤਾ ਜਾਵੇਗਾ। ਕਾਂਗਰਸ ਸਰਕਾਰ ਵਲੋਂ ਸੌਂਪੇ ਗਏ ਤਾਲਮੇਲ ਅਨੁਸਾਰ ਐਕਸਪ੍ਰੈਸ ਵੇਅ ਨੂੰ ਅੰਮ੍ਰਿਤਸਰ ਤੋਂ ਕਰਤਾਰਪੁਰ ਨੇੜੇ 60 ਕਿਲੋਮੀਟਰ ਅੱਗੇ ਮੋੜਨਾ ਸੀ ਅਤੇ ਮੌਜੂਦਾ ਐਨ.ਐਚ.-3 ਨੂੰ ਕਰਤਾਰਪੁਰ ਤੋਂ ਅੰਮ੍ਰਿਤਸਰ ਦੇ ਨਵੀਨੀਕਰਨ ਦੀ ਵਿਵਸਥਾ ਕੀਤੀ ਗਈ ਸੀ।

ਉਸ ਨੇ ਕਿਹਾ ਕਿ ਨਵੀਂ ਅਲਾਇਨਮੈਂਟ ਤਹਿਤ ਜੋ ਉਸ ਨੇ ਪ੍ਰਸਤਾਵਤ ਕੀਤਾ ਸੀ, ਐਕਸਪ੍ਰੈਸ ਵੇਅ ਹੁਣ ਸੁਲਤਾਨਪੁਰ ਲੋਧੀ, ਗੋਇੰਦਵਾਲ ਸਾਹਿਬ, ਖਡੂਰ ਸਾਹਿਬ, ਤਰਨਤਾਰਨ ਅਤੇ ਸ੍ਰੀ ਅੰਮ੍ਰਿਤਸਰ ਸਾਹਿਬ ਵਿਖੇ ਪੰਜ ਇਤਿਹਾਸਕ ਸਿੱਖ ਧਾਰਮਕ ਅਸਥਾਨਾਂ ਨੂੰ ਜੋੜ ਦੇਵੇਗਾ। ਉਨ੍ਹਾਂ ਕਿਹਾ ਕਿ ਇਸ ਨੂੰ ਸ੍ਰੀ ਕਰਤਾਰਪੁਰ ਸਾਹਿਬ ਦੀ ਯਾਤਰਾ ਦੀ ਸਹੂਲਤ ਲਈ ਡੇਰਾ ਬਾਬਾ ਨਾਨਕ ਤਕ ਵੀ ਵਧਾਇਆ ਜਾਵੇਗਾ। ਸ੍ਰੀਮਤੀ ਬਾਦਲ ਨੇ ਕਿਹਾ ਕਿ ਪ੍ਰਸਤਾਵਿਤ ਹਾਈਵੇਅ ਸ੍ਰੀ ਦਰਬਾਰ ਸਾਹਿਬ ਦੇ ਦੋ ਵੱਡੇ ਅਸਥਾਨਾਂ ਨੂੰ ਕਟੜਾ ਵਿਖੇ ਮਾਤਾ ਵੈਸ਼ਨੋ ਦੇਵੀ ਨਾਲ ਜੋੜ ਕੇ ਵੱਡੇ ਪੱਧਰ 'ਤੇ ਧਾਰਮਕ ਸੈਰ-ਸਪਾਟਾ ਨੂੰ ਉਤਸ਼ਾਹਤ ਕਰੇਗਾ।