ਨਾਸਾ ਸਪੇਸ ਸੈਂਟਰ ਵਿਖੇ ਸੁਸ਼ੋਭਿਤ ਨਹੀਂ ਹੈ ਸ੍ਰੀ ਗੁਰੂ ਗ੍ਰੰਥ ਸਾਹਿਬ

2014 ਵਿਚ ਹੀ ਦਸ ਦਿਤਾ ਸੀ ਕਿ ਨਾਸਾ ਹੈੱਡਕੁਆਰਟਰ ਵਿਖੇ ਨਹੀਂ ਰੱਖੇ ਜਾਂਦੇ ਧਾਰਮਕ ਗ੍ਰੰਥ : ਮੈਨੇਜਰ

ਔਕਲੈਂਡ, 2 ਸਤੰਬਰ (ਹਰਜਿੰਦਰ ਸਿੰਘ ਬਸਿਆਲਾ): ਪਿਛਲੇ ਕਈ ਸਾਲਾਂ ਤੋਂ ਅਖ਼ਬਾਰਾਂ ਵਿਚ ਛਪੀਆਂ ਖ਼ਬਰਾਂ ਕਿ ਅਮਰੀਕਾ ਸਰਕਾਰ ਦੇ ਸਪੇਸ ਸੈਂਟਰ ‘ਨਾਸਾ’ (ਦਾ ਨੈਸ਼ਨਲ ਐਰੋਨੋਟਿਕਸ ਐਂਡ ਸਪੇਸ ਐਡਮਨਿਸਟ੍ਰੇਸ਼ਨ) ਦੇ ਵਾਸ਼ਿੰਗਟਨ ਸਥਿਤ ਮੁੱਖ ਦਫ਼ਤਰ ਦੀ ਸੱਤਵੀਂ ਮੰਜ਼ਲ ਉਤੇ ਸ੍ਰੀ ਗੁਰੂ ਗ੍ਰੰਥ ਸਾਹਿਬ ਦਾ ਪ੍ਰਕਾਸ਼ ਹੈ, ਨੂੰ ਨਾਸਾ ਅਧਿਕਾਰੀਆਂ ਨੇ ਜੁਲਾਈ 2014 ਦੇ ਵਿਚ ਹੀ ਰੱਦ ਕਰ ਦਿਤਾ ਸੀ। ਅੱਜਕਲ ਦੀਪ ਸਿੱਧੂ ਦੀ ਇਕ ਵੀਡੀਉ ਅਜਿਹੀ ਸੋਸ਼ਲ ਮੀਡੀਆ ਉਤੇ ਘੁੰਮ ਰਹੀ ਹੈ ਕਿ ਉਥੇ ਸ੍ਰੀ ਗੁਰੂ ਗ੍ਰੰਥ ਸਾਹਿਬ ਸੱਤਵੀਂ ਮੰਜ਼ਲ ਉਤੇ ਸੁਸ਼ੋਭਿਤ ਹਨ। ਇਸ ਪੱਤਰਕਾਰ ਵਲੋਂ ਭੇਜੀ ਈਮੇਲ ਅਤੇ ਨਿਊਜ਼ੀਲੈਂਡ ਵਸਦੇ ਇਕ ਹੋਰ ਵੀਰ ਵਲੋਂ ਭੇਜੀ ਈਮੇਲ ਦੇ ਜਵਾਬ ਵਿਚ ਉਨ੍ਹਾਂ ਸਾਫ਼ ਕਿਹਾ ਹੈ ਕਿ ਮੁੱਖ ਦਫ਼ਤਰ ਵਿਖੇ ਕੋਈ ਧਾਰਮਕ ਗ੍ਰੰਥ ਨਹੀਂ ਰਖਿਆ ਜਾਂਦਾ। ਸ੍ਰੀ ਗੁਰੂ ਗ੍ਰੰਥ ਸਾਹਿਬ ਦੀ ਬੀੜ ਦਾ ਸੱਤਵੀਂ ਮੰਜ਼ਲ ਉਤੇ ਪ੍ਰਕਾਸ਼ ਕਰਨਾ ਵੀ ਸੱਚ ਨਹੀਂ ਹੈ। 
ਨਾਸੀ ਦੀ ‘ਵਹੀਕਲ ਅਸੈਂਬਲੀ ਬਿਲਡਿੰਗ’ ਦੇ ਵਿਚ ਰਾਕੇਟ ਤਿਆਰ ਜਾਂਦੇ ਹਨ ਅਤੇ ਇਸ ਬਿਲਡਿੰਗ ਦਾ ਨਕਸ਼ਾ ਅਜਿਹਾ ਹੈ ਕਿ ਉਥੇ 456 ਫੁੱਟ ਉਚਾਈ ਵਾਲੀ ਵਸਤੂ ਵੀ ਅੰਦਰ ਆ ਸਕਦੀ ਹੈ। ਵੇਖਣ ਨੂੰ ਜੋ ਬਾਰੀਆਂ ਲਗਦੀਆਂ ਹਨ ਉਹ ਉਪਰ ਉਠ ਜਾਂਦੀਆਂ ਹਨ। 
ਵੀ.ਏ.ਬੀ. ਕਹੀ ਜਾਣ ਵਾਲੀ ਇਸ ਬਿਲਡਿੰਗ ਨੂੰ ਬਣਾਉਣ ਵਿਚ 98,000 ਟਨ ਸਟੀਲ ਲੱਗਿਆ ਸੀ, 65,000 ਕਿਊਬਕ ਯਾਰਡ ਕੰਕਰੀਟ, 45,000 ਸਟੀਲ ਬੀਮ, 10 ਲੱਖ ਨੱਟ ਅਤੇ 456 ਫੁੱਟ ਉਚਾ ਦਰਵਾਜ਼ਾ (ਉਚੇ ਰਾਕਟ ਵਾਸਤੇ) ਰਖਿਆ ਗਿਆ ਹੈ। ਨਾਸਾ ਨੇ ਅਪਣਾ ਨਵਾਂ ਦਫ਼ਤਰ 2019 ਵਿਚ ਫ਼ਲੋਰਿਡਾ ਵਿਖੇ 7 ਮੰਜ਼ਲਾ ਬਣਾਇਆ ਸੀ ਅਤੇ ਇਥੇ ਜ਼ਰੂਰ ‘ਹਾਈ ਡੈਂਸਟੀ ਲਾਇਬ੍ਰੇਰੀ’ (ਥੋੜ੍ਹੀ ਥਾਂ ਵਿਚ ਭਰਪੂਰ ਕਿਤਾਬਾਂ) ਬਣਾਈ ਹੋਈ ਹੈ।