ਖੇਤੀ ਕਾਨੂੰਨਾਂ ਨੂੰ ਲੈ ਕੇ ਹਰਸਿਮਰਤ ਬਾਦਲ ਤੇ ਰਵਨੀਤ ਬਿੱਟੂ ਵਿਚਕਾਰ ਹੋਈ ਤੂੰ-ਤੂੰ, ਮੈਂ-ਮੈਂ

Ravneet Bittu, Harsimrat Badal

ਨਵੀਂ ਦਿੱਲੀ – ਤਿੰਨ ਖੇਤੀਬਾੜੀ ਕਾਲੇ ਕਾਨੂੰਨਾਂ ਦੇ ਮੁੱਦੇ ‘ਤੇ ਅੱਜ ਸਾਬਕਾ ਕੇਂਦਰੀ ਮੰਤਰੀ ਹਰਸਿਮਰਤ ਕੌਰ ਬਾਦਲ ਤੇ ਕਾਂਗਰਸੀ ਆਗੂ ਰਵਨੀਤ ਬਿੱਟੂ ਵਿਚਕਾਰ ਤਿੱਖੀ ਬਹਿਸ ਹੋ ਗਈ। ਸਾਬਕਾ ਕੇਂਦਰੀ ਮੰਤਰੀ ਹਰਸਿਮਰਤ ਕੌਰ ਬਾਦਲ ਜੋ ਹੱਥਾਂ ਵਿਚ ਖੇਤੀ ਕਾਨੂੰਨਾਂ ਦੇ ਵਿਰੋਧ ਵਿਚ ਤਖ਼ਤੀਆਂ ਲੈ ਕੇ ਸੰਸਦ ਦੇ ਬਾਹਰ ਵਿਰੋਧ ਕਰ ਰਹੇ ਸਨ, ਇਸੇ ਦੌਰਾਨ ਉੱਥੋਂ ਦੀ ਲੰਘ ਰਹੇ ਕਾਂਗਰਸੀ ਸੰਸਦ ਮੈਂਬਰ ਰਵਨੀਤ ਬਿੱਟੂ ਉਹਨਾਂ ਕੋਲ ਚਲੇ ਗਏ।

ਜਿਸ ਦੌਰਾਨ ਦੋਨਾਂ ਆਗਾਂ ਵਿਚਕਾਰ ਬਹਿਸ ਛਿੜ ਗਈ। ਰਵਨੀਤ ਬਿੱਟੂ ਨੇ ਉੱਥੇ ਜਾ ਕੇ ਹਰਸਿਮਰਤ ਬਾਦਲ ਨੂੰ ਕਿਹਾ ਕਿ ‘’ਤੁਹਾਡਾ ਇਹ ਪ੍ਰਦਰਸ਼ਨ ਨਕਲੀ ਹੈ, ਤੁਸੀਂ ਖੁਦ ਬਿੱਲ ਪਾਸ ਕਰਵਾਏ ਤੇ ਉਸ ਸਮੇਂ ਤੁਸੀਂ ਮੰਤਰੀ ਸੀ ਫਿਰ ਜਦੋਂ ਜਨਤਾ ਨੇ ਵਿਰੋਧ ਕਰਨਾ ਸ਼ੁਰੂ ਕੀਤਾ ਤਾਂ ਤੁਸੀਂ ਅਸਤੀਫ਼ਾ ਦੇ ਦਿੱਤਾ। ਉਹਨਾਂ ਕਿਹਾ ਕਿ ਤੁਸੀਂ ਮੰਤਰੀ ਰਹਿੰਦੇ ਕੋਈ ਵਿਰੋਧ ਨਹੀਂ ਕੀਤਾ, ਬਿੱਲ ਪਾਸ ਹੋ ਗਏ ਪਰ ਤੁਸੀਂ ਕੁੱਝ ਨਹੀਂ ਕਿਹਾ। ਰਵਨੀਤ ਬਿੱਟੂ ਨੇ ਕਿਹਾ ਕਿ ਇਹ ਲੋਕ ਡਰਾਮਾ ਕਰ ਰਹੇ ਹਨ। ਪੂਰੀ ਤਰ੍ਹਾਂ ਝੂਠੇ ਹਨ ਇਹ ਲੋਕ। ਬਿੱਲ ਪਾਸ ਹੋਣ ਤੋਂ 2 ਮਹੀਨੇ ਬਾਅਦ ਤੱਕ ਸੁਖਬੀਰ ਬਾਦਲ ਤੇ ਪ੍ਰਕਾਸ਼ ਬਾਦਲ ਗਾਇਬ ਰਹੇ। ਇਹ ਕਹਿੰਦੇ ਨੇ ਕਿ ਇਕਜੁੱਟ ਹੋ ਕੇ ਸਰਕਾਰ ਖਿਲਾਫ਼ ਵਿਰੋਧ ਕਰੋ। ਇਹਨਾਂ ਨਾਲ ਅਸੀਂ ਕਿਹੋ ਜਿਹੀ ਏਕਤਾ ਰੱਖੀਏ? ਇਹਨਾਂ ਨੇ ਆਪ ਹੀ ਬਿੱਲ ਪਾਸ ਕਰਵਾਏ ਤੇ ਹੁਣ ਰੋਜ਼ ਡਰਾਮਾ ਕਰ ਰਹੇ ਹਨ’’।

 

 

ਇਸ ਦੇ ਨਾਲ ਹੀ ਰਵਨੀਤ ਬਿੱਟੂ ਵੱਲੋਂ ਕਹੀਆਂ ਇਹਨਾਂ ਗੱਲਾਂ ਦਾ ਹਰਸਿਮਰਤ ਬਾਦਲ ਨੇ ਜਵਾਬ ਦਿੰਦੇ ਹੋਏ ਕਿਹਾ ਕਿ ‘’ਮੈਂ ਉਸ ਸਮੇਂ ਮੰਤਰੀ ਨਹੀਂ ਸੀ, ਮੈਂ ਅਸਤੀਫਾ ਦੇ ਚੁੱਕੀ ਸੀ। ਇਹ ਬਿੱਲ ਤੁਹਾਡੇ ਭੱਜਣ ਨਾਲ ਪਾਸ ਹੋਏ ਹਨ। ਰਾਹੁਲ ਗਾਂਧੀ ਨੇ ਸੰਸਦ ਛੱਡ ਦਿੱਤੀ ਅਤੇ ਕਾਂਗਰਸ ਦੇ ਵਾਕਆਊਟ ਦੀ ਵਜ੍ਹਾ ਨਾਲ ਹੀ ਬਿੱਲ ਪਾਸ ਹੋਏ ਹਨ’’। ਹਰਸਿਮਰਤ ਬਾਦਲ ਨੇ ਅਪਣੀ ਗੱਲ ਕਹਿੰਦੇ ਹੋਏ ਕਾਲੇ ਕਾਨੂੰਨ ਰੱਦ ਕਰੋ ਦੇ ਨਾਅਰੇ ਵੀ ਲਗਾਏ।