ਗ੍ਰੀਨ ਕੋਰੀਡੋਰ ਰਾਹੀਂ ਚੰਡੀਗੜ੍ਹ ਤੋਂ ਦਿੱਲੀ ਪਹੁੰਚਾਏ ਗਏ ਦਿਲ ਨਾਲ ਮਰੀਜ਼ ਨੂੰ ਮਿਲੀ ਨਵੀਂ ਜ਼ਿੰਦਗੀ
ਸਿਰਫ਼ ਇਕ ਘੰਟੇ 55 ਮਿੰਟ ਵਿਚ ਚੰਡੀਗੜ੍ਹ ਤੋਂ ਰਾਸ਼ਟਰੀ ਰਾਜਧਾਨੀ ਲਿਜਾਇਆ ਗਿਆ
ਨਵੀਂ ਦਿੱਲੀ: ਦਿੱਲੀ ਦੇ ਸਰ ਗੰਗਾ ਰਾਮ ਹਸਪਤਾਲ ਵਿਚ ਦਿਲ ਦੀ ਗੰਭੀਰ ਬਿਮਾਰੀ ਤੋਂ ਪੀੜਤ 39 ਸਾਲਾ ਮੇਰਠ ਨਿਵਾਸੀ ਨੂੰ ਉਦੋਂ ਨਵੀਂ ਜ਼ਿੰਦਗੀ ਮਿਲੀ ਜਦੋਂ ਦਾਨੀ ਦੇ ਦਿਲ ਨੂੰ ਵੱਖ-ਵੱਖ ਗ੍ਰੀਨ ਕੋਰੀਡੋਰਾਂ ਰਾਹੀਂ ਸਿਰਫ਼ ਇਕ ਘੰਟੇ 55 ਮਿੰਟ ਵਿਚ ਚੰਡੀਗੜ੍ਹ ਤੋਂ ਰਾਸ਼ਟਰੀ ਰਾਜਧਾਨੀ ਲਿਜਾਇਆ ਗਿਆ। ਇਹ ਜੀਵਨ-ਰੱਖਿਅਕ ਟਰਾਂਸਪਲਾਂਟ 26 ਅਗੱਸਤ ਨੂੰ ਕੀਤਾ ਗਿਆ ਸੀ। ਹਸਪਤਾਲ ਦੇ ਅਧਿਕਾਰੀਆਂ ਨੇ ਬੁਧਵਾਰ ਨੂੰ ਕਿਹਾ ਕਿ ਦੋ ਰਾਜਾਂ ਵਿਚੋਂ ਦਿਲ ਨੂੰ ਸੁਰੱਖਿਅਤ ਅਤੇ ਅਨੁਕੂਲ ਸਥਿਤੀ ਵਿਚ ਲਿਆਉਣ ਨਾਲ ਸਰਜਰੀ ਦੀ ਸਫ਼ਲਤਾ ਦੀਆਂ ਸੰਭਾਵਨਾਵਾਂ ਬਹੁਤ ਵੱਧ ਗਈਆਂ ਹਨ। ਮਰੀਜ਼ ਪਿਛਲੇ ਚਾਰ ਸਾਲਾਂ ਤੋਂ ਫੈਲੇ ਹੋਏ ਕਾਰਡੀਓਮਾਇਓਪੈਥੀ, ਗੰਭੀਰ ਮਾਈਟਰਲ ਵਾਲਵ ਲੀਕ ਤੋਂ ਪੀੜਤ ਸੀ ਅਤੇ ਸਾਹ ਲੈਣ ਵਿਚ ਵੀ ਮੁਸ਼ਕਲ ਆ ਰਹੀ ਸੀ। ਉਸਨੂੰ ਇਲਾਜ ਲਈ ਕਈ ਵਾਰ ਆਈਸੀਯੂ ਵਿਚ ਦਾਖ਼ਲ ਕਰਵਾਉਣਾ ਪਿਆ। ਜਦੋਂ ਉਸਨੂੰ ਪਿਛਲੇ ਮਹੀਨੇ ਨੈਸ਼ਨਲ ਆਰਗਨ ਐਂਡ ਟਿਸ਼ੂ ਟਰਾਂਸਪਲਾਂਟ ਆਰਗੇਨਾਈਜ਼ੇਸ਼ਨ (ਨੋਟੋ) ਨਾਲ ਰਜਿਸਟਰ ਕੀਤਾ ਗਿਆ ਸੀ, ਤਾਂ ਉਸਨੂੰ ਚੰਡੀਗੜ੍ਹ ਵਿਚ ਉਪਲਬਧ ਦਾਨੀ ਦਿਲ ਲਈ ਚੁਣਿਆ ਗਿਆ ਸੀ।
ਡਾ. ਸੁਜੈ ਸ਼ਾਦ, ਸੀਨੀਅਰ ਸਲਾਹਕਾਰ ਅਤੇ ਡਾਇਰੈਕਟਰ, ਕਾਰਡੀਓਥੋਰਾਸਿਕ ਅਤੇ ਵੈਸਕੂਲਰ ਸਰਜਰੀ ਵਿਭਾਗ ਦੀ ਅਗਵਾਈ ਵਿਚ ਮਾਹਰਾਂ ਦੀ ਟੀਮ ਨੇ ਸਫ਼ਲਤਾਪੂਰਵਕ ਟਰਾਂਸਪਲਾਂਟ ਕੀਤਾ। ਡਾਕਟਰਾਂ ਦੇ ਅਨੁਸਾਰ, ਮਰੀਜ਼ ਨੂੰ ਸਰਜਰੀ ਦੇ 18 ਘੰਟਿਆਂ ਦੇ ਅੰਦਰ ਵੈਂਟੀਲੇਟਰ ਤੋਂ ਹਟਾ ਦਿਤਾ ਗਿਆ ਅਤੇ ਉਸ ਨੇ ਹੁਣ ਹਲਕੇ ਕੰਮ ਸ਼ੁਰੂ ਕਰ ਦਿਤੇ ਹਨ। ਡਾ. ਸ਼ਾਦ ਨੇ ਕਿਹਾ, ‘‘ਦੋ ਘੰਟਿਆਂ ਤੋਂ ਵੀ ਘੱਟ ਸਮੇਂ ਵਿਚ ਸਾਡੇ ਤਕ ਦਿਲ ਦਾ ਪਹੁੰਚਣਾ ਇਸ ਸਰਜਰੀ ਦੀ ਸਫ਼ਲਤਾ ਵਿਚ ਇਕ ਨਿਰਣਾਇਕ ਕਾਰਕ ਸੀ।’’