ਇਤਿਹਾਸ ਦੀ ਕਿਤਾਬ ਨਾਲ ਛੇੜਛਾੜ ਦਾ ਮਾਮਲਾ: ਮਾਮਲੇ ਨੂੰ ਜਲਦ ਸੁਲਝਾਇਆ ਜਾਵੇਗਾ- ਵਿਧਾਇਕ ਮਨਜਿੰਦਰ ਲਾਲਪੁਰਾ

 ਮੁਹਾਲੀ : ਸਿੱਖ ਇਤਿਹਾਸ ਨਾਲ ਕੀਤੀ ਗਈ ਛੇੜਛਾੜ ਵਾਲੀਆਂ ਕਿਤਾਬਾਂ ਦੇ ਅਹਿਮ ਤੇ ਸੰਵੇਦਨਸ਼ੀਲ ਮੁੱਦੇ ਨੂੰ ਲੈ ਕੇ ਚਲ ਰਹੇ ਰੋਸ ਧਰਨੇ ਵਿੱਚ ਅੱਜ ਖਡੂਰ ਸਾਹਿਬ ਹਲਕੇ ਦੇ ਵਿਧਾਇਕ ਮਨਜਿੰਦਰ ਸਿੰਘ ਲਾਲਪੁਰਾ ਨੇ ਵਿਸ਼ੇਸ਼ ਕਰਕੇ ਹਾਜ਼ਰੀ ਭਰੀ। ਰੋਸ ਧਰਨੇ ਦੇ ਸਪਰੀਮੋ ਕਿਸਾਨ ਆਗੂ ਬਲਦੇਵ ਸਿੰਘ ਸਿਰਸਾ ਨੇ ਕਿਤਾਬਾਂ ਵਿਚ ਪੰਜਾਬ ਖਾਸ ਕਰਕੇ ਸਿੱਖ ਇਤਿਹਾਸ ਦੀ ਕੀਤੀ ਗ਼ਲਤ ਬਿਆਨੀ ਬਾਰੇ ਵਿਸਥਾਰ ਪੂਰਵਕ ਦੱਸਿਆ ਤਾਂ ਵਿਧਾਇਕ ਮਨਜਿੰਦਰ ਸਿੰਘ ਲਾਲਪੁਰਾ ਨੇ ਇਤਿਹਾਸਕ ਇਸ ਬਜਰ ਗ਼ਲਤ ਬਿਆਨੀ ਤੇ ਦੁੱਖ ਜ਼ਾਹਰ ਕਰਦਿਆਂ ਵਿਸ਼ਵਾਸ ਦਿਵਾਇਆ ਕਿ ਸਰਕਾਰ ਨੂੰ ਜ਼ੋਰ ਕੇ ਕਿਹਾ ਜਾਵੇਗਾ ਕਿ ਇਸ ਵਿਵਾਦਿਤ ਮਾਮਲੇ ਛੇਤੀ ਤੋਂ ਛੇਤੀ ਸੁਲਝਾਇਆ ਜਾਵੇ।

ਪਰ ਸਿਰਸਾ ਨੇ ਇਸ ਦੌਰਾਨ ਸਰਕਾਰ ਨੂੰ ਚੇਤਾਵਨੀ ਦਿੰਦਿਆਂ ਤਾੜਨਾ ਵੀ ਕੀਤੀ ਕਿ ਜੇਕਰ 15 ਮਈ ਤੱਕ ਇਤਿਹਾਸ ਦੀ ਗ਼ਲਤ ਬਿਆਨੀ ਕਰਨ ਵਾਲੀਆਂ ਕਿਤਾਬਾਂ ਦੇ ਲਿਖਾਰੀਆਂ, ਪ੍ਰਕਾਸ਼ਕਾਂ ਤੇ ਹੋਰ ਸੰਬੰਧਿਤ ਦੋਸ਼ੀਆਂ ਤੇ ਕਾਨੂੰਨੀ ਚਾਰਾਜੋਈ ਕਰਦਿਆਂ ਪਰਚੇ ਦਰਜ ਕੀਤੇ ਜਾਣ ਨਹੀਂ ਤਾਂ 16 ਮਈ ਨੂੰ ਪੰਜਾਬ ਸਕੂਲ ਸਿੱਖਿਆ ਬੋਰਡ ਮੁਹਾਲੀ ਦੇ ਗੇਟ ਪੂਰਨ ਤੌਰ 'ਤੇ ਅਣਮਿਥੇ ਸਮੇਂ ਲਈ ਬੰਦ ਕਰ ਦਿੱਤੇ ਜਾਣਗੇ। ਜਿਸ ਦੀ ਜ਼ਿੰਮੇਵਾਰੀ ਸਥਾਨਕ ਪ੍ਰਸ਼ਾਸਨ ਤੇ ਮੌਜੂਦਾ ਪੰਜਾਬ ਸਰਕਾਰ ਦੀ ਹੋਵੇਗੀ। ਅੱਜ ਦੇ ਧਰਨੇ ਵਿੱਚ ਪਿੰਡ ਕੰਬਾਲਾ ਦੀ ਸੰਗਤ ਵਲੋਂ ਲੰਗਰ ਦੀ ਸੇਵਾ ਕੀਤੀ ਗਈ।

ਇਸੇ ਦੌਰਾਨ  ਬੇਰੋਜ਼ਗਾਰ ਡਿਗਰੀਆਂ ਹੋਲਡਰ ਨੌਜਵਾਨਾਂ ਨੇ ਆਪਣੇ ਦੁੱਖੜੇ ਫਰੋਲਦਿਆਂ ਕਿਹਾ ਕਿ ਅਸੀਂ ਸਖ਼ਤ ਘਾਲਣਾ ਨਾਲ ਕਈ ਸਾਲ ਗਾਲ ਕੇ ਆਲ ਇੰਡੀਆ ਕਾਊਂਸਲ  ਫਾਰ ਟੈਕਨੀਕਲ ਦੇ ਅਧੀਨ ਬੈਚੂਲਰ ਆਫ ਫਾਈਨ ਆਰਟਸ ਅਤੇ ਮਾਸਟਰ ਆਫ ਫਾਈਨ ਆਰਟਸ  ਡਿਗਰੀਆਂ ਹਾਸਲ ਕੀਤੀਆਂ ਪਰ ਪਿਛਲੀ ਕਾਂਗਰਸ ਸਰਕਾਰ ਵੱਲੋਂ ਉਕਤ ਡਿਗਰੀਆਂ ਨੂੰ ਦਰਕਿਨਾਰ ਕਰਦਿਆਂ ਨੋਟੀਫਿਕੇਸ਼ਨ ਜਾਰੀ ਕਰਕੇ ਆਰਟਸ  ਐਂਡ ਕਰਾਫਟ ਅਧਿਆਪਕਾਂ ਦੀ ਸੂਚੀ ਵਿਚੋਂ ਸਾਨੂੰ ਬਾਹਰ  ਕੱਢ ਦਿੱਤਾ ਗਿਆ ਜੋ ਅਸਾਮੀਆਂ ਵਿਚ ਉਕਤ ਡਿਗਰੀਆਂ ਨੂੰ ਬਾਹਰ ਰੱਖ ਕੇ ਸਾਡੇ ਨਾਲ ਇੱਕ ਵੱਡਾ ਧੱਕਾ ਤੇ ਬੇਇਨਸਾਫ਼ੀ ਹੈ।

ਜਦਕਿ ਭਾਰਤ ਦੇ ਬਾਕੀ  ਸੂਬਿਆਂ ਸਮੇਤ ਦਿੱਲੀ ਵਿਚ ਉਕਤ ਡਿਗਰੀ ਹੋਲਡਰਾਂ  ਨੂੰ ਬਕਾਇਦਾ ਆਰਟਸ ਐਂਡ ਕਰਾਫਟ ਅਧਿਆਪਕ ਵਜੋਂ ਰੁਜ਼ਗਾਰ ਦਿੱਤਾ ਹੋਇਆ ਤੇ ਲੋੜ ਅਨੁਸਾਰ ਦਿੱਤਾ ਵੀ ਜਾ ਰਿਹਾ ਹੈ।ਇਸ ਮਾਮਲੇ 'ਤੇ ਵੀ ਕਿਸਾਨ ਆਗੂ ਬਲਦੇਵ ਸਿੰਘ ਸਿਰਸਾ ਤੇ ਵਿਧਾਇਕ ਮਨਜਿੰਦਰ ਸਿੰਘ ਲਾਲਪੁਰਾ ਨੇ  ਪੰਜਾਬ ਦੀ ਆਪ ਸਰਕਾਰ ਨੂੰ ਹਮਦਰਦੀ  ਨਾਲ  ਵਿਚਾਰ ਕਰਦਿਆਂ ਪੜੇ ਲਿਖੇ ਨੌਜਵਾਨਾਂ ਨੂੰ ਉਨ੍ਹਾਂ ਦੀ ਵਿਦਿਅਕ ਲਿਆਕਤ ਅਨੁਸਾਰ ਰੋਜ਼ਗਾਰ ਦੇਣ ਦੀ ਪੁਰਜ਼ੋਰ  ਅਪੀਲ ਕੀਤੀ ।