ਏ.ਵੇਣੂ ਪ੍ਰਸ਼ਾਦ ਨੂੰ ਮਿਲਿਆ ਪਾਵਰ ਕਾਰਪੋਰੇਸ਼ਨ ਦੇ ਚੇਅਰਮੈਨ ਦਾ ਚਾਰਜ

ਚੰਡੀਗੜ੍ਹ, 5 ਜੂਨ (ਗੁਰਉਪਦੇਸ਼ ਭੁੱਲਰ): ਸੀਨੀਅਰ ਆਈ.ਏ.ਐਸ. ਅਧਿਕਾਰੀ ਏ. ਵੇਣੂ ਪ੍ਰਸ਼ਾਦ ਨੂੰ ਪੰਜਾਬ ਪਾਵਰ ਕਾਰਪੋਰੇਸ਼ਨ ਦੇ ਚੇਅਰਮੈਨ ਦਾ ਐਡੀਸ਼ਨਲ ਚਾਰਜ ਦਿਤਾ ਗਿਆ ਹੈ। ਉਹ ਬਿਜਲੀ ਵਿਭਾਗ ਦੇ ਪ੍ਰਮੁੱਖ ਸਕੱਤਰ ਵੀ ਹਨ। ਵਰਣਨਯੋਗ ਹੈ ਕਿ ਪਾਵਰਕਾਮ ਦੇ ਮੌਜੂਦਾ ਚੇਅਰਮੈਨ ਬੀ.ਐਸ. ਸਰਾਓ ਦਾ ਕਾਰਜਕਾਲ ਅੱਜ ਖ਼ਤਮ ਹੋ ਰਿਹਾ ਸੀ। ਭਾਵੇਂ ਉਨ੍ਹਾਂ ਨੂੰ ਕਾਰਗੁਜ਼ਾਰੀ ਦੇ ਆਧਾਰ 'ਤੇ ਸੇਵਾ ਕਾਲ 'ਚ ਹੋਰ ਵਾਧਾ ਮਿਲਣ ਦੇ ਚਰਚੇ ਸਨ

ਪਰ ਇਸ ਤਰ੍ਹਾਂ ਨਹੀਂ ਹੋਇਆ। ਸਰਾਓ ਨੇ ਅੱਜ ਅਪਣੀ ਸੇਵਾ ਮੁਕਤੀ ਮੌਕੇ ਇਕ ਪੱਤਰ ਲਿਖ ਕੇ ਸੱਭ ਦਾ ਉਨ੍ਹਾਂ ਨੂੰ ਮਿਲੇ ਸਹਿਯੋਗ ਲਈ ਧਨਵਾਦ ਕੀਤਾ ਹੈ। ਇਸੇ ਦੌਰਾਨ ਪਤਾ ਲਗਾ ਹੈ ਕਿ ਫ਼ਿਲਹਾਲ ਪਾਵਰਕਾਮ ਦੇ ਚੇਅਰਮੈਨ ਅਤੇ ਐਮ.ਡੀ. ਦਾ ਕੰਮ ਏ. ਵੇਣੂਪ੍ਰਸ਼ਾਦ ਹੀ ਵੇਖਣਗੇ ਅਤੇ ਨਵੇਂ ਚੇਅਰਮੈਨ ਦੀ ਨਿਯੁਕਤੀ ਲਈ ਸਰਕਾਰ ਇਸ਼ਤਿਹਾਰ ਜਾਰੀ ਕਰੇਗੀ। ਇਸ ਤੋਂ ਬਾਅਦ ਨਿਯਮਾਂ ਮੁਤਾਬਕ ਨਵਾਂ ਚੇਅਰਮੈਨ ਲਗੇਗਾ।