ਝੂਠਾਂ ਦੀ ਬੁਨਿਆਦ ਨਿਜੀ ਹਿਤਾਂ ਲਈ ਕੈਪਟਨ ਨੇ ਹੀ ਰੱਖੀ : ਸੁਮੇਧ ਸੈਣੀ

ਚੰਡੀਗੜ੍ਹ  (ਗੁਰਉਪਦੇਸ਼ ਭੁੱਲਰ) : ਪੰਜਾਬ ਕਾਂਗਰਸ ਪ੍ਰਧਾਨ ਨਵਜੋਤ ਸਿੱਧੂ ਵਲੋਂ ਅੱਜ ਇਥੇ ਪ੍ਰੈੱਸ ਕਾਨਫ਼ਰੰਸ ’ਚ ਸਾਬਕਾ ਡੀ.ਜੀ.ਪੀ. ਸੁਮੇਧ ਸੈਣੀ ਤੇ ਮੌਜੂਦਾ ਡੀ.ਜੀ.ਪੀ. ਸਹੋਤਾ ਨੂੰ ਲੈ ਕੇ ਕੀਤੀਆਂ ਟਿਪਣੀਆਂ ਦੇ ਜਵਾਬ ’ਚ ਸੁਮੇਧ ਸੈਣੀ ਦਾ ਪ੍ਰਤੀਕਰਮ ਵੀ ਆਇਆ ਹੈ।

ਇਕ ਟੀ.ਵੀ. ਚੈਨਲ ਨਾਲ ਗੱਲਬਾਤ ’ਚ ਸੈਣੀ ਨੇ ਕਿਹਾ ਕਿ ਸਿੱਧੂ ਦੀਆਂ ਸਿਆਸੀ ਮਜਬੂਰੀਆਂ ਕਾਰਨ ਉਸ ਬਾਰੇ ਗੱਲ ਕਰਨ ਦੀ ਲੋੜ ਨਹੀਂ ਪਰ ਉਨ੍ਹਾਂ ਸਾਬਕਾ ਮੁੱਖ ਮੰਤਰੀ ਕੈਪਟਨ ਅਮਰਿੰਦਰ ਸਿੰਘ ਨੂੰ ਲੈ ਕੇ  ਸਵਾਲ ਚੁੱਕੇ ਤੇ ਟਿਪਣੀਆਂ ਕੀਤੀਆਂ ਹਨ। ਸੈਣੀ ਨੇ ਕਿਹਾ ਕਿ ਝੂਠਾਂ ਦੀ ਬੁਨਿਆਦ ਅਪਣੇ ਸਵਾਰਥੀ ਤੇ ਨਿਜੀ ਹਿਤਾਂ ਖ਼ਾਤਰ ਕੈਪਟਨ ਅਮਰਿੰਦਰ ਸਿੰਘ ਨੇ ਹੀ ਰੱਖੀ।

ਇਸ ਨਾਲ ਗਰਮ ਖਿਆਲੀਆਂ ਨੂੰ ਹੱਲਾਸ਼ੇਰੀ ਮਿਲੀ ਅਤੇ ਅੱਜ ਇਸ ਕਾਰਨ ਇਕ ਵਰਗ ਅਪਣੇ ਆਪ ਨੂੰ ਅਸੁਰਖਿਅਤ ਮਹਿਸੂਸ ਕਰ ਰਿਹਾ ਹੈ। ਸੈਣੀ ਨੇ ਅਰੂਸਾ ਆਲਮ ਬਾਰੇ ਵੀ ਕਿਹਾ ਕਿ ਉਸ ਦੀ ਹਕੀਕਤ ਸਾਰੇ ਜਾਣਦੇ ਹਨ। ਸੂਬੇ ਦੇ ਹਿਤਾਂ ਵਿਰੁਧ ਹੋ ਰਹੀਆਂ ਕਰਤੂਤਾਂ ਰੋਕਣ ਦੀ ਲੋੜ ਹੈ। ਸੈਣੀ ਨੇ ਇਹ ਵੀ ਕਿਹਾ ਕਿ ਉਹ ਛੇਤੀ ਹੀ ਪੂਰੇ ਤੱਥਾਂ ਤੇ ਸਬੂਤਾਂ ਸਮੇਤ ਸਾਰੀ ਜਾਣਕਾਰੀ ਨੂੰ ਜਨਤਕ ਕਰਨ ਲਈ ਕਈ ਭੇਤ ਖੋਲ੍ਹਣਗੇ।