ਕਾਂਗਰਸ ਦੇ ਕਿਲ੍ਹੇ 'ਚੋਂ ਹੀ ਮੁਹੰਮਦ ਸਦੀਕ ਵਿਰੁਧ ਉਠੀ ਬਗ਼ਾਵਤ, ਬਾਈਕਾਟ ਦਾ ਐਲਾਨ

ਕੋਟਕਪੂਰਾ : ਕਾਂਗਰਸ ਹਾਈਕਮਾਂਡ ਨੇ ਪੰਜਾਬ ਵਿਧਾਨ ਸਭਾ ਚੋਣਾਂ ਮੌਕੇ ਮੁਹੰਮਦ ਸਦੀਕ ਅਤੇ ਜੋਗਿੰਦਰ ਸਿੰਘ ਪੰਜਗਰਾਂਈ ਦੀਆਂ ਵਿਧਾਨ ਸਭਾ ਸੀਟਾਂ ਦੀਆਂ ਰਾਖਵੇਂ ਹਲਕਿਆਂ ਭਦੌੜ ਅਤੇ ਜੈਤੋ ਤੋਂ ਟਿਕਟਾਂ ਦੀ ਅਦਲਾ ਬਦਲੀ ਕੀਤੀ ਤਾਂ ਦੋਨੋਂ ਥਾਵਾਂ ਤੋਂ ਕਾਂਗਰਸ ਨੂੰ ਹਾਰ ਦਾ ਮੂੰਹ ਦੇਖਣਾ ਪਿਆ। ਇਮਾਨਦਾਰ ਤੇ ਦਰਵੇਸ਼ ਸ਼ਖਸ਼ੀਅਤ ਵਜੋਂ ਜਾਣੇ ਜਾਂਦੇ ਮੁਹੰਮਦ ਸਦੀਕ ਨੇ ਤਾਂ ਭਦੌੜ ਹਲਕੇ 'ਚ ਦਖ਼ਲਅੰਦਾਜੀ ਬਿਲਕੁੱਲ ਨਾ ਕੀਤੀ ਜਦਕਿ ਜੋਗਿੰਦਰ ਸਿੰਘ ਪੰਜਗਰਾਂਈ ਦੋਨਾਂ ਹਲਕਿਆਂ 'ਚ ਦਖ਼ਲਅੰਦਾਜੀ ਹੀ ਨਹੀਂ ਬਲਕਿ ਦਬਦਬਾ ਬਣਾ ਕੇ ਰੱਖਣ ਦੀ ਕੋਸ਼ਿਸ਼ 'ਚ ਰਿਹਾ। 

ਕੁਝ ਕੁ ਆਗੂ ਜੋਗਿੰਦਰ ਸਿੰਘ ਪੰਜਗਰਾਂਈ ਦੀ ਸ਼ਹਿ 'ਤੇ ਮੁਹੰਮਦ ਸਦੀਕ ਦਾ ਜੈਤੋ ਹਲਕੇ 'ਚ ਬੇਲੋੜਾ ਵਿਰੋਧ ਕਰਦੇ ਰਹੇ ਪਰ ਜੋਗਿੰਦਰ ਸਿੰਘ ਦੇ ਅਕਾਲੀ ਦਲ 'ਚ ਸ਼ਾਮਲ ਹੋ ਜਾਣ ਤੋਂ ਬਾਅਦ ਅਪਣੀ ਹੋਂਦ ਬਚਾਉਣ 'ਚ ਰੁੱਝ ਗਏ, ਹੁਣ ਪਾਰਟੀ ਹਾਈਕਮਾਂਡ ਵਲੋਂ ਜਦੋਂ ਲੋਕ ਸਭਾ ਹਲਕੇ ਫ਼ਰੀਦਕੋਟ ਤੋਂ ਮੁਹੰਮਦ ਸਦੀਕ ਦੇ ਨਾਮ ਦਾ ਐਲਾਨ ਕੀਤਾ ਗਿਆ ਤਾਂ ਉਨਾਂ ਅਪਣੀ ਹੋਂਦ ਦਰਸਾਉਣ ਲਈ ਮੁਹੰਮਦ ਸਦੀਕ ਦੇ ਵਿਰੋਧ ਦਾ ਐਲਾਨ ਕਰ ਦਿਤਾ। 

ਪਾਰਟੀ ਦੇ ਜ਼ਿਲ੍ਹਾ ਪ੍ਰ੍ਰਧਾਨ ਅਜੈਪਾਲ ਸਿੰਘ ਸੰਧੂ ਨੇ ਇਸ ਨੂੰ ਪਾਰਟੀ ਦਾ ਅੰਦਰੂਨੀ ਮਾਮਲਾ ਦਸਦਿਆਂ ਆਖਿਆ ਕਿ ਉਕਤ ਵਿਵਾਦ ਜਲਦ ਸੁਲਝਾਅ ਲਿਆ ਜਾਵੇਗਾ ਪਰ ਪਤਾ ਲੱਗਾ ਹੈ ਕਿ ਉਕਤ ਆਗੂ ਇਸ ਸਟੈਂਡ ਬਦਲੇ ਬੁਰੀ ਤਰ੍ਹਾਂ ਫਸ ਸਕਦੇ ਹਨ, ਕਿਉਂਕਿ ਕੈਪਟਨ ਅਮਰਿੰਦਰ ਸਿੰਘ ਨੇ ਬਾਗ਼ੀਆਂ ਨੂੰ ਮਨਾਉਣ ਦੀ ਬਜਾਇ ਪਾਰਟੀ ਤੋਂ ਬਾਹਰ ਦਾ ਰਸਤਾ ਦਿਖਾਉਣ ਦੀ ਹਦਾਇਤ ਕੀਤੀ ਹੋਈ ਹੈ।

ਨਹਿਰੂ ਪਾਰਕ ਜੈਤੋ ਵਿਖੇ ਜੁੜੇ ਕੁਝ ਕੁ ਜੋਗਿੰਦਰ ਪੰਜਗਰਾਂਈ ਦੇ ਸਮਰਥਕਾਂ ਨੇ ਇਕਮਤ ਹੁੰਦਿਆਂ ਮੁਹੰਮਦ ਸਦੀਕ ਦਾ ਬਾਈਕਾਟ ਕਰ ਕੇ ਉਸ ਦੀ ਕਾਰਗੁਜ਼ਾਰੀ ਨੂੰ ਲੋਕਾਂ 'ਚ ਪ੍ਰਚਾਰਨ ਲਈ ਮੁਹਿੰਮ ਵਿੱਢਣ ਦਾ ਐਲਾਨ ਕਰ ਦਿਤਾ। ਉਨ੍ਹਾਂ ਗੰਭੀਰ ਦੋਸ਼ ਲਾਉਂਦਿਆਂ ਆਖਿਆ ਕਿ ਮੁਹੰਮਦ ਸਦੀਕ ਦੇ ਦਾਮਾਦ ਸੂਰਜ ਭਾਰਦਵਾਜ ਦੀ ਸਵੈ-ਮੁਖੀ ਪਹੁੰਚ ਅਤੇ ਲਾਲਚੀ ਪ੍ਰਵਿਰਤੀ ਸਦਕਾ ਪੰਚਾਇਤੀ ਚੋਣਾਂ 'ਚ ਕਾਂਗਰਸ ਦੀ ਬਜਾਇ ਵਿਰੋਧੀ ਦਲਾਂ ਦੇ ਉਮੀਦਵਾਰਾਂ ਦੀ ਮਦਦ ਕੀਤੀ।