ਕੇਂਦਰ ਦੇ ਮੰਤਰੀ ਸੂਬੇ ਵਿਚ ਹਿੰਸਾ ਭੜਕਾ ਰਹੇ ਨੇ, ਉਨ੍ਹਾਂ ਦੇ ਵਾਰ-ਵਾਰ ਇਥੇ ਆਉਣ ਕਾਰਨ ਕੋਰੋਨਾ ਵਧ ਗਿਆ
ਕੋਲਕਾਤਾ, 6 ਮਈ : ਪਛਮੀ ਬੰਗਾਲ ਵਿਚ ਚੋਣਾਂ ਤੋਂ ਬਾਅਦ ਹਿੰਸਾ ਦਾ ਸਿਲਸਿਲਾ ਅਜੇ ਵੀ ਜਾਰੀ ਹੈ | ਵੀਰਵਾਰ ਸਵੇਰੇ ਕੇਂਦਰੀ ਮੰਤਰੀ ਮੁਰਲੀਧਰਨ ਦੇ ਕਾਫ਼ਲੇ 'ਤੇ ਹੋਏ ਹਮਲੇ ਤੋਂ ਬਾਅਦ ਰਾਜ ਦੀ ਮੁੱਖ ਮੰਤਰੀ ਮਮਤਾ ਬੈਨਰਜੀ ਨੇ ਕੇਂਦਰ ਸਰਕਾਰ ਅਤੇ ਭਾਜਪਾ 'ਤੇ ਹਮਲਾ ਕੀਤਾ | ਮਮਤਾ ਨੇ ਕਿਹਾ ਕਿ ਚੋਣਾਂ ਖ਼ਤਮ ਹੋ ਗਈਆਂ ਹਨ, ਨਤੀਜਾ ਆ ਗਿਆ ਹੈ, ਪਰ ਭਾਜਪਾ ਦੇ ਮੰਤਰੀ ਹਾਰ ਮੰਨਣ ਨੂੰ ਤਿਆਰ ਨਹੀਂ | ਉਨ੍ਹਾਂ ਕਿਹਾ ਕਿ ਗ੍ਰਹਿ ਮੰਤਰਾਲੇ ਦੀ ਟੀਮ ਅਤੇ ਕੇਂਦਰ ਸਰਕਾਰ ਦੇ ਮੰਤਰੀ ਰਾਜ ਦਾ ਦੌਰਾ ਕਰ ਰਹੇ ਹਨ | ਕੇਂਦਰ ਸਰਕਾਰ ਦੇ ਮੰਤਰੀ ਬੰਗਾਲ ਵਿਚ ਹਿੰਸਾ ਫੈਲਾ ਰਹੇ ਹਨ | ਭਾਜਪਾ ਨੇਤਾ ਇਧਰ-ਉਧਰ ਘੁੰਮ ਰਹੇ ਹਨ | ਉਹ ਲੋਕਾਂ ਨੂੰ ਭੜਕਾ ਰਹੇ ਹਨ | ਨਵੀਂ ਸਰਕਾਰ ਆਉਣ ਨੂੰ ਅਜੇ 24 ਘੰਟੇ ਵੀ ਨਹੀਂ ਹੋਏ ਅਤੇ ਉਹ ਪੱਤਰ ਭੇਜ ਰਹੇ ਹਨ | ਭਾਜਪਾ ਅਜੇ ਵੀ ਲੋਕਾਂ ਦੇ ਫ਼ੈਸਲੇ ਨੂੰ ਸਵੀਕਾਰ ਕਰਨ ਤੋਂ ਅਸਮਰੱਥ ਹੈ |
ਮਮਤਾ ਨੇ ਕਿਹਾ ਕਿ ਭਾਜਪਾ ਚੋਣਾਂ ਤੋਂ ਬਾਅਦ ਵੀ ਜਨਤਾ ਦਾ ਫ਼ੈਸਲਾ ਮੰਨਣ ਲਈ ਤਿਆਰ ਨਹੀਂ | ਮੈਂ ਉਨ੍ਹਾਂ ਨੂੰ ਜਨਤਾ ਦੇ ਫ਼ੈਸਲੇ ਨੂੰ ਮੰਨਣ ਦੀ ਅਪੀਲ ਕਰਦੀ ਹਾਂ | ਮਮਤਾ ਇਥੇ ਹੀ ਨਾ ਰੁਕੀ, ਉਨ੍ਹਾਂ ਵਿਅੰਗ ਕਰਦੇ ਹੋਏ ਕਿਹਾ ਕਿ ਇਕ ਟੀਮ ਆਈ ਸੀ | ਉਨ੍ਹਾਂ ਚਾਹ ਪੀਤੀ ਅਤੇ ਵਾਪਸ ਚਲੇ ਗਏ |
ਉਸ ਦਾ ਇਸ਼ਾਰਾ ਕੇਂਦਰੀ ਟੀਮ 'ਤੇ ਸੀ, ਜੋ ਸੂਬੇ ਵਿਚ ਹਿੰਸਾ ਤੋਂ ਬਾਅਦ ਦੀ ਸਥਿਤੀ ਨੂੰ ਵੇਖਣ ਲਈ ਆਈ ਸੀ | ਮਮਤਾ ਨੇ ਕਿਹਾ ਕਿ ਹੁਣ ਜੇਕਰ ਕੇਂਦਰੀ ਮੰਤਰੀ ਆਉਂਦੇ ਹਨ ਤਾਂ ਉਨ੍ਹਾਂ ਨੂੰ ਵਿਸੇਸ ਉਡਾਣਾਂ ਲਈ ਆਰਟੀਪੀਸੀਆਰ ਨੈਗੇਟਿਵ ਰੀਪੋਰਟ ਵੀ ਲਿਆਉਣੀ ਪਏਗੀ | ਨਿਯਮ ਹਰ ਇਕ ਲਈ ਇਕੋ ਜਿਹੇ ਹੋਣੇ ਚਾਹੀਦੇ ਹਨ | ਭਾਜਪਾ ਨੇਤਾਵਾਂ ਦੇ ਵਾਰ-ਵਾਰ ਆਉਣ ਕਾਰਨ ਸੂਬੇ ਵਿਚ ਕੋਰੋਨਾ ਦੀ ਲਾਗ ਵੱਧ ਰਹੀ ਹੈ | (ਏਜੰਸੀ)