Mansa Gulzar Khan Punjabi Song Singing

ਮਾਨਸਾ: ਇਕ ਗਰੀਬ ਪਰਿਵਾਰ ਜੋ ਕਿ ਭਾਈ ਮਰਦਾਨੇ ਦੇ ਵੰਸ਼ ਵਿਚੋਂ ਹਨ, ਇਹਨਾਂ ਨੂੰ ਗੁਰੂ ਦੀ ਵੀ ਬਖ਼ਸ਼ਿਸ਼ ਹੈ ਕਿਉਂ ਕਿ ਇਹਨਾਂ ਦੀ ਆਵਾਜ਼ ਵਿਚ ਇਕ ਵੱਖਰਾ ਹੀ ਰਸ ਹੈ। ਇਸ ਪਰਿਵਾਰ ਦਾ ਇਕ ਵਿਅਕਤੀ ਜਿਸ ਦਾ ਨਾਮ ਗੁਲਜ਼ਾਰ ਖਾਨ ਹੈ ਅਤੇ ਉਸ ਦਾ ਬੇਟਾ ਦੋਵੇਂ ਗਾਇਕ ਹਨ।

ਉਸ ਦਾ ਬੇਟਾ 11ਵੀਂ ਜਮਾਤ ਵਿਚ ਪੜ੍ਹਦਾ ਹੈ। ਉਹਨਾਂ ਕੋਲ ਵਜਾਉਣ ਲਈ ਇਕ ਸਟੀਲ ਦਾ ਡੋਲੂ ਹੈ ਅਤੇ ਇਕ ਹੋਰ ਸਾਜ਼ ਹੈ। ਇਹਨਾਂ ਦੋਵਾਂ ਸਾਜ਼ਾਂ ਨਾਲ ਹੀ ਇਹ ਪੂਰਾ ਰੰਗ ਬੰਨ੍ਹ ਦਿੰਦੇ ਹਨ। ਇਹ ਪਰਿਵਾਰ ਕਿਰਾਏ ਦੇ ਮਕਾਨ ਤੇ ਰਹਿ ਰਿਹਾ ਹੈ। ਇਹ ਜਗਰਾਤਿਆਂ ਤੇ ਗਾ ਕੇ ਜਾਂ ਫਿਰ ਕੋਈ ਮਜ਼ਦੂਰੀ ਕਰ ਕੇ ਅਪਣਾ ਪਾਲਣ-ਪੋਸ਼ਣ ਕਰ ਰਹੇ ਹਨ। ਗੁਲਜ਼ਾਰ ਖਾਨ ਨੇ ਦਸਿਆ ਕਿ ਉਸ ਦੀ ਇਕ ਬੇਟੀ ਵੀ ਹੈ।

ਪੜ੍ਹਾਈ ਦੀ ਗਲ ਕਰਦਿਆਂ ਉਹਨਾਂ ਦਸਿਆ ਕਿ ਉਹ ਬਿਲਕੁੱਲ ਹੀ ਅਨਪੜ੍ਹ ਹਨ। ਛੋਟੇ ਹੁੰਦਿਆਂ ਉਹਨਾਂ ਦੇ ਮਾਤਾ-ਪਿਤਾ ਚਲ ਵਸੇ ਤੇ ਉਹਨਾਂ ਦਾ ਹੋਰ ਜ਼ਿੰਮੇਵਾਰੀਆਂ ਪੈ ਗਈਆਂ ਜਿਸ ਕਾਰਨ ਉਹਨਾਂ ਨੂੰ ਪੜ੍ਹਨ ਦਾ ਮੌਕਾ ਹੀ ਨਹੀਂ ਮਿਲਿਆ।

ਹੁਣ ਉਹ ਕਿਸੇ ਪੜ੍ਹੇ ਲਿਖੇ ਨੂੰ ਕੋਲ ਬਿਠਾ ਕੇ ਉਸ ਕੋਲੋਂ ਗੀਤ ਸੁਣ ਕੇ ਯਾਦ ਕਰ ਲੈਂਦੇ ਹਨ। ਉਹਨਾਂ ਦਸਿਆ ਕਿ ਉਹਨਾਂ ਨੂੰ ਕਦੇ ਸਟੇਜ ਤੇ ਗਾਉਣ ਦਾ ਮੌਕਾ ਨਹੀਂ ਮਿਲਿਆ ਕਿਉਂ ਕਿ ਉਹਨਾਂ ਨੂੰ ਅਜੇ ਤਕ ਅਜਿਹਾ ਵਿਅਕਤੀ ਨਹੀਂ ਮਿਲਿਆ ਜੋ ਕਿ ਉਹਨਾਂ ਨੂੰ ਅੱਗੇ ਲੈ ਕੇ ਜਾਵੇ।

ਇਸ ਭਿਆਨਕ ਬਿਮਾਰੀ ਦੇ ਦੌਰ ਵਿਚ ਉਹਨਾਂ ਦਾ ਕੰਮ ਠੱਪ ਹੋ ਕੇ ਰਹਿ ਗਿਆ ਹੈ ਇਸ ਲਈ ਉਹ ਹੁਣ ਤੂੜੀ ਜਾਂ ਹੋਰ ਕੋਈ ਦਿਹਾੜੀ ਕਰ ਕੇ ਘਰ ਦਾ ਗੁਜ਼ਾਰਾ ਕਰ ਰਹੇ ਹਨ ਅਤੇ ਇਸ ਦਿਹਾੜੀ ਜਾਂ ਮਜ਼ਦੂਰੀ ਵਿਚ ਉਹ 500 ਜਾਂ 300 ਕਮਾ ਲੈਂਦੇ ਹਨ। ਉਹਨਾਂ ਦਸਿਆ ਕਿ ਉਹ ਪੁਰਾਣੀ ਗਾਇਕੀ ਨੂੰ ਜ਼ਿਆਦਾ ਪਸੰਦ ਕਰਦੇ ਹਨ।

ਇਸ ਤੋਂ ਇਲਾਵਾ ਉਹਨਾਂ ਕਿਹਾ ਕਿ ਜੇ ਉਹਨਾਂ ਨੂੰ ਕੋਈ ਆਫਰ ਕੀਤੀ ਜਾਵੇ ਕਿ ਉਹ ਵੱਡੇ ਪੱਧਰ ਤੇ ਗਾਉਣ ਤਾਂ ਉਹ ਇਸ ਦਾ ਪੂਰਾ-ਪੂਰਾ ਲਾਭ ਲੈਣਗੇ। ਵਿਆਹ ਵਿਚ ਜਦੋਂ ਉਹਨਾਂ ਨੂੰ ਫਰਮਾਇਸ਼ ਕੀਤੀ ਜਾਂਦੀ ਹੈ ਕਿ ਉਹ ਗੀਤ ਗਾਉਣ ਤਾਂ ਉਹ ਵਿਆਹ ਵਰਗੇ ਸਮਾਗਮਾਂ ਵਿਚ ਵੀ ਗਾ ਲੈਂਦੇ ਹਨ।