Brave Young man Opened Modikhana Jalandhar

ਜਲੰਧਰ: ਗੁਰੂ ਨਾਨਕ ਮੋਦੀਖਾਨੇ ਦੀ ਸ਼ੁਰੂਆਤ ਲੁਧਿਆਣਾ ਵਿਚ ਹੋਈ ਸੀ ਤੇ ਹੁਣ ਇਹ ਅੰਮ੍ਰਿਤਸਰ ਮਹਿਤਾ ਰੋਡ ਤੇ ਖੁਲਣ ਜਾ ਰਿਹਾ ਹੈ। ਅੰਮ੍ਰਿਤਸਰ ਤੋਂ ਤਸਵੀਰਾਂ ਦਿਖਾਈਆਂ ਗਈਆਂ ਹਨ ਜਿਸ ਵਿਚ ਨਿਹੰਗਾਂ ਵੱਲੋਂ ਮੋਦੀਖਾਨੇ ਲਈ ਜ਼ਮੀਨ ਦਿੱਤੀ ਗਈ ਹੈ। ਕੁੱਝ ਹੀ ਦਿਨਾਂ ਵਿਚ ਗੁਰੂ ਨਾਨਕ ਮੋਦੀਖਾਨਾ ਤਿਆਰ ਕਰਨ ਦੀ ਸ਼ੁਰੂਆਤ ਕੀਤੀ ਜਾਵੇਗੀ।

ਅੰਮ੍ਰਿਤਸਰ ਨਿਵਾਸੀ ਇਸ ਮੋਦੀਖਾਨੇ ਤੋਂ ਸਸਤੇ ਰੇਟਾਂ ਤੇ ਦਵਾਈ ਲੈ ਸਕਣਗੇ। ਹੁਣ ਮੋਦੀਖਾਨੇ ਦੀ ਸ਼ੁਰੂਆਤ ਜਲੰਧਰ ਵਿਚ ਵੀ ਹੋ ਰਹੀ ਹੈ। ਇਹ ਮੋਦੀਖਾਨਾ ਮਨਸਿਮਰਨ ਸਿੰਘ ਵੱਲੋਂ ਖੋਲ੍ਹਿਆ ਜਾ ਰਿਹਾ ਹੈ। ਮਨਸਿਮਰਨ ਦਾ ਕਹਿਣਾ ਹੈ ਕਿ ਉਹਨਾਂ ਨੇ ਲੁਧਿਆਣਾ ਮੋਦੀਖਾਨੇ ਤੋਂ ਸੇਧ ਲੈਂਦੇ ਹੋਏ ਜਲੰਧਰ ਵਿਚ ਵੀ ਮੋਦੀਖਾਨਾ ਖੋਲ੍ਹਣ ਦਾ ਮਨ ਬਣਾਇਆ ਹੈ।

ਜੋ ਗਰੀਬ ਤਬਕਾ ਅਤੇ ਅਨਪੜ੍ਹ ਲੋਕ ਹਨ ਉਹਨਾਂ ਨਾਲ ਦਵਾਈਆਂ ਦੇ ਨਾਂ ਤੇ ਬਹੁਤ ਸਾਰੀਆਂ ਠੱਗੀਆਂ ਹੁੰਦੀਆਂ ਹਨ, ਇਕੋ ਜਿਹੀ ਦਵਾਈ 6-6 ਰੇਟਾਂ ਤੇ ਬਜ਼ਾਰ ਵਿਚ ਮੌਜੂਦ ਹੈ, ਵਿਅਕਤੀ ਅਨੁਸਾਰ ਦਵਾਈਆਂ ਦੇ ਰੇਟ ਲਗਾਏ ਜਾ ਰਹੇ ਹਨ। ਕਿਸੇ ਗਰੀਬ ਦਾ ਸ਼ੋਸ਼ਣ ਨਾ ਹੋਵੇ ਇਸ ਲਈ ਜਲੰਧਰ ਵਿਚ ਵੀ ਮੋਦੀਖਾਨਾ ਖੋਲ੍ਹਿਆ ਜਾ ਰਿਹਾ ਹੈ।

ਬਲਵਿੰਦਰ ਸਿੰਘ ਜਿੰਦੂ ਦੇ ਸੰਘਰਸ਼ ਨੂੰ ਦੇਖ ਕੇ ਉਹਨਾਂ ਨੂੰ ਇਹ ਵਿਚਾਰ ਆਇਆ ਕਿਉਂ ਕਿ ਉਹਨਾਂ ਦੇ ਮਨ ਵਿਚ ਸੀ ਕਿ ਦਵਾਈਆਂ ਦੀ ਕੀਮਤ ਤੇ ਕਿਵੇਂ ਮੋਰਚਾ ਖੋਲ੍ਹਿਆ ਜਾਵੇ ਪਰ ਉਹਨਾਂ ਨੇ ਹੁਣ ਰਸਤਾ ਵਿਖਾ ਦਿੱਤਾ ਹੈ ਤੇ ਇਸ ਵਿਚ ਲੋਕਾਂ ਨੂੰ ਅਪਣਾ ਸਹਿਯੋਗ ਜ਼ਰੂਰ ਦੇਣਾ ਚਾਹੀਦਾ ਹੈ।

ਉਹਨਾਂ ਅੱਗੇ ਦਸਿਆ ਕਿ ਉਹਨਾਂ ਦੇ ਸਟਾਫ ਵਿਚ ਚਾਰ ਸੇਲਜ਼ਮੈਨ ਹੋਣਗੇ ਤੇ ਇਕ ਨਰਸ ਹੋਵੇਗੀ ਤਾਂ ਜੋ ਲੋਕਾਂ ਨੂੰ ਸਹੀ ਡਰੈਸਿੰਗ ਦਿੱਤੀ ਜਾ ਸਕੇ। ਮੋਦੀਖਾਨੇ ਵਿਚ ਕਿਸੇ ਪ੍ਰਕਾਰ ਦਾ ਫਾਇਦਾ ਨਹੀਂ ਲਿਆ ਜਾਵੇਗਾ ਜਿੰਨੇ ਰੁਪਏ ਦੀ ਦਵਾਈ ਉਹਨਾਂ ਨੂੰ ਮਿਲੇਗੀ ਉਹ ਉੰਨੇ ਵਿਚ ਹੀ ਲੋਕਾਂ ਨੂੰ ਦੇਣਗੇ।

ਮਨਸਿਮਰਨ ਸਿੰਘ ਨੇ ਡਾਕਟਰਾਂ ਅਤੇ ਕੈਮਿਸਟਾਂ ਨੂੰ ਇਹੀ ਅਪੀਲ ਕੀਤੀ ਹੈ ਕਿ ਉਹ ਗਰੀਬ ਵਰਗ ਦਾ ਜ਼ਰੂਰ ਸੋਚਣ। ਜੇ ਉਹ ਦਵਾਈ ਵਿਚੋਂ ਨਫਾ ਕਮਾਉਂਦੇ ਵੀ ਹਨ ਤਾਂ ਸਿਰਫ 10 ਤੋਂ 20 ਪ੍ਰਤੀਸ਼ਤ ਹੋਣਾ ਚਾਹੀਦਾ ਹੈ ਜ਼ਿਆਦਾ ਮੁਨਾਫ਼ਾ ਖੱਟ ਕੇ ਗਰੀਬਾਂ ਦਾ ਸ਼ੋਸ਼ਣ ਨਾ ਕਰਨ।