ਦਖਣੀ ਆਸਟ੍ਰੇਲੀਆ ਅਤੇ ਵਿਕਟੋਰੀਆ 'ਚ ਕੋਰੋਨਾ ਨਾਲ 8 ਲੋਕਾਂ ਦੀ ਮੌਤ

ਸਿਨੇਮਾ, ਥਿਏਟਰ ਅਤੇ ਸਮਾਜਥ ਥਾਵਾਂ 'ਤੇ ਸਮਾਜਕ ਦੂਰੀ ਵਾਲੀਆਂ ਪਾਬੰਦੀਆਂ ਲਾਗੂ

ਸਿਡਨੀ, 7 ਜਨਵਰੀ : ਆਸਟ੍ਰੇਲੀਆ ਵਿਚ ਕੋਵਿਡ-19 ਦਾ ਕਹਿਰ ਜਾਰੀ ਹੈ | ਦਖਣੀ ਆਸਟ੍ਰੇਲੀਆ ਅਤੇ ਵਿਕਟੋਰੀਆ ਵਿਚ ਕੋਰੋਨਾ ਦੇ ਰਿਕਾਰਡ ਮਾਮਲੇ ਦਰਜ ਕੀਤੇ ਗਏ ਹਨ ਅਤੇ 8 ਲੋਕਾਂ ਦੀ ਮੌਤ ਹੋਈ ਹੈ | ਵਿਕਟੋਰੀਆ ਰਾਜ ਵਿਚ ਬੀਤੇ 24 ਘੰਟਿਆਂ ਦੌਰਾਨ ਕੋਰੋਨਾ ਦੇ ਨਵੇਂ 21,728 ਮਾਮਲੇ ਦਰਜ ਹੋਏ ਹਨ ਅਤੇ ਇਸ ਦੇ ਨਾਲ ਹੀ 6 ਮੌਤਾਂ ਹੋਣ ਦੀ ਪੁਸ਼ਟੀ ਕੀਤੀ ਗਈ ਹੈ | ਰਾਜ ਦੇ ਕੋਵਿਡ ਰਿਸਪਾਂਸ ਕਮਾਂਡਰ-ਜੈਰੋਨ ਵੇਮਰ ਨੇ ਜਾਣਕਾਰੀ ਦਿਤੀ | ਰਾਜ ਵਿਚ ਇਸੇ ਸਮੇਂ ਦੌਰਾਨ 644 ਕੋਰੋਨਾ ਪੀੜਤ ਹਸਪਤਾਲਾਂ ਵਿਚ ਜ਼ੇਰੇ ਇਲਾਜ ਹਨ, ਜਿਨ੍ਹਾਂ ਵਿਚੋਂ 58 ਆਈ.ਸੀ.ਯੂ. ਵਿਚ ਅਤੇ 24 ਵੈਂਟੀਲੇਟਰ 'ਤੇ ਹਨ |
ਕਾਰਜਕਾਰੀ ਪ੍ਰੀਮੀਅਰ ਜੈਸਿੰਟਾ ਐਲਨ ਵਲੋਂ ਇਕ ਵੈਬ ਪੇਜ ਜਾਰੀ ਕੀਤਾ ਗਿਆ ਹੈ ਜਿਥੇ ਕਿ ਰੈਪਿਡ ਐਂਟੀਜਨ ਟੈਸਟ ਕਰਨ ਵਾਲੇ ਲੋਕ ਜੇਕਰ ਕੋਰੋਨਾ ਪਾਜ਼ੇਟਿਵ ਹੁੰਦੇ ਹਨ ਤਾਂ ਆਪਣੀ ਜਾਣਕਾਰੀ ਅਪਲੋਡ ਕਰ ਸਕਦੇ ਹਨ | ਰਾਜ ਭਰ ਵਿਚ ਬੀਤੀ ਰਾਤ 11:59 ਤੋਂ ਬਾਅਦ ਨਵੀਆਂ ਪਾਬੰਦੀਆਂ ਲਾਗੂ ਕਰ ਦਿਤੀਆਂ ਗਈਆਂ, ਜਿਨ੍ਹਾਂ ਵਿਚ ਪ੍ਰਤੀ ਵਿਅਕਤੀ 2 ਵਰਗ ਮੀਟਰ ਦੀ ਥਾਂ ਵਾਲੀ ਸ਼ਰਤ ਲਾਗੂ ਹੋ ਗਈ ਹੈ ਅਤੇ ਇਸ ਦੇ ਨਾਲ ਹੀ ਸਿਨੇਮਾ ਅਤੇ ਥਿਏਟਰ ਵਾਲੀਆਂ ਥਾਵਾਂ ਵਿਰ ਵੀ ਮਾਸਕ ਪਾਉਣਾ ਅਤੇ ਸਮਾਜਕ ਦੂਰੀ ਵਾਲੀ ਸ਼ਰਤ ਲਾਗੂ ਕੀਤੀ ਗਈ ਹੈ |     
ਦਖਣੀ ਆਸਟ੍ਰੇਲੀਆ ਵਿਚ ਕੋਵਿਡ-19 ਦੇ 3707 ਮਾਮਲੇ ਦਰਜ ਕੀਤੇ ਗਏ ਹਨ ਅਤੇ ਵਾਇਰਸ ਨਾਲ ਸੰਕਰਮਣ ਕਾਰਨ ਦੋ ਹੋਰ ਲੋਕਾਂ ਦੀ ਮੌਤ ਹੋ ਗਈ ਹੈ | ਪ੍ਰੀਮੀਅਰ ਸਟੀਵਨ ਮਾਰਸ਼ਲ ਨੇ ਤਾਜ਼ਾ ਜਾਣਕਾਰੀ ਵਿਚ ਦਸਿਆ ਕਿ ਰਾਜ ਵਿਚ ਬੀਤੇ 48 ਘੰਟਿਆਂ ਦੌਰਾਨ ਕੋਰੋਨਾ ਦੇ ਨਵੇਂ 3,707 ਮਾਮਲੇ ਦਰਜ ਹੋਏ ਹਨ ਅਤੇ ਇਸ ਦੇ ਨਾਲ ਹੀ 2 ਮੌਤਾਂ ਹੋਣ ਦੀ ਵੀ ਪੁਸ਼ਟੀ ਕੀਤੀ | ਮਰਨ ਵਾਲਿਆਂ ਵਿਚ ਇਕ ਵਿਅਕਤੀ 60 ਦੇ ਦਹਾਕੇ ਅਤੇ ਦੂਜਾ 90 ਦੇ ਦਹਾਕੇ ਵਿਚ ਸੀ | ਉਨ੍ਹਾਂ ਦਸਿਆ ਕਿ ਇਸ ਸਮੇਂ ਕੁੱਲ 144 ਕੋਰੋਨਾ ਮਰੀਜ਼ ਹਸਪਤਾਲਾਂ ਵਿਚ ਭਰਤੀ ਹਨ ਅਤੇ ਇਹ ਗਿਣਤੀ ਵੀ ਬੀਤੇ ਦਿਨ ਦੀ 123 ਨਾਲੋਂ ਵਧੀ ਹੈ | ਇਨ੍ਹਾਂ ਮਰੀਜ਼ਾਂ ਵਿਚੋਂ 16 ਆਈ.ਸੀ.ਯੂ. ਵਿਚ ਹਨ ਅਤੇ 1 ਵੈਂਟੀਲੇਟਰ 'ਤੇ ਵੀ ਹੈ | ਉਨ੍ਹਾਂ ਇਹ ਵੀ ਦਸਿਆ ਕਿ ਹਸਪਤਾਲ ਵਿਚ ਭਰਤੀ ਜ਼ਿਆਦਾਤਰ ਲੋਕ, ਓਮੀਕਰੋਨ ਵੇਰੀਐਂਟ ਨਾਲ ਹੀ ਪੀੜਤ ਹਨ |    (ਏਜੰਸੀ)