ਮੋਟਰਸਾਈਕਲ ਦੀ ਟੱਕਰ ਪਿੱਛੋਂ ਕੁੱਟ ਕੇ ਵਿਅਕਤੀ ਦਾ ਕਤਲ

ਮਲਸੀਆਂ, 8 ਮਈ (ਅਮਨਦੀਪ ਸਹੋਤਾ): ਇਥੋਂ ਦੇ ਨਜ਼ਦੀਕੀ ਪਿੰਡ ਪਰਜੀਆਂ ਖੁਰਦ ਵਿਖੇ ਇਕ ਮਾਮੂਲੀ ਘਟਨਾ ਉਪਰੰਤ ਇਕ ਵਿਅਕਤੀ ਨੂੰ ਕੁੱਟ ਕੁੱਟ ਕੇ ਮਾਰ ਦੇਣ ਦਾ ਸਮਾਚਾਰ ਪ੍ਰਾਪਤ ਹੋਇਆ ਹੈ। ਥਾਣਾ ਸ਼ਾਹਕੋਟ ਵਿਚ ਮੁਲਜ਼ਮਾਂ ਵਿਰੁਧ ਪਰਚਾ ਦਰਜ ਕਰ ਲਿਆ ਗਿਆ ਹੈ ਅਤੇ ਮੁਲਜ਼ਮਾਂ ਦੀ ਭਾਲ ਜਾਰੀ ਹੈ। ਪ੍ਰਾਪਤ ਜਾਣਕਾਰੀ ਅਨੁਸਾਰ ਚਰਨਜੀਤ ਸਿੰਘ ਪੁੱਤਰ ਨਿਰਭੈਅ ਸਿੰਘ ਮੋਟਰ ਸਾਈਕਲ ਉਤੇ ਪਰਜੀਆਂ ਕਲਾਂ ਤੋਂ ਪਰਜੀਆਂ ਖੁਰਦ ਵਲ ਜਾ ਰਿਹਾ ਸੀ। ਪਿੰਡ ਪਰਜੀਆਂ ਖੁਰਦ ਦੇ ਨੇੜੇ ਸੜਕ  ਉਤੇ ਕਣਕ ਦੇ ਸਿੱਟੇ ਰੱਖੇ ਹੋਏ ਸਨ।

ਸਿੱਟਿਆ ਉੱਤੋਂ ਲੰਘਣ ਵੇਲੇ ਮੋਟਰ-ਸਾਈਕਲ ਡੋਲ ਗਿਆ। ਮੋਟਰ ਸਾਈਕਲ ਸੜਕ ਉਤੇ ਖਲੋਤੇ ਇਕ ਬਜ਼ੁਰਗ ਵਿਅਕਤੀ ਨਾਲ ਟਕਰਾ ਗਿਆ। ਐਨੇ ਨੂੰ ਉਸ ਬਜ਼ੁਰਗ ਦੇ ਹਮਾਇਤੀ ਘਟਨਾ ਸਥਾਨ ਉਤੇ ਪਹੁੰਚ ਗਏੇ। ਉਨ੍ਹਾਂ ਨੇ ਚਰਨਜੀਤ ਸਿੰਘ ਦੀ ਕੁੱਟ ਮਾਰ ਕਰਨੀ ਸ਼ੁਰੂ ਕਰ ਦਿਤੀ। ਸਿਰ ਵਿਚ ਰਾਡ ਵੱਜਣ ਨਾਲ ਚਰਨਜੀਤ ਸਿੰਘ ਦੀ ਮੌਤ ਹੋ ਗਈ। ਐਸ.ਐਚ.ਓ. ਸ਼ਾਹਕੋਟ ਸੁਰਿੰਦਰ ਕੁਮਾਰ ਵਲੋਂ ਦਿਤੀ ਜਾਣਕਾਰੀ ਅਨੁਸਾਰ ਸੰਦੀਪ ਸਿੰਘ ਅਤੇ ਗੁਰਮੀਤ ਸਿੰਘ ਵਿਰੁਧ ਧਾਰਾ 304 ਤਹਿਤ ਮਾਮਲਾ ਦਰਜ ਕਰ ਲਿਆ ਹੈ।