ਪਿੰਡ ਗੁਰੂਸਰ ਵਿਖੇ ਰਜਬਾਹਾ ਟੁੱਟ ਜਾਣ ਕਾਰਨ ਪਿਆ ਪਾੜ

ਦੋਦਾ, 8 ਮਈ (ਅਸ਼ੋਕ ਯਾਦਵ): ਜ਼ਿਲ੍ਹਾ ਸ੍ਰੀ ਮੁਕਤਸਰ ਸਾਹਿਬ ਦੀ ਸਬ-ਤਹਿਸੀਲ ਦੋਦਾ ਦੇ ਨਜ਼ਦੀਕੀ ਪਿੰਡ ਗੁਰੂਸਰ ਵਿਖੇ ਅੱਜ ਸਵੇਰੇ 6 ਵਜੇ ਰਜ਼ਬਾਹਾ ਟੁੱਟ ਜਾਣ, ਕਾਰਨ 20-25 ਫੁੱਟ ਚੌੜਾ ਪਾੜ ਪੈਣ ਕਾਰਨ ਖੇਤਾਂ ਵਿਚ ਪਾਣੀ ਭਰ ਗਿਆ। ਕਿਸਾਨ ਮੇਜ਼ਰ ਸਿੰਘ, ਮੁਖਤਿਆਰ ਸਿੰਘ, ਕੇਵਲ ਸਿੰਘ ਅਤੇ ਸੁੱਖ ਸਿੰਘ ਆਦਿ ਨੇ ਜਾÎਣਕਾਰੀ ਦਿੰਦੇ ਹੋਏ ਦਸਿਆ ਕਿ ਰਜਵਾਹੇ ਵਿਚ ਜ਼ਿਆਦਾ ਪਾਣੀ ਛੱਡਣ ਕਰ ਕੇ ਅਤੇ ਕਿਨਾਰੇ ਕੱਚੇ ਹੋਣ ਕਰਕੇ ਰਜਵਾਹਾ ਲਗਤਾਰ ਇਸ ਥਾਂ ਤੋਂ ਦੂਸਰੀ ਵਾਰ ਟੁੱਟ ਗਿਆ ਹੈ। ਇਸ ਕਰਕੇ ਕਿਸਾਨਾਂ ਦਾ ਹਰ ਵਾਰ ਨੁਕਸਾਨ ਹੁੰਦਾ ਹੈ। ਪਰ ਇਸ ਵਾਰ 30-35 ਏਕੜ ਕਣਕ ਦਾ ਨਾੜ ਪਾਣੀ ਵਿਚ ਡੁੱਬਣ ਕਰ ਕੇ ਕਿਸਾਨ ਅਪਣੇ ਪਸ਼ੂਆਂ ਲਈ ਤੂੜੀ ਬਣਾਉਣ ਤੋ ਵਾਜੇ ਰਹਿ ਗਏ ਹਨ। 

ਕਿਸਾਨਾਂ ਨੇ ਸਰਕਾਰ ਤੋ ਮੰਗ ਕੀਤੀ ਹੈ ਕਿ ਰਜਵਾਹੇ ਦੇ ਕਿਨਾਰੇ ਪੱਕੇ ਜਾਣ। ਇਸ ਤੋਂ ਇਲਾਵਾ ਉਨ੍ਹਾਂ ਦੇ ਖੇਤਾਂ ਵਿਚ 30-35 ਏਕੜ ਰਕਬੇ ਵਿਚ ਪਾਣੀ ਭਰ ਗਿਆ। ਜਿਸ ਨਾਲ ਕਣਕ ਦਾ ਨਾੜ ਖ਼ਰਾਬ ਹੋ ਗਿਆ। ਹੁਣ ਸਾਨੂੰ ਤੂੜੀ ਦੀ ਸਮੱਸਿਆ ਦਾ ਸਾਹਮਣਾ ਕਰਨਾ ਪੈ ਰਿਹਾ ਹੈ। ਮਹਿਕਮੇ ਦਾ ਫ਼ਰਜ਼ ਬਣਦਾ ਸੀ ਕਿ ਉਹ ਰਹਿੰਦੇ ਵਕਤ ਧਿਆਨ ਰਖਦਿਆਂ ਉਕਤ ਰਜ਼ਬਾਹੇ ਦੀ ਮੁਰੰਮਤ ਆਦਿ ਕਰਦਾ। ਉਨ੍ਹਾਂ ਜ਼ਿਲ੍ਹੇ ਦੇ ਡਿਪਟੀ ਕਮਿਸ਼ਨਰ ਨੂੰ ਅਪੀਲ ਕੀਤੀ ਕਿ ਇਸ ਅਣਗਹਿਲੀ ਨੂੰ ਸਾਹਮਣੇ ਰਖਦਿਆਂ ਮਹਿਕਮੇਂ ਤੋਂ ਸਾਡੇ ਹੋਏ ਨੁਕਸਾਨ ਦਾ ਸਾਨੂੰ ਮੁਆਵਜ਼ਾ ਦਵਾਇਆ ਜਾਵੇ।