ਵਿਭਾਗੀ ਬਦਲੀਆਂ ਦੀਆਂ ਬੇਨਤੀਆਂ ਤੋਂ ਤੰਗ ਆਏ ਸਿਹਤ ਮੰਤਰੀ ਜੌੜਾਮਾਜਰਾ, ਦਫਤਰ ਬਾਹਰ ਚਿਪਕਾਇਆ ਨੋਟਿਸ
ਸਿਵਲ ਸਕੱਤਰੇਤ ਦਫ਼ਤਰ ਦੇ ਬਾਹਰ ਲਗਾਇਆ ਨੋਟਿਸ -'ਬਦਲੀਆਂ ਬੰਦ ਹਨ, ਤੋਹਫ਼ੇ ਮਨਜ਼ੂਰ ਨਹੀਂ'
ਚੰਡੀਗੜ੍ਹ : ਸੂਬੇ ਵਿਚ ਆਮ ਆਦਮੀ ਪਾਰਟੀ ਦੀ ਸਰਕਾਰ ਬਣਨ ਮਗਰੋਂ ਰਿਸ਼ਵਤਖੋਰੀ ਅਤੇ ਭ੍ਰਿਸ਼ਟਾਚਾਰ ਵਿਰੁੱਧ ਸਾਰੇ ਹੀ ਵਜ਼ੀਰਾਂ ਨੇ ਕਮਰ ਕੱਸੀ ਹੋਈ ਹੈ। ਪਾਰਟੀ ਆਗੂਆਂ ਵਲੋਂ ਰਿਸ਼ਵਤਖੋਰੀ, ਸਿਫਾਰਿਸ਼ ਅਤੇ ਅਜਿਹੀਆਂ ਹੋਰ ਭ੍ਰਿਸ਼ਟਾਚਾਰ ਵਾਲਿਆਂ ਗਤੀਵਿਧੀਆਂ ਖ਼ਿਲਾਫ਼ ਜ਼ੀਰੋ ਟਾਲਰੈਂਸ ਦੀ ਨੀਤੀ ਆਪਣੀ ਜਾ ਰਹੀ ਹੈ। ਤਾਜ਼ਾ ਮਿਸਾਲ ਸਿਹਤ ਮੰਤਰੀ ਚੇਤਨ ਸਿੰਘ ਜੌੜਾਮਾਜਰਾ ਵਲੋਂ ਦਿਤੀ ਗਈ ਹੈ।
ਮੰਤਰੀ ਚੇਤਨ ਸਿੰਘ ਜੌੜਾਮਾਜਰਾ ਸਿਹਤ ਵਿਭਾਗ ਦੀ ਵਾਗਡੋਰ ਸੰਭਾਲਣ ਤੋਂ ਬਾਅਦ ਉਨ੍ਹਾਂ ਦੇ ਵਿਭਾਗ ਦੀਆਂ ਕਈ ਬਦਲੀਆਂ ਦੀਆਂ ਬੇਨਤੀਆਂ ਤੋਂ ਤੰਗ ਆ ਗਏ ਹਨ। ਇਸ ਦੇ ਚਲਦੇ ਹੀ ਉਨ੍ਹਾਂ ਨੇ ਸਿਵਲ ਸਕੱਤਰੇਤ ਵਿਖੇ ਆਪਣੇ ਦਫ਼ਤਰ ਦੇ ਬਾਹਰ ਇੱਕ ਨੋਟਿਸ ਚਿਪਕਾ ਦਿਤਾ ਹੈ ਜੋ ਚਰਚਾ ਦਾ ਵਿਸ਼ਾ ਬਣਿਆ ਹੋਇਆ ਹੈ।
ਅਸਲ ਵਿਚ ਮੰਤਰੀ ਦੇ ਦਫਤਰ ਬਾਹਰ ਨੋਟਿਸ ਲਗਾਇਆ ਗਿਆ ਹੈ ਕਿ "ਬਦਲੀਆਂ ਬੰਦ ਹਨ" ਅਤੇ "ਤੋਹਫ਼ੇ ਮਨਜ਼ੂਰ ਨਹੀਂ"। ਜੌੜਾਮਾਜਰਾ 6 ਜੁਲਾਈ ਨੂੰ ਆਪਣਾ ਅਹੁਦਾ ਸੰਭਾਲਣ ਤੋਂ ਬਾਅਦ ਆਏ ਹੋਏ ਮਹਿਮਾਨਾਂ ਤੋਂ ਕਈ ਗੁਲਦਸਤੇ ਪ੍ਰਾਪਤ ਕਰ ਰਹੇ ਸਨ। ਹੁਣ ਮੰਤਰੀ ਨੇ ਦਰਸ਼ਕਾਂ ਨੂੰ ਵੀ ਇਹ ਪ੍ਰਥਾ ਬੰਦ ਕਰਨ ਦੀ ਅਪੀਲ ਕੀਤੀ ਹੈ।