Punjab News: VIP ਬਣ ਕੇ ਘੁੰਮਣ ਵਾਲੇ ਠੱਗ ਕਾਬੂ, ਨਾਕੇ ਦੌਰਾਨ ਰੋਕਣ 'ਤੇ ਸਭ ਕੁੱਝ ਨਿਕਲਿਆ ਜਾਅਲੀ

Punjab News: ਅੱਜ ਸੀ.ਆਈ.ਏ. ਸਟਾਫ਼ ਨੇ ਨਾਕਾਬੰਦੀ ਦੌਰਾਨ ਜਾਅਲੀ ਵੀ.ਆਈ.ਪੀ. ਬਣ ਕੇ ਘੁੰਮ ਰਹੇ ਵਿਅਕਤੀਆਂ ਨੂੰ ਉਸ ਦੇ ਲਾਮ-ਲਸ਼ਕਰ ਸਣੇ ਕਾਬੂ ਕੀਤਾ। ਉਹਨਾਂ ਖਿਲਾਫ਼ ਥਾਣਾ ਸਿਟੀ ਵਿਚ ਮਾਮਲਾ ਦਰਜ ਕਰ ਕੇ ਲੋੜੀਂਦੀ ਕਾਰਵਾਈ ਅਮਲ ’ਚ ਲਿਆਂਦੀ ਗਈ ਹੈ। ਇਸ ਸਬੰਧੀ ਸੀ.ਆਈ.ਏ. ਇੰਚਾਰਜ ਸ਼ਿਵ ਕੁਮਾਰ ਨੇ ਦੱਸਿਆ ਕਿ ਉੱਚ ਅਧਿਕਾਰੀਆਂ ਵਲੋਂ ਜਾਰੀ ਹਦਾਇਤਾਂ ਦੀ ਪਾਲਣਾ ਕਰਦਿਆਂ ਪੁਲਿਸ ਨੇ ਗ਼ਲਤ ਕਿਸਮ ਦੇ ਵਿਅਕਤੀਆਂ ’ਤੇ ਨਜ਼ਰ ਰੱਖਣ ਲਈ ਖਰੜ ਏਰੀਆ ’ਚ ਨਾਕਾਬੰਦੀ ਕੀਤੀ ਸੀ।

ਇਸ ਦੌਰਾਨ ਪੁਲਿਸ ਪਾਰਟੀ ਵਲੋਂ ਫਰਜ਼ੀ ਵੀ.ਆਈ.ਪੀ. ਬਣੇ ਵਿਅਕਤੀ ਨੂੰ ਫਾਰਚੂਨਰ ਗੱਡੀ, ਪਾਇਲਟ ਜਿਪਸੀ, ਬਿਨਾਂ ਇਜਾਜ਼ਤ ਲਗਾਏ ਹੂਟਰ ਅਤੇ ਲਾਲ-ਨੀਲੀ ਪੀ.ਸੀ.ਆਰ. ਬੱਤੀ ਸਣੇ ਕਾਬੂ ਕੀਤਾ ਹੈ। ਕਾਬੂ ਕੀਤੇ ਵਿਅਕਤੀ ਦੀ ਪਛਾਣ ਗੁਰਪ੍ਰੀਤ ਸਿੰਘ ਵਾਸੀ ਧੂਰੀ ਸੰਗਰੂਰ ਵਜੋਂ ਹੋਈ ਹੈ, ਜੋ ਫਿਲਹਾਲ ਓਰਾ ਐਵਨਿਊ ਮੋਰਿੰਡਾ ਰੋਡ ਖਰੜ ਦੇ ਇਕ ਫਲੈਟ ਵਿਚ ਰਹਿ ਰਿਹਾ ਹੈ।

ਉਸ ਵਲੋਂ ਈ.ਜੈੱਡ.ਆਈ. ਨਾਂ ’ਤੇ ਖਰੜ ਦੀ ਨਿਊ ਸੰਨੀ ਐਨਕਲੇਵ ਅੰਦਰ ਇਕ ਮੈਰਿਜ ਬਿਊਰੋ ਦਾ ਦਫ਼ਤਰ ਚਲਾਉਣ ਸਬੰਧੀ ਦੱਸਿਆ ਗਿਆ ਹੈ। ਅਧਿਕਾਰੀ ਨੇ ਦੱਸਿਆ ਕਿ ਉਹ ਮੋਹਾਲੀ ਵੱਲੋਂ ਫਾਰਚੂਨਰ ਗੱਡੀ ਨੰਬਰ ਐੱਚ.ਆਰ.70ਡੀ-0864 ’ਤੇ ਆਇਆ ਸੀ, ਜਦੋਂ ਕਿ ਉਸ ਦੀ ਗੱਡੀ ਅੱਗੇ ਇਕ ਪਾਇਲਟ ਜਿਪਸੀ ਨੰਬਰ ਸੀ.ਐੱਚ.01ਸੀ.ਆਰ.-6836 ਡਰਾਈਵਰ ਚਲਾ ਰਿਹਾ ਸੀ, ਜਿਸ ਵਿਚ 4 ਵਿਅਕਤੀ ਸਕਿਓਰਿਟੀ ਡਰੈੱਸ ਕੋਡ ਵਿਚ ਹਨ, ਜਿਨ੍ਹਾਂ ਦੀ ਵਰਦੀ ਸਪੈਸ਼ਲ ਪ੍ਰੋਟੈਕਸ਼ਨ ਗਰੁੱਪ ਨਾਲ ਮਿਲਦੀ-ਜੁਲਦੀ ਸੀ ਤੇ ਉਹ ਲੋਕਾਂ ਦੇ ਵ੍ਹੀਕਲ ਸਾਈਡ ’ਤੇ ਕਰਵਾਉਂਦੇ ਹੋਏ ਮੋਹਾਲੀ ਤੋਂ ਖਰੜ ਵੱਲ ਆਏ। 

ਨਾਕਾਬੰਦੀ ਦੌਰਾਨ ਜਦੋਂ ਫਾਰਚੂਨਰ ਗੱਡੀ ਵਿਚ ਬੈਠੇ ਹੋਏ ਵਿਅਕਤੀ ਤੋਂ ਪੁੱਛਗਿੱਛ ਕੀਤੀ ਤਾਂ ਉਹ ਜਾਅਲੀ ਵੀ.ਆਈ.ਪੀ. ਨਿਕਲਿਆ। ਪੁਲਿਸ ਨੇ ਜਿਪਸੀ ਦੇ ਡਰਾਈਵਰ ਰਵਿੰਦਰ ਸਿੰਘ ਵਾਸੀ ਖਰੜ ਨੂੰ ਵੀ ਨਾਮਜ਼ਦ ਕੀਤਾ ਹੈ। ਉਨ੍ਹਾਂ ਖਿਲਾਫ਼ ਬਣਦੀ ਕਾਰਵਾਈ ਅਮਲ ’ਚ ਲਿਆਉਣ ਪਿੱਛੋਂ ਮੌਕੇ ’ਤੇ ਹੀ ਜ਼ਮਾਨਤ ’ਤੇ ਰਿਹਾਅ ਕਰ ਦਿੱਤਾ ਗਿਆ।