Mohali girl dies in Telangana plane crash

ਮੋਹਾਲੀ: ਤੇਲੰਗਾਨਾ ਦੇ ਵਿਕਾਰਾਬਾਦ ਵਿਚ ਐਤਵਾਰ ਨੂੰ ਇਕ ਟ੍ਰੇਨਰ ਏਅਰਕ੍ਰਾਫ਼ਟ ਹਾਦਸਾਗ੍ਰਸਤ ਹੋ ਗਿਆ ਸੀ। ਇਸ ਹਾਦਸੇ ਵਿਚ ਦੋ ਪਾਇਲਟਾਂ ਅਮਨਦੀਪ ਕੌਰ ਤੇ ਪ੍ਰਕਾਸ਼ ਵਿਸ਼ਾਲ ਦੀ ਮੌਤ ਹੋ ਗਈ ਸੀ। ਅਧਿਕਾਰੀਆਂ ਮੁਤਾਬਿਕ ਇਹ ਜਹਾਜ਼ ਹੈਦਰਾਬਾਦ ਦੇ ਇਕ ਫਲਾਈਂਗ ਇੰਸਟੀਚਿਊਟ ਨਾਲ ਸਬੰਧਿਤ ਸੀ। ਦੋਵੇਂ ਟ੍ਰੇਨੀ ਪਾਇਲਟਾਂ ਨੇ ਸੇਸਨਾ ਏਅਰਕ੍ਰਾਫ਼ਟ ਵਿਚ ਹੈਦਰਾਬਾਦ ਦੇ ਬੇਗਮਪੇਟ ਹਵਾਈ ਅੱਡੇ ਤੋਂ ਉਡਾਣ ਭਰੀ ਸੀ। ਸਵੇਰੇ 11:55 ਵਜੇ ਇਸ ਦਾ ਰੇਡੀਓ ਸੰਪਰਕ ਟੁੱਟ ਗਿਆ ਸੀ। ਇਸ ਤੋਂ ਬਾਅਦ ਹੈਦਰਾਬਾਦ ਤੋਂ 100 ਕਿ.ਮੀ ਦੂਰ ਪੈਂਦੇ ਇਕ ਪਿੰਡ ਵਿਚ ਕਰੈਸ਼ ਹੋ ਗਿਆ।

ਇਸ ਭਿਆਨਕ ਹਾਦਸੇ ਵਿਚ ਮੌਤ ਦੀ ਸ਼ਿਕਾਰ ਹੋਈ ਅਮਨਪ੍ਰੀਤ ਕੌਰ ਮੋਹਾਲੀ ਦੇ ਛੱਜੂਮਾਜਰਾ ਪਿੰਡ ਦੀ ਰਹਿਣ ਵਾਲੀ ਸੀ। ਅਮਨਪ੍ਰੀਤ ਇਸ ਪਿੰਡ ਦੀ ਪਹਿਲੀ ਪਾਇਲਟ ਬਣ ਜਾਂਦੀ ਜੇਕਰ ਉਸ ਦਾ ਜਹਾਜ਼ ਹਾਦਸਾਗ੍ਰਸਤ ਨਾ ਹੁੰਦਾ। ਪਰ ਟ੍ਰੈਨਿੰਗ ਪੂਰੀ ਹੋਣ ਤੋਂ ਕੁਝ ਹੀ ਘੰਟੇ ਪਹਿਲਾਂ ਇਹ ਹਾਦਸਾ ਵਾਪਰ ਗਿਆ ਅਤੇ ਜੋ ਨਵਾਂ ਇਤਿਹਾਸ ਉਹ ਸਿਰਜਣ ਵਾਲੀ ਸੀ ਉਹ ਅਧੂਰਾ ਹੀ ਰਹਿ ਗਿਆ। ਛੱਜੂਮਾਜਰਾ ਦੀ ਅਮਨਪ੍ਰੀਤ ਕੌਰ ਹੈਦਰਾਬਾਦ ਦੀ ਰਾਜੀਵ ਗਾਂਧੀ ਏਵੀਏਸ਼ਨ ਅਕੈਡਮੀ ਤੋਂ ਜਹਾਜ਼ ਉਡਾਉਣ ਦੀ ਸਿਖਲਾਈ ਲੈ ਰਹੀ ਸੀ। ਉਸ ਦੀ ਸਿਖਲਾਈ ਪੂਰੀ ਹੋਣ ਵਿਚ ਕੁਝ ਹੀ ਘੰਟੇ ਰਹਿ ਗਏ ਸੀ ਕਿ ਉਸ ਦਾ ਜਹਾਜ਼ ਇਸ ਹਾਦਸੇ ਦਾ ਸ਼ਿਕਾਰ ਹੋ ਗਿਆ ਅਤੇ ਉਸ ਦੀ ਮੌਤ ਹੋ ਗਈ। ਅਮਨਪ੍ਰੀਤ ਦੇ ਸੁਪਨਿਆਂ ਦਾ ਮਹਿਲ ਢਹਿ ਢੇਰੀ ਹੋ ਗਿਆ।

ਸਪੋਕਸਮੈਨ ਟੀਵੀ ਨਾਲ ਗੱਲਬਾਤ ਕਰਦਿਆਂ ਅਮਨਪ੍ਰੀਤ ਕੌਰ ਦੇ ਮਾਤਾ ਨੇ ਦੱਸਿਆ ਕਿ ਉਹਨਾਂ ਦੀ ਅਮਨਪ੍ਰੀਤ ਨਾਲ ਆਖਰੀ ਵਾਰ 5 ਤਰੀਕ ਨੂੰ ਸ਼ਾਮ ਦੇ 6 ਵਜੇ ਗੱਲ ਹੋਈ ਸੀ। ਉਹਨਾਂ ਦੱਸਿਆ ਕਿ ਹਾਦਸਾ ਹੋਣ ਤੋਂ ਲਗਭਗ 4 ਘੰਟੇ ਬਾਅਦ ਉਹਨਾਂ ਨੂੰ ਇਸ ਬਾਰੇ ਖ਼ਬਰ ਮਿਲੀ ਸੀ। ਇਸ ਹਾਦਸੇ ਬਾਰੇ ਸਭ ਤੋਂ ਪਹਿਲਾਂ ਅਮਨਪ੍ਰੀਤ ਦੇ ਪਿਤਾ ਨੂੰ ਦੱਸਿਆ ਗਿਆ। ਉਹਨਾਂ ਦਾ ਕਹਿਣਾ ਹੈ ਕਿ ਇਸ ਹਾਦਸੇ ਦਾ ਕਾਰਨ ਭਾਰੀ ਬਾਰਿਸ਼ ਦੱਸਿਆ ਜਾ ਰਿਹਾ ਹੈ। ਅਮਨਪ੍ਰੀਤ ਦੀ ਮਾਂ ਦਾ ਕਹਿਣਾ ਹੈ ਕਿ ਅਮਨਪ੍ਰੀਤ ਨੂੰ ਫਰਵਰੀ ਵਿਚ 22ਵਾਂ ਸਾਲ ਲੱਗਿਆ ਸੀ। ਉਹਨਾਂ ਦਾ ਕਹਿਣਾ ਹੈ ਕਿ ਇਹ ਟ੍ਰੈਨਿੰਗ 200 ਘੰਟਿਆਂ ਦੀ ਸੀ, ਜਿਸ ਵਿਚੋਂ 100 ਘੰਟੇ ਰਹਿ ਗਏ ਸੀ ਅਤੇ ਉਹ ਇਕ ਵਾਰ ‘ਚ 4 ਘੰਟਿਆਂ ਦੀ ਉਡਾਨ ਭਰਦੀ ਸੀ।

ਉਹਨਾਂ ਦੱਸਿਆ ਕਿ ਜਦੋਂ ਅਮਨਪ੍ਰੀਤ ਉਡਾਨ ਭਰਨ ਜਾ ਰਹੀ ਸੀ ਤਾਂ ਉਡਾਨ ਤੋਂ ਪਹਿਲਾਂ ਬਾਰਿਸ਼ ਕਾਰਨ ਕਈ ਵਾਰ ਜਹਾਜ਼ ਨੂੰ ਰੋਕਿਆ ਗਿਆ ਸੀ ਤੇ ਇਸੇ ਦੌਰਾਨ ਜਹਾਜ਼ ਦਾ ਰੇਡੀਓ ਸੰਪਰਕ ਟੁੱਟ ਗਿਆ ਸੀ। ਅਮਨਪ੍ਰੀਤ ਦੀ ਮਾਂ ਨੇ ਦੱਸਿਆ ਕਿ ਅਮਨ ਨੇ ਪਾਇਲਟ ਬਣਨ ਲਈ ਬਹੁਤ ਮਿਹਨਤ ਕੀਤੀ ਅਤੇ ਲਗਨ ਨਾਲ ਪੇਪਰ ਪਾਸ ਕੀਤੇ ਤੇ ਇੱਥੋਂ ਤੱਕ ਪਹੁੰਚੀ ਸੀ। ਇਸ ਦੇ ਨਾਲ ਹੀ ਉਹਨਾਂ ਦੱਸਿਆ ਕਿ ਅਮਨਪ੍ਰੀਤ ਪੜ੍ਹਾਈ ਵਿਚ ਕਾਫ਼ੀ ਹੁਸ਼ਿਆਰ ਸੀ। ਅਮਨਪ੍ਰੀਤ ਕੌਰ ਦੀ ਭੂਆ ਨੇ ਇਸ ਹਾਦਸੇ ਲਈ ਸਿਖਲਾਈ ਵਿਭਾਗ ਨੂੰ ਜ਼ਿੰਮੇਵਾਰ ਠਹਿਰਾਇਆ ਹੈ। ਉਹਨਾਂ ਦਾ ਕਹਿਣਾ ਹੈ ਕਿ ਇੰਸਟੀਚਿਊਟ ਨੂੰ ਮੌਸਮ ਬਾਰੇ ਚੰਗੀ ਤਰ੍ਹਾਂ ਜਾਣਕਾਰੀ ਸੀ ਪਰ ਇਸ ਦੇ ਬਾਵਜੂਦ ਵੀ ਉਹਨਾਂ ਨੇ ਇਹ ਉਡਾਨ ਕਿਉਂ ਭਰਨ ਦਿੱਤੀ।

ਉਹਨਾਂ ਦੱਸਿਆ ਕਿ ਹੁਣ ਤੱਕ ਕੋਈ ਵੀ ਸਿਆਸਤਦਾਨ ਜਾਂ ਮੰਤਰੀ ਉਹਨਾਂ ਦੇ ਘਰ ਨਹੀਂ ਆਇਆ, ਸਿਰਫ਼ ਜਗਮੋਹਣ ਸਿੰਘ ਕੰਗ ਹੀ ਉਹਨਾਂ ਦੇ ਘਰ ਆਏ ਹਨ। ਉਹਨਾਂ ਕਿਹਾ ਕਿ ਵੋਟਾਂ ਮੰਗਣ ਤਾਂ ਹਰ ਕੋਈ ਆ ਜਾਂਦਾ ਹੈ ਪਰ ਹੁਣ ਕਿਸੇ ਨੇ ਵੀ ਉਹਨਾਂ ਦੀ ਸਾਰ ਨਾ ਲਈ। ਸਪੋਕਸਮੈਨ ਟੀਵੀ ਨਾਲ ਗੱਲਬਾਤ ਕਰਦਿਆਂ ਅਮਨਪ੍ਰੀਤ ਦੇ ਛੋਟੇ ਭਰਾ ਅਮਰ ਦਾ ਕਹਿਣਾ ਹੈ ਕਿ ਉਸ ਦਾ ਅਪਣੀ ਭੈਣ ਨਾਲ ਬਹੁਤ ਪਿਆਰ ਸੀ। ਇਸ ਦੇ ਨਾਲ ਹੀ ਉਸ ਨੇ ਕਿਹਾ ਕਿ ਉਸ ਨੂੰ ਅਪਣੀ ਭੈਣ ‘ਤੇ ਮਾਣ ਹੈ। ਇਸ ਪੂਰੇ ਹਾਦਸੇ ਲਈ ਅਮਨਪ੍ਰੀਤ ਦੇ ਪਰਿਵਾਰ ਵੱਲੋਂ ਅਕੈਡਮੀ ਨੂੰ ਦੋਸ਼ੀ ਠਹਿਰਾਇਆ ਜਾ ਰਿਹਾ ਹੈ ਉਹਨਾਂ ਕਿਹਾ ਕਿ ਇਸ ਹਾਦਸੇ ਤੋਂ ਬਾਅਦ ਪਿੰਡ ਛੱਡੂਮਾਜਰਾ ਵਿਚ ਕਿਸੇ ਦਾ ਵੀ ਪਾਇਲਟ ਬਣਨ ਦਾ ਹੌਂਸਲਾ ਨਹੀਂ ਪੈ ਰਿਹਾ।