ਪੰਜਾਬ 'ਚ ਪਾਜ਼ੇਟਿਵ ਕੋਰੋਨਾ ਕੇਸਾਂ ਦੀ ਗਿਣਤੀ 1850 ਤੋਂ ਹੋਈ ਪਾਰ

24 ਘੰਟਿਆਂ ਦੌਰਾਨ 90 ਤੋਂ ਵੱਧ ਨਵੇਂ ਕੇਸ ਆਏ, ਮੌਤਾਂ ਦੀ ਗਿਣਤੀ ਹੋਈ 32

ਚੰਡੀਗੜ੍ਹ, 10 ਮਈ (ਗੁਰਉਪਦੇਸ਼ ਭੁੱਲਰ) : ਪੰਜਾਬ ਵਿਚ ਕੋਰੋਨਾ ਦਾ ਕਹਿਰ ਜਾਰੀ ਹੈ ਪਰ ਇਸ ਸਮੇਂ ਸੈਂਪਲਾਂ ਦੀਆਂ ਰੀਪੋਰਟਾਂ ਆਉਣ ਦੀ ਰਫ਼ਤਾਰ ਵੀ ਕਾਫ਼ੀ ਘਟ ਹੈ। ਹਾਲੇ 3845 ਸੈਂਪਲਾਂ ਦੀਆਂ ਰੀਪੋਰਆਂ ਆਉਣੀਆਂ ਬਾਕੀ ਹਨ। ਅੱਜ ਦੇਰ ਸ਼ਾਮ ਤਕ ਸੂਬੇ ਵਿਚ ਕੁੱਲ ਪਾਜ਼ੇਟਿਵ ਕੇਸਾਂ ਦੀ ਗਿਣਤੀ 1850 ਤੋਂ ਪਾਰ ਹੋ ਚੁੱਕੀ ਹੈ।

1823 ਕੇਸਾਂ ਦੀ ਤਾਂ ਸਰਕਾਰੀ ਤੌਰ 'ਤੇ ਪੁਸ਼ਟੀ ਕਰ ਦਿਤੀ ਗਈ ਹੈ। ਦੇਰ ਰਾਤ ਲੁਧਿਆਣਾ ਵਿਚ ਇਕ ਕੋਰੋਨਾ ਪੀੜਤ ਦੀ ਮੌਤ ਤੋਂ ਬਾਅਦ ਮਰਨ ਵਾਲਿਆਂ ਦੀ ਗਿਣਤੀ ਵੀ 32 ਹੋ ਗਈ ਹੈ।

ਜ਼ਿਕਰਯੋਗ ਹੈ ਕਿ ਇਸ ਸਮੇਂ ਭਾਵੇਂ ਸੈਂਪਲਾਂ ਦੀਆਂ ਨਵੀਆਂ ਰੀਪੋਰਟਾਂ ਸ਼ਰਧਾਲੂਆਂ ਦੀਆਂ ਹੀ ਆ ਰਹੀਆਂ ਹਨ ਪਰ ਅੱਜ 5 ਕੰਬਾਈਨ ਕਾਮਿਆਂ ਦੇ ਕੇਸ ਵੀ ਜ਼ਿਲ੍ਹਾ ਫ਼ਤਿਹਗੜ੍ਹ ਸਾਹਿਬ ਵਿਚ ਪਾਜ਼ੇਟਿਵ ਆਏ ਹਨ।

ਸੂਬੇ ਵਿਚ 24 ਘੰਟਿਆਂ ਦੌਰਾਨ 90 ਤੋਂ ਵੱਧ ਨਵੇਂ ਪਾਜ਼ੇਟਿਵ ਕੇਸ ਸਾਹਮਣੇ ਆ ਚੁੱਕੇ ਹਨ, ਜਿਨ੍ਹਾਂ ਦੀ ਗਿਣਤੀ ਦੇਰ ਰਾਤ ਤਕ ਹੋਰ ਵਧ ਸਕਦੀ ਹੈ। 166 ਮਰੀਜ਼ ਠੀਕ ਹੋਏ ਹਨ ਤੇ 1 ਮਰੀਜ ਇਸ ਸਮੇਂ ਵੈਂਟੀਲੇਟਰ ਉਪਰ ਵੀ ਹੈ। ਅੰਮ੍ਰਿਤਸਰ ਵਿਚ ਸੱਭ ਤੋਂ ਵੱਧ 295 ਮਾਮਲੇ ਆ ਚੁੱਕੇ ਹਨ।