ਆਈ.ਐਮ.ਐਫ਼ ਨੇ ਵੀ ਭਾਰਤ ਦੀ ਵਿਕਾਸ ਦਰ ਦਾ ਅਨੁਮਾਨ ਘਟਾਇਆ, ਹੁਣ 6.8 ਵਿਕਾਸ ਦਰ ਦੀ ਉਮੀਦ

ਨਵੀਂ ਦਿੱਲੀ, 11 ਅਕਤੂਬਰ : ਅੰਤਰਰਾਸ਼ਟਰੀ ਮੁਦਰਾ ਫ਼ੰਡ (ਆਈਐਮਐਫ) ਨੇ ਮੰਗਲਵਾਰ ਨੂੰ  2022 ਵਿਚ ਭਾਰਤ ਦੀ ਆਰਥਿਕ ਵਿਕਾਸ ਦਰ ਦੇ ਅਪਣੇ ਅਨੁਮਾਨ ਨੂੰ  ਘਟਾ ਕੇ 6.8 ਪ੍ਰਤੀਸ਼ਤ ਕਰ ਦਿਤਾ ਹੈ | ਇਸ ਦੇ ਨਾਲ ਹੀ ਆਈਐਮਐਫ ਵੀ ਉਨ੍ਹਾਂ ਗਲੋਬਲ ਏਜੰਸੀਆਂ ਵਿਚ ਸ਼ਾਮਲ ਹੋ ਗਿਆ ਜਿਨ੍ਹਾਂ ਨੇ ਭਾਰਤ ਦੀ ਜੀਡੀਪੀ ਦਰ ਦੇ ਅਨੁਮਾਨ ਨੂੰ  ਘਟਾਇਆ ਹੈ |
ਆਈਐਮਐਫ ਨੇ ਬੀਤੀ ਜੁਲਾਈ ਵਿਚ ਅਪ੍ਰੈਲ 2022 ਤੋਂ ਸ਼ੁਰੂ ਹੋਣ ਵਾਲੇ ਵਿੱਤੀ ਸਾਲ ਲਈ ਭਾਰਤ ਦਾ ਕੁਲ ਘਰੇਲੂ ਉਤਪਾਦ (ਜੀਡੀਪੀ) ਵਿਚ 7.4 ਪ੍ਰਤੀਸ਼ਤ ਦੇ ਵਾਧੇ ਦਾ ਅਨੁਮਾਨ ਲਗਾਇਆ ਸੀ | ਇਹ ਪੂਰਵ ਅਨੁਮਾਨ ਵੀ ਇਸ ਸਾਲ ਜਨਵਰੀ ਵਿਚ ਆਈਐਮਐਫ਼ ਵਲੋਂ ਕੀਤੇ ਗਏ ਅਨੁਮਾਨ 8.2 ਫ਼ੀ ਸਦੀ ਦੇ ਤੋਂ ਘੱਟ ਸੀ | ਵਿੱਤੀ ਸਾਲ 2021-22 (ਅਪ੍ਰੈਲ 2021 ਤੋਂ ਮਾਰਚ 2022) ਦਰਮਿਆਨ ਭਾਰਤ ਦੀ ਵਿਕਾਸ ਦਰ 8.7 ਫ਼ੀ ਸਦੀ ਸੀ |
ਮੰਗਲਵਾਰ ਨੂੰ  ਜਾਰੀ ਅਪਣੀ ਸਾਲਾਨਾ ਵਿਸ਼ਵ ਆਰਥਿਕ ਆਉਟਲੁੱਕ ਰਿਪੋਰਟ ਵਿਚ, ਆਈਐਮਐਫ਼ ਨੇ ਕਿਹਾ ਕਿ 2022 ਵਿਚ ਭਾਰਤ ਦੀ ਜੀਡੀਪੀ ਵਿਕਾਸ ਦਰ ਦਾ ਸੋਧਿਆ ਅਨੁਮਾਨ 6.8 ਪ੍ਰਤੀਸ਼ਤ ਹੈ | ਇਸ ਤਰ੍ਹਾਂ, ਜੁਲਾਈ ਮਹੀਨੇ ਲਈ ਪੂਰਵ ਅਨੁਮਾਨ ਵਿਚ 0.6 ਪ੍ਰਤੀਸ਼ਤ ਅੰਕ ਦੀ ਕਟੌਤੀ ਕੀਤੀ ਗਈ ਹੈ | ਆਈਐਮਐਫ ਵਲੋਂ ਕੀਤੀ ਗਈ ਇਹ ਕਟੌਤੀ ਦੂਜੀ ਤਿਮਾਹੀ ਵਿਚ ਕੰਪਨੀਆਂ ਦੇ ਮੁਕਾਬਲਤਨ ਕਮਜ਼ੋਰ ਨਤੀਜਿਆਂ ਅਤੇ ਕਮਜ਼ੋਰ ਬਾਹਰੀ ਮੰਗ ਕਾਰਨ ਕੀਤੀ ਗਈ ਹੈ |
ਆਈਐਮਐਫ਼ ਦੁਆਰਾ 2021 ਵਿਚ ਗਲੋਬਲ ਵਿਕਾਸ ਦਰ 6.0 ਪ੍ਰਤੀਸ਼ਤ, 2022 ਵਿਚ 3.2 ਪ੍ਰਤੀਸਤ ਅਤੇ 2023 ਵਿਚ 2.7 ਪ੍ਰਤੀਸ਼ਤ ਰਹਿਣ ਦਾ ਅਨੁਮਾਨ ਹੈ | ਆਰਥਿਕ ਵਿਕਾਸ ਦੇ ਪੂਰਵ ਅਨੁਮਾਨ ਜਾਰੀ ਕਰਦੇ ਹੋਏ, ਆਈਐਮਐਫ਼ ਨੇ ਕਿਹਾ ਕਿ ਇਹ ਅੰਕੜੇ ਸੱਭ ਤੋਂ ਵੱਡੀਆਂ ਅਰਥਵਿਵਸਥਾਵਾਂ ਲਈ ਮਹੱਤਵਪੂਰਨ ਮੰਦੀ ਨੂੰ  ਦਰਸ਼ਾਉਂਦੇ ਹਨ |     (ਏਜੰਸੀ)