BJP ’ਚੋਂ ਬਰਖ਼ਾਸਤਗੀ ਤੋਂ ਬਾਅਦ ਬੋਲੇ ਅਨਿਲ ਜੋਸ਼ੀ, 'ਕਿਸਾਨ ਅੰਦੋਲਨ ਲਈ ਮੇਰੀ ਛੋਟੀ ਜਿਹੀ ਆਹੂਤੀ ਹੈ'

Anil Joshi

ਚੰਡੀਗੜ੍ਹ (ਸਪੋਕਸਮੈਨ ਸਮਾਚਾਰ ਸੇਵਾ) : ਭਾਜਪਾ ਦੇ ਸੀਨੀਅਰ ਆਗੂ ਤੇ ਸਾਬਕਾ ਮੰਤਰੀ ਅਨਿਲ ਜੋਸ਼ੀ ਨੂੰ ਬੀਤੇ ਦਿਨ ਭਾਜਪਾ ਹਾਈਕਮਾਂਡ ਨੇ ਪਾਰਟੀ ਵਿਰੋਧੀ ਗਤੀਵਿਧੀਆਂ ਦਾ ਦੋਸ਼ ਲਾ ਕੇ 6 ਸਾਲ ਲਈ ਪਾਰਟੀ ’ਚੋਂ ਬਰਖ਼ਾਸਤ ਕਰ ਦਿਤਾ ਸੀ। ਪਾਰਟੀ ’ਚੋਂ ਬਰਖ਼ਾਸਤਗੀ ਤੋਂ ਬਾਅਦ ਜੋਸ਼ੀ ਨੇ ਇਕ ਨਿੱਜੀ ਚੈਨਲ ਨੂੰ ਦਿਤੀ ਇੰਟਰਵਿਊ ਵਿਚ ਕਿਹਾ ਕਿ ਇਹ ਉਨ੍ਹਾਂ ਦੀ ਕਿਸਾਨ ਅੰਦੋਲਨ ਲਈ ਇਕ ਛੋਟੀ ਜਿਹੀ ਆਹੂਤੀ ਹੈ।

ਦਰਅਸਲ ਜੋਸ਼ੀ ਨੇ ਪਾਰਟੀ ਹਾਈਕਮਾਂਡ ਨੂੰ ਕਿਸਾਨੀ ਅੰਦੋਲਨ ਬਾਰੇ ਸ਼ੀਸ਼ਾ ਦਿਖਾਉਣ ਦੀ ਕੋਸ਼ਿਸ਼ ਕੀਤੀ ਸੀ ਤੇ ਕਿਹਾ ਸੀ ਕਿ ਪੰਜਾਬ ਦੀ ਭਾਜਪਾ ਲੀਡਰਸ਼ਿਪ ਕੇਂਦਰੀ ਆਗੂਆਂ ਕੋਲ ਗ਼ਲਤ ਜਾਣਕਾਰੀ ਪਹੁੰਚਾ ਰਹੀ ਹੈ ਤਾਂ ਉਨ੍ਹਾਂ ਨੂੰ ਪਾਰਟੀ ਵਿਰੋਧੀ ਗਤੀਵਿਧੀਆਂ ਦਾ ਦੋਸ਼ ਲਾ ਕੇ ਪਾਰਟੀ ’ਚੋਂ ਬਾਹਰ ਕਰ ਦਿਤਾ ਗਿਆ। ਉਨ੍ਹਾਂ ਕਿਹਾ ਕਿ ਉਹ ਪੰਜਾਬੀ ਹਨ ਤੇ ਕਿਸਾਨ ਹਨ ਇਸ ਲਈ ਪਹਿਲਾਂ ਪੰਜਾਬ ਦੇ ਨਮਕ ਦਾ ਹੱਕ ਅਦਾ ਕਰਨਗੇ ਤੇ ਪਾਰਟੀਆਂ ਤਾਂ ਆਉਂਦੀਆਂ-ਜਾਂਦੀਆਂ ਰਹਿੰਦੀਆਂ ਹਨ ਪਰ ਉਨ੍ਹਾਂ ਦੀ ਇਹ ਬਰਖ਼ਾਸਤਗੀ ਕਿਸਾਨ ਅੰਦੋਲਨ ਲਈ ਇਕ ਛੋਟੀ ਜਿਹੀ ਅਹੂਤੀ ਹੈ।

ਕਿਸਾਨ ਅੰਦੋਲਨ ’ਚ ਜਾਣ ਬਾਰੇ ਪੁਛੇ ਜਾਣ ’ਤੇ ਜੋਸ਼ੀ ਨੇ ਕਿਹਾ ਕਿ ਜੇਕਰ ਕਿਸਾਨ ਇਜਾਜ਼ਤ ਦੇਣਗੇ ਤਾਂ ਉਹ ਇਕ ਵਾਰ ਦਿੱਲੀ ਧਰਨੇ ਵਿਚ ਜਾ ਕੇ ਉਸ ਜਗ੍ਹਾ ਨੂੰ ਇਕ ਵਾਰ ਸਿਜਦਾ ਜ਼ਰੂਰ ਕਰਨਗੇ ਜਿਥੇ ਕਿਸਾਨ ਪਿਛਲੇ 7 ਮਹੀਨਿਆਂ ਤੋਂ ਤਪੱਸਿਆ ਕਰ ਰਹੇ ਹਨ। ਜੋਸ਼ੀ ਨੇ ਕਿਹਾ ਕਿ ਉਹ ਘੱਟੋ-ਘੱਟ ਇਕ ਮਹੀਨਾ ਰਾਜਨੀਤੀ ਦੇ ਅਗਲੇ ਪੜਾਅ ਬਾਰੇ ਕੁੱਝ ਵੀ ਨਹੀਂ ਸੋਚਣਗੇ ਬਲਕਿ ਗ਼ੈਰ ਰਾਜਨੀਤਕ ਬੰਦਾ ਬਣ ਕੇ ਕਿਸਾਨ ਅੰਦੋਲਨ ਦਾ ਸਮਰਥਨ ਕਰਨਗੇ।