MBBS Fees Hike: MBBS ਵਿਦਿਆਰਥੀਆਂ ਦੀ ਫੀਸ ’ਚ ਵਾਧਾ, ਹੁਣ ਡਾਕਟਰ ਬਣਨ ਲਈ ਦੇਣੀ ਪਵੇਗੀ ਇੰਨੀ ਫੀਸ

Punjab has increased the course fees of MBBS students

 

MBBS Fees Hike: ਮੈਡੀਕਲ ਸਿੱਖਿਆ ਅਤੇ ਖੋਜ ਵਿਭਾਗ, ਪੰਜਾਬ ਨੇ ਰਾਜ ਦੇ ਸਾਰੇ ਸਰਕਾਰੀ ਅਤੇ ਪ੍ਰਾਈਵੇਟ ਮੈਡੀਕਲ ਕਾਲਜਾਂ ਵਿੱਚ ਐਮਬੀਬੀਐਸ ਕੋਰਸ ਫੀਸਾਂ ਵਿੱਚ 5 ਪ੍ਰਤੀਸ਼ਤ ਦਾ ਵਾਧਾ ਕਰਕੇ ਐਮਬੀਬੀਐਸ ਦੇ ਦਾਖਲਿਆਂ ਨੂੰ ਨਿਯਮਤ ਕਰਨ ਲਈ ਇੱਕ ਨੋਟੀਫਿਕੇਸ਼ਨ ਜਾਰੀ ਕੀਤਾ ਹੈ।

ਨੋਟੀਫਿਕੇਸ਼ਨ ਦੇ ਅਨੁਸਾਰ, ਬਾਬਾ ਫਰੀਦ ਯੂਨੀਵਰਸਿਟੀ ਆਫ ਹੈਲਥ ਸਾਇੰਸਿਜ਼ (BFUHS) 1,550 ਦਾਖਲੇ ਕਰਵਾਏਗੀ। ਇਨ੍ਹਾਂ ਸੀਟਾਂ ਵਿੱਚ ਰਾਜ ਦੇ ਚਾਰ ਸਰਕਾਰੀ ਮੈਡੀਕਲ ਕਾਲਜਾਂ ਵਿੱਚ 750 ਸੀਟਾਂ ਅਤੇ ਚਾਰ ਪ੍ਰਾਈਵੇਟ ਅਤੇ ਦੋ ਘੱਟ ਗਿਣਤੀ ਦਰਜੇ ਦੀਆਂ ਮੈਡੀਕਲ ਸੰਸਥਾਵਾਂ ਵਿੱਚ 800 ਸੀਟਾਂ ਸ਼ਾਮਲ ਹਨ।
ਨੋਟੀਫਿਕੇਸ਼ਨ ਅਨੁਸਾਰ ਅੰਮ੍ਰਿਤਸਰ, ਪਟਿਆਲਾ, ਫਰੀਦਕੋਟ ਅਤੇ ਮੁਹਾਲੀ ਦੇ ਚਾਰ ਸਰਕਾਰੀ ਮੈਡੀਕਲ ਕਾਲਜਾਂ ਵਿੱਚ ਐਮਬੀਬੀਐਸ ਕੋਰਸ ਦੀ ਪੂਰੀ ਫੀਸ 9.05 ਲੱਖ ਰੁਪਏ ਤੋਂ ਵਧਾ ਕੇ 9.50 ਲੱਖ ਰੁਪਏ ਕਰ ਦਿੱਤੀ ਗਈ ਹੈ।

ਸਾਰੇ ਪ੍ਰਾਈਵੇਟ ਮੈਡੀਕਲ ਕਾਲਜਾਂ ਵਿੱਚ ਮੈਨੇਜਮੈਂਟ ਕੋਟੇ ਦੀਆਂ ਸੀਟਾਂ ਲਈ ਐਮਬੀਬੀਐਸ ਕੋਰਸ ਦੀ ਪੂਰੀ ਫੀਸ 55.25 ਲੱਖ ਰੁਪਏ ਤੋਂ ਵਧਾ ਕੇ 58.02 ਲੱਖ ਰੁਪਏ ਕਰ ਦਿੱਤੀ ਗਈ ਹੈ। ਪ੍ਰਾਈਵੇਟ ਕਾਲਜਾਂ ਵਿੱਚ ਸਰਕਾਰੀ ਕੋਟੇ ਦੀਆਂ ਸੀਟਾਂ ਦੀ ਫੀਸ 21.48 ਲੱਖ ਰੁਪਏ ਤੋਂ ਵਧਾ ਕੇ 22.54 ਲੱਖ ਰੁਪਏ ਕਰ ਦਿੱਤੀ ਗਈ ਹੈ। ਹਰ ਪ੍ਰਾਈਵੇਟ ਮੈਡੀਕਲ ਕਾਲਜ ਵਿੱਚ ਸਰਕਾਰੀ ਕੋਟੇ ਤਹਿਤ 50 ਫੀਸਦੀ ਸੀਟਾਂ ਰਾਖਵੀਆਂ ਹਨ।

ਬਾਕੀ 50 ਫੀਸਦੀ ਸੀਟਾਂ ਵਿੱਚ 35 ਫੀਸਦੀ ਮੈਨੇਜਮੈਂਟ ਕੋਟਾ ਅਤੇ 15 ਫੀਸਦੀ ਐਨਆਰਆਈ ਕੋਟਾ ਸ਼ਾਮਲ ਹੈ। NRI ਕੋਟੇ ਦੀਆਂ ਸੀਟਾਂ ਲਈ ਫੀਸ ਢਾਂਚੇ ਵਿੱਚ ਕੋਈ ਬਦਲਾਅ ਨਹੀਂ ਕੀਤਾ ਗਿਆ ਹੈ, ਜੋ ਕਿ $1.10 ਲੱਖ ਹੈ। ਲੁਧਿਆਣਾ ਦੇ ਸੀਐਮਸੀ ਨੇ ਐਮਬੀਬੀਐਸ ਕੋਰਸ ਲਈ ਆਪਣੀ ਫੀਸ ਢਾਂਚੇ ਵਿੱਚ ਕੋਈ ਬਦਲਾਅ ਨਹੀਂ ਕੀਤਾ ਹੈ।