ਭਾਰਤੀ ਨੂੰ ਬਣਾਇਆ ਅਮਰੀਕਾ ਦੇ ਰਖਿਆ ਮੰਤਰੀ ਦਾ ਚੀਫ਼ ਆਫ਼ ਸਟਾਫ਼

ਵਾਸ਼ਿੰਗਟਨ, 11 ਨਵੰਬਰ : ਭਾਰਤੀ-ਅਮਰੀਕਾ ਕਸ਼ ਪਟੇਲ ਨੂੰ ਅਮਰੀਕਾ ਦੇ ਰਖਿਆ ਮੰਤਰੀ ਕ੍ਰਿਸ ਮਿਲਰ ਦਾ ਚੀਫ਼ ਆਫ਼ ਸਟਾਫ਼ ਨਿਯੁਕਤ ਕੀਤਾ ਗਿਆ ਹੈ। ਰਾਸ਼ਟਰਪਤੀ ਟਰੰਪ ਦੁਆਰਾ ਮਾਰਕ ਅਸਪਰ ਨੂੰ ਰਖਿਆ ਮੰਤਰੀ ਦੇ ਅਹੁਦੇ ਤੋਂ ਹਟਾਉਣ ਤੇ ਰਾਸ਼ਟਰੀ ਅਤਿਵਾਦ ਰੋਕੂ ਕੇਂਦਰ ਦੇ ਨਿਰਦੇਸ਼ਕ ਕ੍ਰਿਸ ਮਿਲਰ ਦੇ ਕੇਅਰਟੇਕਰ ਰਖਿਆ ਮੰਤਰੀ ਬਣਾਉਣ ਤੋਂ ਇਕ ਦਿਨ ਬਾਅਦ ਪੇਂਟਾਗਨ ਨੇ ਇਹ ਨਿਯੁਕਤੀ ਕੀਤੀ ਹੈ। ਪੇਂਟਾਗਨ ਵਲੋਂ ਮੰਗਲਵਾਰ ਨੂੰ ਕਿਹਾ ਗਿਆ ਕਿ ਮਿਲਰ ਨੇ ਸੋਮਵਾਰ ਨੂੰ ਅਪਣਾ ਅਹੁਦਾ ਸੰਭਾਲ ਲਿਆ ਹੈ। ਅਮਰੀਕਾ ਦੇ ਰਖਿਆ ਹੈੱਡਕੁਆਟਰ ਪੇਂਟਾਗਨ ਨੇ ਮੰਗਲਵਾਰ ਨੂੰ ਕਿਹਾ, ਮੌਜੂਦਾ ਸਮੇਂ 'ਚ ਰਾਸ਼ਟਰੀ ਸੁਰੱਖਿਆ ਪ੍ਰੀਸ਼ਦ 'ਚ ਕੰਮ ਕਰ ਰਹੇ ਕਸ਼ ਪਟੇਲ ਨੂੰ ਰਖਿਆ ਮੰਤਰੀ ਮਿਲਰ ਦਾ ਚੀਫ਼ ਆਫ਼ ਸਟਾਫ਼ ਨਿਯੁਕਤ ਕੀਤਾ ਗਿਆ ਹੈ। ਪਟੇਲ ਅਸਤੀਫ਼ਾ ਦੇ ਚੁੱਕੇ ਜੇਨ ਸਟੀਵਰਟ ਦੀ ਥਾਂ ਲੈਣਗੇ। ਕਸ਼ ਦਾ ਪੂਰਾ ਨਾਂ ਕਸ਼ਅੱਪ ਪ੍ਰਮੋਦ ਪਟੇਲ ਹੈ ਤੇ ਉਹ ਇਸ ਤੋਂ ਪਹਿਲਾਂ ਹਾਊਸ ਪਰਮਾਨੈਂਟ ਸਿਲੈਕਟ ਕਮੇਟੀ 'ਚ ਕੰਮ ਕਰ ਚੁੱਕੇ ਹਨ। ਪਟੇਲ (39) ਨੂੰ ਜੂਨ 2019 'ਚ ਰਾਸ਼ਟਰੀ ਸੁਰੱਖਿਆ ਪ੍ਰੀਸ਼ਦ ਦੇ ਅਤਿਵਾਦ ਰੋਕੂ ਡਾਇਰੈਕਟੋਰੇਟ 'ਚ ਸੀਨੀਅਰ ਨਿਰਦੇਸ਼ਕ ਦੇ ਰੂਪ 'ਚ ਨਿਯੁਕਤ ਕੀਤਾ ਗਿਆ ਸੀ।