ਗੁਰਮੁਖੀ ਚੇਤਨਾ ਮਾਰਚ 18 ਤੋਂ 21 ਤਕ ਪੰਜਾਬ ਦੇ ਵੱਖ-ਵੱਖ ਹਿੱਸਿਆਂ 'ਚੋਂ ਲੰਘੇਗਾ

Lakhvir Singh Lakha & Baba Hardeep Singh Mehraj

ਬਠਿੰਡਾ : ਪੰਜਾਬੀ ਮਾਂ ਬੋਲੀ ਸਤਿਕਾਰ ਸਭਾ ਵਲੋਂ 'ਗੁਰਮੁਖੀ ਚੇਤਨਾ ਮਾਰਚ' 18 ਤੋਂ 21 ਫ਼ਰਵਰੀ ਤਕ ਪੰਜਾਬ ਦੇ ਵੱਖ-ਵੱਖ ਸ਼ਹਿਰਾਂ ਵਿਚੋਂ ਪੰਜਾਬੀ ਮਾਂ ਬੋਲੀ ਦੇ ਸਤਿਕਾਰ ਲਈ ਹੌਕਾ ਦੇਵੇਗਾ। ਕੌਮਾਂਤਰੀ ਮਾਂ ਬੋਲੀ ਦਿਵਸ 'ਤੇ ਜਥੇਬੰਦੀ ਵਲੋਂ ਪਟਿਆਲਾ ਦੇ ਭਾਸ਼ਾ ਵਿਭਾਗ ਅੱਗੇ ਪੰਜਾਬ ਮਾਂ ਬੋਲੀ ਨੂੰ ਅੱਖੋ-ਪਰੋਖਾ ਕਰਨ 'ਤੇ ਧਰਨਾ ਲਾ ਕੇ ਰੋਸ ਪ੍ਰਗਟ ਕੀਤਾ ਜਾਵੇਗਾ। ਇਨ੍ਹਾਂ ਸ਼ਬਦਾਂ ਦਾ ਪ੍ਰਗਟਾਵਾ ਅੱਜ ਇੱਥੇ ਬਠਿੰਡਾ ਦੇ ਪ੍ਰੈੱਸ ਕਲੱਬ ਵਿਚ ਪੱਤਰਕਾਰਾਂ ਦੀ ਬੁਲਾਈ ਪ੍ਰੈੱਸ ਕਾਨਫ਼ਰੰਸ ਨੂੰ ਸੰਬੋਧਨ ਕਰਦਿਆ ਬਾਬਾ ਹਰਦੀਪ ਸਿੰਘ ਮਹਿਰਾਜ ਤੇ ਲਖਵੀਰ ਸਿੰਘ ਲੱਖਾ ਸਿਧਾਣਾ ਨੇ ਕੀਤਾ। ਬਾਬਾ ਹਰਦੀਪ ਸਿੰਘ ਮਹਿਰਾਜ ਤੇ ਲੱਖਾ ਸਿਧਾਣਾ ਨੇ ਦਸਿਆ

ਕਿ 'ਗੁਰਮੁਖੀ ਚੇਤਨਾ ਮਾਰਚ' ਦਾ ਅਰੰਭ ਤਖ਼ਤ ਸ੍ਰੀ ਦਮਦਮਾ ਸਾਹਿਬ ਵਿਖੇ ਗੁਰਦਵਾਰਾ ਸ੍ਰੀ ਲਿਖਣਸਰ ਤੋਂ 18 ਫ਼ਰਵਰੀ ਨੂੰ ਹੋਵੇਗਾ। 'ਗੁਰਮੁਖੀ ਚੇਤਨਾ ਮਾਰਚ' 'ਗੁਰਮੁਖੀ ਗੁਰੂਆਂ ਦੀ ਬੋਲੀ ਪਰ ਸਰਕਾਰਾਂ ਨੇ ਰੋਲੀ' ਨਾਹਰੇ ਤਹਿਤ ਕਦਮ ਪੁੱਟਦਾ ਹੋਇਆ ਮੰਜ਼ਲ ਵਲ ਕਾਫ਼ਲੇ ਦੇ ਰੂਪ ਵਿਚ ਵਧੇਗਾ। ਮਾਰਚ 18 ਫ਼ਰਵਰੀ ਦੀ ਰਾਤ ਨੂੰ ਦਰਬਾਰ ਸਾਹਿਬ ਸ੍ਰੀ ਅਮ੍ਰਿਤਸਰ ਵਿਖੇ ਪੁੱਜੇਗਾ। ਜਿਥੋਂ 19 ਫ਼ਰਵਰੀ ਨੂੰ ਸ੍ਰੀ ਅੰਮ੍ਰਿਤਸਰ ਸਾਹਿਬ ਤੋਂ ਚੱਲ ਕੇ ਜਲੰਧਰ-ਖੜਕੜ ਕਲਾਂ ਹੁੰਦਾ ਹੋਇਆ 19 ਦੀ ਰਾਤ ਨੂੰ ਸ੍ਰੀ ਅਨੰਦਪੁਰ ਸਾਹਿਬ ਪੁੱਜੇਗਾ। ਮਾਰਚ ਚੰਡੀਗੜ੍ਹ ਹੁੰਦਾ ਹੋਇਆ ਸ਼ਾਮ ਨੂੰ ਸ੍ਰੀ ਫ਼ਤਹਿਗੜ੍ਹ•ਸਾਹਿਬ ਪੁੱਜੇਗਾ। ਕੌਮਾਂਤਰੀ ਮਾਂ ਬੋਲੀ ਦਿਵਸ 'ਤੇ 21 ਫ਼ਰਵਰੀ ਨੂੰ ਪਟਿਆਲਾ ਵਿਚ ਭਾਸ਼ਾ ਵਿਭਾਗ ਅੱਗੇ ਧਰਨਾ ਦੇ ਕੇ ਇਸ ਨੂੰ ਘੇਰਿਆ ਜਾਵੇਗਾ।