ਸਹੁਰਾ ਪਰਵਾਰ ਤੋਂ ਦੁਖੀ ਵਿਆਹੁਤਾ ਨੇ ਕੀਤੀ ਜੀਵਨ ਲੀਲਾ ਸਮਾਪਤ

ਅੰਮ੍ਰਿਤਸਰ, 12 ਮਈ (ਉਪਲ): ਸਹੁਰਾ ਪਰਵਾਰ ਦੇ ਤਾਹਨਿਆਂ ਮਿਹਣਿਆਂ ਤੋਂ ਦੁਖੀ ਵਿਅਹੁਤਾ ਨੇ ਪੱਖੇ ਨਾਲ ਲਟਕ ਕੇ ਅਪਣੀ ਜੀਵਨ ਲੀਲਾ ਸਮਾਪਤ ਕਰ ਲਈ। ਅਜਨਾਲਾ ਪੁਲਿਸ ਨੇ ਪਤੀ ਸੁਬੇਗ ਸਿੰਘ, ਸੱਸ ਤੋਸੀ ਵਾਸੀ ਅਜਨਾਲਾ ਅਤੇ ਮੋਨਿਕਾ ਵਾਸੀ ਗੁਰਦਾਸਪੁਰ ਵਿਰੁਧ ਮਾਮਲਾ ਦਰਜ ਕੀਤਾ ਹੈ। ਪੁਲਿਸ ਨੂੰ ਦਿਤੀ ਸ਼ਿਕਾਇਤ ਵਿਚ ਹਰਪਾਲ ਸਿੰਘ ਵਾਸੀ ਭਿੱਟੇਵੱਡ ਨੇ ਦਸਿਆ ਕਿ ਉਸ ਦੀ ਭੈਣ ਦਾ ਵਿਆਹ 10 ਸਾਲ ਪਹਿਲਾਂ ਕਥਿਤ ਦੋਸ਼ੀ ਸਬੇਗ ਸਿੰਘ ਵਾਸੀ ਨੇਪਾਲ ਨਾਲ ਹੋਇਆ ਸੀ।

ਵਿਆਹ ਤੋਂ ਬਾਅਦ ਉਸ ਦਾ ਜੀਜਾ ਅਤੇ ਮਾਂ, ਮੇਰੀ ਭੈਣ ਨੂੰ ਮੁੰਡਾ ਨਾ ਹੋਣ ਕਰ ਕੇ ਤਾਹਣੇ-ਮਿਹਣੇ ਮਾਰਨ ਲੱਗ ਪਏ ਅਤੇ ਕਹਿਣ ਲੱਗੇ ਕਿ ਜੇ ਉਸ ਨੂੰ ਮੁੰਡਾ ਨਾ ਹੋਇਆ ਤਾਂ ਸੁਬੇਗ ਸਿੰਘ ਦਾ ਦੂਸਰਾ ਵਿਆਹ ਮੋਨਿਕਾ ਵਾਸੀ ਗੁਰਦਾਸਪੁਰ ਨਾਲ ਕਰਵਾ ਦੇਣਗੇ। ਬੀਤੇ ਦਿਨੀਂ 10 ਮਈ ਨੂੰ ਉਸ ਨੂੰ ਉਸ ਦੀ ਭੈਣ ਦਾ ਫ਼ੋਨ ਆਇਆ ਕਿ ਉਹ ਮੁਲਜ਼ਮਾਂ ਹੱਥੋਂ ਪ੍ਰੇਸ਼ਾਨ ਹੋ ਗਈ ਹੈ ਅਤੇ ਆਤਮ ਹਤਿਆ ਕਰਨ ਲੱਗੀ ਹੈ। ਜਦ ਉਹ ਅਗਲੇ ਦਿਨ ਅਪਣੀ ਮਾਤਾ ਅਤੇ ਭੈਣ ਨਾਲ ਮੁਲਜ਼ਮਾਂ ਨੂੰ ਸਮਝਾਉਣ ਲਈ ਗਿਆ ਤਾਂ ਦੇਖਿਆ ਕਿ ਉਸ ਦੀ ਭੈਣ ਦੀ ਲਾਸ਼ ਪੱਖੇ ਨਾਲ ਲਟਕ ਰਹੀ ਸੀ। ਪੁਲਿਸ ਵਲੋਂ ਮਾਮਲੇ ਦੀ ਜਾਂਚ ਕੀਤੀ ਜਾ ਰਹੀ ਹੈ।