ਚੰਡੀਗੜ੍ਹ GMCH-32 ਵਿੱਚ ਸਰਕਾਰੀ ਨੌਕਰੀ ਦਾ ਮੌਕਾ: ਨਰਸਿੰਗ ਸਟਾਫ ਦੀ ਭਰਤੀ ਲਈ ਕੇਂਦਰ ਸਰਕਾਰ ਨੇ ਦਿੱਤੀ ਮਨਜ਼ੂਰੀ
ਜਲਦ ਸ਼ੁਰੂ ਹੋਵੇਗੀ ਭਰਤੀ ਪ੍ਰਕਿਰਿਆ
ਚੰਡੀਗੜ੍ਹ: ਚੰਡੀਗੜ੍ਹ ਦੇ ਦੂਜੇ ਸਭ ਤੋਂ ਵੱਡੇ ਹਸਪਤਾਲ GMCH 32 ਵਿੱਚ ਨਰਸਿੰਗ ਕੇਡਰ ਦੀਆਂ 323 ਅਸਾਮੀਆਂ ਭਰੀਆਂ ਜਾਣਗੀਆਂ। ਸਿਹਤ ਅਤੇ ਪਰਿਵਾਰ ਭਲਾਈ ਮੰਤਰਾਲੇ ਨੇ GMCH 32 ਵਿੱਚ ਇਸ ਅਹੁਦੇ ’ਤੇ ਭਰਤੀ ਕਰਨ ਦੀ ਮਨਜ਼ੂਰੀ ਦੇ ਦਿੱਤੀ ਹੈ। ਅਜਿਹੀ ਸਥਿਤੀ ਵਿੱਚ ਇੱਕ ਨਰਸ ਵਜੋਂ ਸਰਕਾਰੀ ਨੌਕਰੀ ਪ੍ਰਾਪਤ ਕਰਨ ਦਾ ਵਧੀਆ ਮੌਕਾ ਹੈ। ਇਹ ਹਸਪਤਾਲ ਦੀ ਲੰਬੇ ਸਮੇਂ ਤੋਂ ਲਟਕਦੀ ਆ ਰਹੀ ਮੰਗ ਸੀ, ਜਿਸ ਨੂੰ ਕੇਂਦਰ ਨੇ ਸਵੀਕਾਰ ਕਰ ਲਿਆ ਹੈ। ਇਨ੍ਹਾਂ ਨਵੀਆਂ ਅਸਾਮੀਆਂ ਨੂੰ ਨਰਸਿੰਗ ਕੇਡਰ ਦੀਆਂ ਮੌਜੂਦਾ ਅਸਾਮੀਆਂ ਨਾਲ ਜੋੜਿਆ ਜਾਵੇਗਾ।
ਜਾਣਕਾਰੀ ਅਨੁਸਾਰ ਇਸ ਸਮੇਂ ਹਸਪਤਾਲ ਵਿੱਚ ਸਟਾਫ ਨਰਸ ਦੀਆਂ 774 ਮਨਜ਼ੂਰ ਅਸਾਮੀਆਂ ਹਨ। ਇਨ੍ਹਾਂ ਵਿੱਚ ਨਰਸਿੰਗ ਸੁਪਰਡੈਂਟ, ਨਰਸਿੰਗ ਸਿਸਟਰ ਅਤੇ ਨਰਸਿੰਗ ਅਫਸਰ ਸ਼ਾਮਲ ਹਨ। ਇਸ ਦੇ ਨਾਲ ਹੀ ਹਸਪਤਾਲ ਵਿੱਚ 182 ਸਟਾਫ ਨਰਸਾਂ ਦੀ ਭਰਤੀ ਵੀ ਚੱਲ ਰਹੀ ਹੈ।
ਤੁਹਾਨੂੰ ਦੱਸ ਦੇਈਏ ਕਿ ਕੇਂਦਰ ਨੇ 17 ਸਾਲਾਂ ਬਾਅਦ GMCH 32 ਵਿੱਚ ਨਰਸਿੰਗ ਅਫਸਰ ਦੀਆਂ ਨਵੀਆਂ ਅਸਾਮੀਆਂ ਸਿਰਜਣ ਦੀ ਮਨਜ਼ੂਰੀ ਦਿੱਤੀ ਹੈ। ਸਾਲ 2005 ਵਿੱਚ ਹਸਪਤਾਲ ਨੇ 656 ਨਰਸਿੰਗ ਪੋਸਟਾਂ ਬਣਾਉਣ ਲਈ ਮੰਤਰਾਲੇ ਨੂੰ ਪ੍ਰਸਤਾਵ ਭੇਜਿਆ ਸੀ। ਇਸ ਵਿੱਚੋਂ 323 ਨੂੰ ਮਨਜ਼ੂਰੀ ਮਿਲ ਚੁੱਕੀ ਹੈ। ਇਨ੍ਹਾਂ ਵਿੱਚੋਂ 316 ਸਟਾਫ ਨਰਸਾਂ ਹੋਣਗੀਆਂ। ਇੱਥੇ 6 ਨਰਸਿੰਗ ਸਿਸਟਰਾਂ ਹੋਣਗੀਆਂ ਅਤੇ ਇੱਕ ਪੋਸਟ ਮੈਟਰਨ ਦੀ ਹੋਵੇਗੀ। ਇਸ ਦੇ ਨਾਲ ਹੀ ਕੇਂਦਰ ਨੇ ਸਪੱਸ਼ਟ ਕੀਤਾ ਹੈ ਕਿ ਇਹ ਯਕੀਨੀ ਬਣਾਇਆ ਜਾਵੇ ਕਿ ਪ੍ਰਵਾਨਿਤ ਅਸਾਮੀਆਂ ਵਿੱਚ ਤਨਖ਼ਾਹ ਸਕੇਲ ਸਬੰਧਤ ਗਰੇਡ ਅਨੁਸਾਰ ਮੌਜੂਦਾ ਅਸਾਮੀਆਂ ਦੇ ਤਨਖ਼ਾਹ ਸਕੇਲ ਤੋਂ ਵੱਧ ਨਾ ਹੋਵੇ ਅਤੇ ਇਹ ਪੋਸਟ ਨਿਯਮਤ ਤੌਰ 'ਤੇ ਭਰੀ ਜਾਣੀ ਚਾਹੀਦੀ ਹੈ।