1990 ਦੇ ਅਗ਼ਵਾ ਅਤੇ ਲਾਪਤਾ ਮਾਮਲੇ 'ਚ ਭਗੌੜਾ ਪੁਲਿਸ ਅਧਿਕਾਰੀ ਗ੍ਰਿਫ਼ਤਾਰ 

ਮੋਹਾਲੀ (ਸਤਵਿੰਦਰ ਸਿੰਘ ਧੜਾਕ) : ਸੀ.ਬੀ.ਆਈ ਨੇ 1990 ਦੇ ਦਹਾਕੇ ਵਿਚ ਤਰਨਤਾਰਨ ਦੇ ਪਿੰਡ ਮੱਲੋਵਾਲ ਦੇ ਵਸਨੀਕ ਬਲਜੀਤ ਸਿੰਘ ਦੇ ਅਗ਼ਵਾ ਅਤੇ ਲਾਪਤਾ ਹੋਣ ਦੇ ਮਾਮਲੇ ਵਿਚ ਭਗੌੜੇ ਪੁਲਿਸ ਅਧਿਕਾਰੀ ਕਸ਼ਮੀਰ ਸਿੰਘ ਨੂੰ ਗ੍ਰਿਫ਼ਤਾਰ ਕੀਤਾ ਹੈ। ਇਹ ਮਾਮਲਾ ਪੰਜਾਬ ਵਿਚ ਅਤਿਵਾਦ ਦੇ ਸਮੇਂ ਦਾ ਹੈ।

ਸੀਬੀਆਈ ਅਦਾਲਤ ਨੇ 2006 ਵਿਚ ਮੁਲਜ਼ਮ ਕਸ਼ਮੀਰ ਸਿੰਘ ਨੂੰ ਭਗੌੜਾ ਐਲਾਨਿਆ ਸੀ। ਇਸ ਮਾਮਲੇ ਦੇ ਦੂਜੇ ਮੁਲਜ਼ਮ ਉਸ ਸਮੇਂ ਦੇ ਐਸਐਚਓ ਸੂਬਾ ਸਿੰਘ (ਹੁਣ ਮ੍ਰਿਤਕ), ਐਸਟੀਓ ਦਲਬੀਰ ਸਿੰਘ ਅਤੇ ਪੁਲਿਸ ਅਧਿਕਾਰੀ ਰਵੇਲ ਸਿੰਘ ਨੂੰ ਸੀਬੀਆਈ ਅਦਾਲਤ ਨੇ 2023 ਵਿਚ ਦੋਸ਼ੀ ਠਹਿਰਾਇਆ ਸੀ।

ਹਾਲਾਂਕਿ, ਕਸ਼ਮੀਰ ਸਿੰਘ ਦੇ ਗ੍ਰਿਫ਼ਤਾਰ ਨਾ ਹੋਣ ਕਾਰਨ, ਅਦਾਲਤ ਨੇ ਉਸ ਨੂੰ ਭਗੌੜਾ ਐਲਾਨ ਦਿਤਾ ਅਤੇ ਉਸ ਸਮੇਂ ਸਜ਼ਾ ਨਹੀਂ ਸੁਣਾਈ ਜਾ ਸਕੀ। ਹੁਣ, ਮੁਲਜ਼ਮ ਦੀ ਗ੍ਰਿਫ਼ਤਾਰੀ ਦੇ ਨਾਲ, ਕੇਸ ਉਥੋਂ ਹੀ ਮੁੜ ਸ਼ੁਰੂ ਹੋਵੇਗਾ ਜਿਥੋਂ ਗਵਾਹਾਂ ਦੀ ਗ਼ੈਰ ਹਾਜ਼ਰੀ ਕਾਰਨ ਅਦਾਲਤੀ ਕਾਰਵਾਈ ਰੁਕ ਗਈ ਸੀ। ਜ਼ਿਕਰਯੋਗ ਹੈ ਕਿ 7 ਅਗੱਸਤ, 1991 ਨੂੰ, ਮੱਲੋਵਾਲ ਸੰਤਾ ਪਿੰਡ ਦਾ ਰਹਿਣ ਵਾਲਾ ਬਲਜੀਤ ਸਿੰਘ ਅਪਣੇ ਭਰਾ ਪਰਮਜੀਤ ਸਿੰਘ ਨਾਲ ਖਾਦ ਖ਼ਰੀਦਣ ਲਈ ਛਬੇਲ ਗਿਆ ਸੀ।

ਬੱਸ ਸਟੈਂਡ ’ਤੇ ਪਹੁੰਚਣ ’ਤੇ, ਉਸ ਨੂੰ ਤਤਕਾਲੀ ਐਸਐਚਓ ਸੂਬਾ ਸਿੰਘ, ਐਸਟੀਓ ਦਲਬੀਰ ਸਿੰਘ ਅਤੇ ਹੋਰ ਪੁਲਿਸ ਵਾਲਿਆਂ ਨੇ ਫੜ ਲਿਆ, ਜ਼ਬਰਦਸਤੀ ਮਾਰੂਤੀ ਜਿਪਸੀ ਵਿਚ ਬਿਠਾ ਕੇ ਥਾਣੇ ਲੈ ਗਏ। ਕੰਬੋ ਪਿੰਡ ਦੇ ਤਤਕਾਲੀ ਸਰਪੰਚ ਅਨੂਪ ਸਿੰਘ ਨੇ ਘਟਨਾ ਨੂੰ ਦੇਖਿਆ ਅਤੇ ਪੰਚਾਇਤ ਮੈਂਬਰ ਰਤਨ ਸਿੰਘ ਰਾਹੀਂ ਬਲਜੀਤ ਸਿੰਘ ਦੇ  ਪਿਤਾ ਹਰੀ ਸਿੰਘ ਨੂੰ ਸੂਚਿਤ ਕੀਤਾ।

ਦੋਸ਼ ਹੈ ਕਿ ਬਲਜੀਤ ਸਿੰਘ ਨੂੰ ਪੁਲਿਸ ਸਟੇਸ਼ਨ ਵਿਚ ਗ਼ੈਰ-ਕਾਨੂੰਨੀ ਤੌਰ ’ਤੇ ਹਿਰਾਸਤ ਵਿਚ ਲਿਆ ਗਿਆ ਸੀ ਅਤੇ ਅਤਿਵਾਦੀ ਗਤੀਵਿਧੀਆਂ ਨਾਲ ਸਬੰਧਤ ਇਕਬਾਲੀਆ ਬਿਆਨ ਲੈਣ ਲਈ ਕੁੱਟਿਆ ਗਿਆ ਸੀ। ਅਪਣੇ 2023 ਦੇ ਫ਼ੈਸਲੇ ਵਿਚ, ਅਦਾਲਤ ਨੇ ਮੰਨਿਆ ਕਿ ਜਾਂਚ ਅਧਿਕਾਰੀ ਨੇ ਪੱਖਪਾਤੀ ਜਾਂਚ ਕੀਤੀ ਸੀ, ਪਰ ਦੋਸ਼ੀ ਨੂੰ ਝੂਠੇ ਤੌਰ ’ਤੇ ਫਸਾਉਣ ਦਾ ਕੋਈ ਆਧਾਰ ਨਹੀਂ ਮਿਲਿਆ।

ਅਦਾਲਤ ਨੇ ਵਾਜਬ ਸ਼ੱਕ ਤੋਂ ਪਰੇ ਪਾਇਆ ਕਿ ਦੋਸ਼ੀ, ਸੂਬਾ ਸਿੰਘ, ਦਲਬੀਰ ਸਿੰਘ, ਕਸ਼ਮੀਰ ਸਿੰਘ (ਭਗੌੜਾ) ਅਤੇ ਰਵੇਲ ਸਿੰਘ ਨੇ ਅਪਰਾਧਕ ਸਾਜ਼ਿਸ਼ ਰਚੀ ਸੀ। ਅਦਾਲਤ ਨੇ ਤਿੰਨਾਂ ਨੂੰ ਭਾਰਤੀ ਦੰਡ ਵਿਧਾਨ ਦੀਆਂ ਧਾਰਾਵਾਂ 120-ਬੀ, 365, 344 ਅਤੇ 330 ਦੇ ਤਹਿਤ ਦੋਸ਼ੀ ਠਹਿਰਾਇਆ ਅਤੇ ਸਜ਼ਾ ਸੁਣਾਈ। ਹੁਣ, ਸੀਬੀਆਈ ਦੁਆਰਾ ਕਸ਼ਮੀਰ ਸਿੰਘ ਦੀ ਗ੍ਰਿਫ਼ਤਾਰੀ ਦੇ ਨਾਲ, ਇਸ ਮਾਮਲੇ ਵਿਚ ਅਦਾਲਤੀ ਕਾਰਵਾਈ ਦੁਬਾਰਾ ਸ਼ੁਰੂ ਹੋਵੇਗੀ।