ਗੁਰਦਾਸਪੁਰ : ਘਰ 'ਚ ਗਟਰ ਪੁੱਟਦਿਆਂ ਮਿਲਿਆ ਜ਼ਿੰਦਾ ਬੰਬ, ਇਲਾਕੇ 'ਚ ਫੈਲੀ ਦਹਿਸ਼ਤ

gurdaspur live bombs in house drain

ਗੁਰਦਾਸਪੁਰ : ਇੱਥੇ ਬਮਿਆਲ ਸਰਹੱਦ ਦੀ ਡਿੰਡਾ ਪੋਸਟ ਤੋਂ ਮਹਿਜ਼ ਕੁਝ ਦੂਰੀ 'ਤੇ ਸਥਿਤ ਕੋਟਲੀ ਜਵਾਹਰ ਪਿੰਡ ਦੇ ਇਕ ਘਰ ਵਿਚ ਮੰਗਲਵਾਰ ਸਵੇਰੇ 8 ਵਜੇ ਦੇ ਕਰੀਬ ਗਟਰ ਦੀ ਪੁਟਾਈ ਚੱਲ ਰਹੀ ਸੀ ਤਾਂ ਇਸ ਦੌਰਾਨ ਹੇਠੋਂ ਇਕ ਜ਼ਿੰਦਾ ਬੰਬ ਨਿਕਲ ਆਇਆ, ਜਿਸ ਨਾਲ ਪਿੰਡ ਸਮੇਤ ਪੂਰੇ ਇਲਾਕੇ 'ਚ ਦਹਿਸ਼ਤ ਦਾ ਮਾਹੌਲ ਫੈਲ ਗਿਆ। 

ਇਸ ਸੰਬੰਧੀ ਜਾਣਕਾਰੀ ਦਿੰਦਿਆਂ ਐੱਸਪੀਡੀ ਹੇਮਪੁਸ਼ਪ ਨੇ ਦਸਿਆ ਕਿ ਉਨ੍ਹਾਂ ਦੀ ਇਕ ਚੌਕੀ ਬਮਿਆਲ ਵਿਚ ਹੈ, ਜਿਥੇ ਜਤਿੰਦਰ ਸਿੰਘ ਪੁੱਤਰ ਦਰਬਾਰੀ ਲਾਲ ਨਿਵਾਸੀ ਕੋਟਲੀ ਜਵਾਹਰ ਨੇ ਪੁਲਿਸ ਨੂੰ ਸੂਚਿਤ ਕੀਤਾ ਕਿ ਉਹ ਆਪਣੇ ਘਰ ਵਿਚ ਗਟਰ ਦੀ ਪੁਟਾਈ ਕਰ ਰਿਹਾ ਸੀ ਤਾਂ ਵਿਚੋਂ ਉਨ੍ਹਾਂ ਨੂੰ ਇਕ ਲੋਹੇ ਦਾ ਵੱਡਾ ਖੋਲ ਮਿਲਿਆ ਜੋ ਦੇਖਣ ਨੂੰ ਇਕ ਬੰਬ ਦੀ ਤਰ੍ਹਾਂ ਲਗਦਾ ਹੈ। ਉਨ੍ਹਾਂ ਨੇ ਮਿੱਟੀ ਦੀ ਖੁਦਾਈ ਕਰਕੇ ਜਦੋਂ ਉਸ ਨੂੰ ਬਾਹਰ ਕਢਿਆ ਤਾਂ ਉਹ ਇਕ ਜ਼ਿੰਦਾ ਬੰਬ ਨਿਕਲਿਆ। 

ਇਸ ਤੋਂ ਬਾਅਦ ਇਸ ਦੀ ਸੂਚਨਾ ਤੁਰਤ ਬਮਿਆਲ ਪੁਲਿਸ ਚੌਂਕੀ ਨੂੰ ਦਿਤੀ ਗਈ। ਸੂਚਨਾ ਮਿਲਦੇ ਹੀ ਮੌਕੇ 'ਤੇ ਨਰੋਟ ਜੈਮਲ ਸਿੰਘ ਦੇ ਥਾਣਾ ਮੁਖੀ ਪ੍ਰੀਤਮ ਸਿੰਘ ਪਹੁੰਚ ਗਏ। ਉਨ੍ਹਾਂ ਨੇ ਦਸਿਆ ਕਿ ਬੰਬ 'ਤੇ (ਸਾਲ-1965) ਦਾ ਮਾਅਰਕਾ ਲੱਗਿਆ ਹੋਇਆ ਹੈ।

ਐੱਸਪੀਡੀ ਹੇਮਪੁਸ਼ਪ ਨੇ ਦਸਿਆ ਕਿ ਬੰਬ ਨੂੰ ਡਿਫਯੂਜ਼ ਕਰਨ ਦੇ ਲਈ ਉਨ੍ਹਾਂ ਵਲੋਂ ਜ਼ਿਲ੍ਹਾ ਪਠਾਨਕੋਟ ਦੇ ਫ਼ੌਜੀ ਅਧਿਕਾਰੀਆਂ ਨੂੰ ਸੂਚਿਤ ਕਰ ਦਿਤਾ ਗਿਆ ਹੈ ਕਿਉਂਕਿ ਫ਼ੌਜ ਵਲੋਂ ਜੋ ਬੰਬ ਨਿਰੋਧਕ ਟੀਮ ਭੇਜੀ ਜਾਵੇਗੀ, ਇਸ ਬੰਬ ਨੂੰ ਉਸ ਦੇ ਹਵਾਲੇ ਕਰ ਦਿਤਾ ਜਾਵੇਗਾ।