ਗੈਂਗਸਟਰ ਦਿਲਪ੍ਰੀਤ ਢਾਹਾਂ ਦਾ ਸਾਥ ਦੇਣ ਵਾਲੀਆਂ ਦੋਵੇਂ ਭੈਣਾਂ ਭੇਜੀਆਂ ਜੇਲ 

Rupinder Kaur and Harpreet kaur

ਐੱਸ.ਏ.ਐੱਸ.ਨਗਰ,  ਪੰਜਾਬ ਪੁਲਿਸ ਦੇ ਸਪੈਸ਼ਲ ਅਪਰੇਸ਼ਨ ਸੈਲ ਨੇ ਗੈਂਗਸਟਰ ਦਿਲਪ੍ਰੀਤ ਸਿੰਘ ਢਾਹਾ ਦਾ ਸਾਥ ਦੇਣ ਵਾਲੀਆਂ ਦੋਵੇਂ ਸਗੀਆਂ ਭੈਣਾ ਰੁਪਿੰਦਰ ਕੌਰ ਉਰਫ ਰੂਬੀ 'ਤੇ ਹਰਪ੍ਰੀਤ ਕੌਰ ਨੂੰ ਅੱਜ ਪਿਛਲਾ ਰਿਮਾਂਡ ਖਤਮ ਹੋਣ ਉਪਰੰਤ ਡਿਉਟੀ ਮੈਜਿਸਟ੍ਰੇਟ ਦੇ ਸਾਮ੍ਹਣੇ ਪੇਸ਼ ਕੀਤਾ ਸੀ ਜਿੱਥੇ ਦੋਵਾਂ ਭੈਣਾਂ ਨੂੰ ਡਿਉਟੀ ਮੈਜਿਸਟ੍ਰੇਟ ਨੇ ਨਿਆਇਕ ਹਿਰਾਸਤ 'ਚ ਭੇਜ ਦਿਤਾ ਹੈ। ਉੱਥੇ, ਪੰਜਾਬ ਪੁਲਿਸ ਦੇ ਸਪੈਸ਼ਲ ਅਪਰੇਸ਼ਨ ਸੈਲ ਦੀ ਟੀਮ ਨੇ ਦਿਲਪ੍ਰੀਤ ਢਾਹਾ ਦੇ ਨਾਂ 'ਤੇ ਬੱਦੀ ਦੇ ਨਾਮੀ ਉਦਯੋਗਪਤੀਆਂ ਤੋਂ ਫਿਰੌਤੀ ਮੰਗਣ ਵਾਲੇ ਉਸ ਦੇ ਸਾਥੀ ਵਿਪਨ ਨੂੰ ਵੀ ਅੱਜ ਡਿਉਟੀ ਮੈਜਿਸਟ੍ਰੇਟ ਦੇ ਸਾਮ੍ਹਣੇ ਪੇਸ਼ ਕੀਤਾ। 

ਪੰਜਾਬ ਪੁਲਿਸ ਨੇ ਸਪੈਸ਼ਲ ਅਪਰੇਸ਼ਨ ਸੈਲ ਦੀ ਟੀਮ ਨੇ ਵਿਪਨ ਕੁਮਾਰ ਦਾ ਰਿਮਾਂਡ ਹਾਸਲ ਕਰਨ ਵੇਲੇ ਇਹ ਤਰਕ ਰੱਖਿਆ ਕਿ ਮੁਲਜਮ ਵਿਪਨ ਕੁਮਾਰ ਤੋਂ ਉਨ੍ਹਾਂ ਉਦਯੋਗਪਤੀਆਂ ਦੀ ਲਿਸਟ ਹਾਸਲ ਕਰਨੀ ਹੈ ਜਿਨ੍ਹਾਂ ਤੋਂ ਉਹ ਦਿਲਪ੍ਰੀਤ ਢਾਹਾ ਦੇ ਨਾਂ 'ਤੇ ਫਿਰੌਤੀ ਲੈ ਚਕਾ ਹੈ। ਦਲੀਲ ਸੁਣਨ ਤੋਂ ਬਾਅਦ ਡਿਉਟੀ ਮੈਜਿਸਟ੍ਰੇਟ ਨੇ ਮੁਲਜਮ ਵਿਪਨ ਕੁਮਾਰ ਨੂੰ ਦੋ ਦਿਨ ਦੇ ਪੁਲਿਸ ਰਿਮਾਂਡ 'ਤੇ ਭੇਜ ਦਿਤਾ ਹੈ।ਵਿਪਨ ਕੁਮਾਰ ਬੱਦੀ ਦੇ ਪਿੰਡ ਸੇਖੋਂਮਾਜਰਾ ਦਾ ਰਹਿਣ ਵਾਲਾ ਹੈ।