ਬਠਿੰਡਾ ਨਹਿਰ 'ਚ ਨਹਾਉਣ ਸਮੇਂ ਤਿੰਨ ਨੌਜਵਾਨਾਂ ਦੀ ਮੌਤ

Swimmers taking out the Body

ਬਠਿੰਡਾ,  ਸਥਾਨਕ ਬਠਿੰਡਾ ਨਹਿਰ 'ਚ ਬੀਬੀਵਾਲਾ ਦੀਆਂ ਝਾਲਾਂ ਕੋਲ ਅੱਜ ਦੁਪਿਹਰ ਤਿੰਨ ਨੌਜਵਾਨਾਂ ਬੁੱਧ ਰਾਮ, ਹਰਪ੍ਰੀਤ ਸਿੰਘ ਤੇ ਸੁਖਦੇਵ ਸਿੰਘ ਦੀ ਨਹਾਉਂਦੇ ਸਮੇਂ ਡੁੱਬਣ ਕਾਰਨ ਮੌਤ ਹੋ ਗਈ ਹੈ। ਮ੍ਰਿਤਕ ਨੌਜਵਾਨ ਆਪਸ 'ਚ ਵਧੀਆਂ ਦੋਸਤ ਸਨ, ਜਿਨ੍ਹਾਂ ਦੀ ਉਮਰ 20-21 ਸਾਲ ਦੇ ਕਰੀਬ ਸੀ। ਘਟਨਾ ਕਾਰਨ ਇਲਾਕੇ ਵਿਚ ਸੋਗ ਹੈ।  ਮ੍ਰਿਤਕ ਨੌਜਵਾਨਾਂ ਵਿਚੋਂ ਦੋ ਭੁੱਚੋਂ ਇਲਾਕੇ ਅਤੇ ਇੱਕ ਬਠਿੰਡਾ ਦਾ ਰਹਿਣ ਵਾਲਾ ਸੇ। ਥਾਣਾ ਕੈਂਟ ਦੀ ਪੁਲਿਸ ਵਲੋਂ ਮਾਮਲੇ ਦੀ ਕਾਰਵਾਈ ਕਰਦੇ ਹੋਏ ਲਾਸ਼ਾਂ ਵਾਰਸਾਂ ਨੂੰ ਸੌਂਪ ਦਿੱਤੀਆਂ ਗਈਆਂ। 

ਪ੍ਰਾਪਤ ਜਾਣਕਾਰੀ ਮੁਤਾਬਕ ਅੱਜ ਛੁੱਟੀ ਅਤੇ ਜ਼ਿਆਦਾ ਗਰਮੀ ਹੋਣ ਕਾਰਨ ਦੁਪਿਹਰ ਪੰਜ ਦੋਸਤਾਂ ਨੇ ਬਠਿੰਡਾ ਨਹਿਰ 'ਤੇ ਨਹਾਊਣ ਦਾ ਪ੍ਰੋਗਰਾਮ ਬਣਾਇਆ ਸੀ। ਇਹ ਸਾਰੇ ਦੋਸਤ ਬੀਬੀਵਾਲਾ ਦੀਆਂ ਝਾਲਾਂ ਕੋਲ ਚਲੇ ਗਏ। ਨਹਾਉਂਦੇ ਸਮੇਂ ਤਿੰਨ ਨੌਜਵਾਨਾਂ ਬੁੱਧ ਰਾਮ, ਹਰਪ੍ਰੀਤ ਸਿੰਘ ਤੇ   ਸੁਖਦੇਵ ਸਿੰਘ ਡੂੰਘੇ ਪਾਣੀ 'ਚ ਚਲੇ ਗਏ ਪ੍ਰੰਤੂ ਤੈਰਨਾ ਨਾ ਆਉਂਦਾ ਹੋਣ ਕਾਰਨ ਪਾਣੀ ਵਿਚ ਹੀ ਡੁੱਬ ਗਏ। ਸੂਤਰਾਂ ਅਨੁਸਾਰ ਇਨ੍ਹਾਂ ਦੇ ਦੋਵੇਂ ਸਾਥੀ ਘਬਰਾ ਗਏ।

ਸੁਖਦੇਵ ਸਿੰਘ ਵਾਸੀ ਠੰਢੀ ਸੜਕ ਬਠਿੰਡਾ ਵਿਆਹਿਆ ਹੋਇਆ ਸੀ ਜਦੋਂ ਕਿ ਦੂਜੇ ਸਾਥੀ ਬੁੱਧ ਰਾਮ ਤੇ ਹਰਪ੍ਰੀਤ ਹਾਲੇ ਕੁਆਰੇ ਸਨ। ਇਹ ਵੀ ਪਤਾ ਚਲਿਆ ਹੈ ਕਿ ਹਰਪ੍ਰੀਤ ਪੰਪ 'ਤੇ ਲੱਗਿਆ ਹੋਇਆ ਸੀ ਜਦੋਂ ਕਿ ਦੂਜੇ ਦੋਨੋ ਇੱਕ ਵਰਕਸ਼ਾਪ ਉਪਰ ਡੈਂਟਿੰਗ-ਪੈਟਿੰਗ ਦਾ ਕੰਮ ਕਰਦੇ ਸਨ। ਮਾਮਲੇ ਦੀ ਜਾਂਚ ਕਰ ਰਹੇ ਥਾਣਾ ਕੈਂਟ 'ਚ ਤੈਨਾਤ ਥਾਣੇਦਾਰ ਗੁਰਦਰਸ਼ਨ ਸਿੰਘ ਨੇ ਦਸਿਆ ਕਿ ਘਟਨਾ ਦੀ ਜਾਂਚ ਤੋਂ ਬਾਅਦ ਧਾਰਾ 174 ਦੀ ਕਾਰਵਾਈ ਕੀਤੀ ਗਈ ਹੈ।