ਸਿਵਲ ਸਰਜਨ ਦਫ਼ਤਰ ਮੁਲਾਜ਼ਮਾਂ ਵਲੋਂ ਸਰਕਾਰ ਵਿਰੁਧ ਰੋਸ ਧਰਨਾ 

ਹੁਸ਼ਿਆਰਪੁਰ, ਪੰਜਾਬ ਸਰਕਾਰ ਵਲੋਂ ਦਿਨੋ ਦਿਨ ਮੁਲਾਜ਼ਮਾਂ ਵਿਰੁਧ ਬੇਤਹਾਸ਼ਾ ਟੈਕਸ ਲਾਉਣ 'ਤੇ ਮੁਲਾਜ਼ਮਾਂ ਵਿਚ ਭਾਰੀ ਰੋਸ ਪਾਇਆ ਜਾ ਰਿਹਾ ਤੇ ਪਿਛਲੇ ਦਿਨੀ 200 ਰੁਪਏ ਵਿਕਾਸ ਟੈਕਸ ਲਗਾ ਕੇ ਮੁਲਾਜ਼ਮਾਂ ਦੀ ਸ਼ਰ੍ਹੇਆਮ ਲੁੱਟ ਕੀਤੀ ਜਾ ਰਹੀ ਹੈ। ਇਸ ਸਬੰਧ ਵਿੱਚ ਅੱਜ ਸਿਵਲ ਸਰਜਨ ਦਫ਼ਤਰ ਦੇ ਸਮੂਹ ਮੁਲਾਜ਼ਮਾਂ ਨੇ ਪੰਜਾਬ ਸਰਕਾਰ ਵਿਰੁਧ ਰੋਸ ਰੈਲੀ ਕੀਤੀ ਤੇ ਜੰਮ੍ਹ ਕੇ ਨਾਹਰੇਬਾਜ਼ੀ ਕੀਤੀ। 

ਇਸ ਮੌਕੇ ਪੈਰਾ ਮੈਡੀਕਲ ਦੇ ਅਰਗੇਨਾਈਜ਼ਰ ਬਸੰਤ ਕੁਮਾਰ ਨੇ ਦਸਿਆ ਕਿ ਪੰਜਾਬ ਸਰਕਾਰ ਭੁੱਖੀ ਨੰਗੀ ਹੋ ਚੁੱਕੀ ਹੈ ਤੇ ਹੁਣ ਮੁਲਾਜ਼ਮਾਂ ਦੇ ਬੇਵਜਾ ਟੈਕਸ ਲਗਾ ਕੇ ਤੰਗ ਕਰਨਾ ਸ਼ੁਰੂ ਕਰ ਦਿਤਾ ਜੋ ਕਿ ਮੁਲਾਜ਼ਮ ਵਰਗ ਕਦੀ ਵੀ ਬਰਦਾਸ਼ਤ ਨਹੀਂ ਕਰੇਗਾ। ਪੈਰਾ ਮੈਡੀਕਲ ਦੇ ਪ੍ਰਧਾਨ ਰਣਜੀਤ ਸਿੰਘ ਨੇ ਦਸਿਆ ਕਿ ਪੰਜਾਬ ਸਰਕਾਰ ਨੇ ਪਿਛਲੇ ਦੋ ਸਾਲਾ  ਤੋਂ ਕੋਈ ਮਹਿੰਗਾਈ ਭੱਤੇ  ਦੀ ਕਿਸ਼ਤ ਨਹੀ ਦਿਤੀ ਤੇ ਚੋਣਾਂ ਵੇਲੇ ਵਾਅਦਾ ਕੀਤਾ ਸੀ ਕਿ ਹਰ ਘਰ ਵਿਚ ਨੌਕਰੀ, ਕਿਸਾਨਾ ਦੀ ਆਤਮ ਹਤਿਆ  ਤੇ ਨਸ਼ਾ ਜੋ ਪੰਜਾਬ ਵਿਚ ਸ਼ਰ੍ਹੇਆਮ ਵਿੱਕ ਰਿਹਾ ਉਨ੍ਹਾਂ ਤੋਂ ਮੁੱਕਰ ਗਈ ਹੈ।

ਦਿਨੋ ਦਿਨ ਪੰਜਾਬ ਸਰਕਾਰ ਦੇ ਖ਼ਿਲਾਫ਼ ਮੁਲਾਜ਼ਮਾਂ ਦਾ ਰੋਸ ਵਧਦਾ ਜਾ ਰਿਹਾ ਹੈ ਸਰਕਾਰ ਵਲੋਂ ਮੁਲਾਜ਼ਮਾਂ ਦਾ ਧਿਆਨ ਭਟਕਾਉਣ ਲਈ ਕਦੇ ਡੋਪ ਟੈਸਟ ਤੇ ਹੋਰ ਕਈ ਤਰੀਕਿਆਂ ਨਾਲ ਪ੍ਰੇਸ਼ਾਨ ਕੀਤਾ ਜਾ ਰਿਹਾ ਹੈ। ਇਸ ਮੌਕੇ ਉਨ੍ਹਾਂ ਪੰਜਾਬ ਸਰਕਾਰ ਨੂੰ ਚਿਤਾਵਨੀ ਦਿੰਦੇ ਹੋਏ ਕਿਹਾ ਕਿ ਜੇਕਰ ਪੰਜਾਬ ਸਰਕਾਰ ਨੇ ਮੁਲਾਜ਼ਮ ਮਾਰੂ ਨੀਤੀਆ ਨਾ ਬੰਦ ਕੀਤੀਆ ਤੇ ਪੰਜਾਬ ਦਾ ਮੁਲਾਜ਼ਮ ਵੱਡੇ ਪੱਧਰ ਤੇ ਸੰਘਰਸ਼ ਕਰੇਗਾ  ਤੇ ਇਸ ਖਾਮਿਆਜ਼ਜਾ 2019 ਵਿਚ ਭੁਗਤਣਾ ਪਵੇਗਾ।

ਇਸ ਮੌਕੇ ਮਨਿਸਟੀਰੀਅਲ ਸਟਾਫ਼ ਵਲੋਂ ਰਜਿੰਦਰ ਕੌਰ, ਡਰਾਇਵਰ ਯੂਨੀਅਨ ਵਲਂੋ ਪਰਮਜੀਤ ਸਿੰਘ ਤੇ ਸਰਵਪ੍ਰੀਤ ਸਿੰਘ, ਜਸਵਿੰਦਰ ਸਿੰਘ, ਸੀਨੀਅਰ ਮੀਤ ਪ੍ਰਧਾਨ ਦੇਵ ਰਾਜ ਸਿੱਧੂ, ਅਸ਼ੋਕ ਕੁਮਾਰ, ਸੰਜੀਵ ਕੁਮਾਰ ਜਨਰਲ ਸਕੱਤਰ, ਵੀਨਾ , ਜੋਤੀ, ਬਿਮਲਾਦੇਵੀ, ਸੁਮਨ ਸੇਠੀ ਗਗਨ, ਰਕੇਸ਼ ਕੁਮਾਰ, ਵਿਸ਼ਾਲ ਪੁਰੀ ਆਦਿ ਹਾਜ਼ਰ ਸਨ।