ਕਾਂਗਰਸ ਕਿਸੇ ਨੂੰ ਵੀ ਸੀਐੱਮ ਬਣਾ ਲਵੇ, ਪੌਣੇ 5 ਸਾਲਾਂ 'ਚ ਡੱਕਾ ਤੱਕ ਨਹੀਂ ਤੋੜਿਆ: ਬਲਜਿੰਦਰ ਕੌਰ 

Baljinder Kaur

 

ਚੰਡੀਗੜ੍ਹ (ਸੁਰਖ਼ਾਬ ਚੰਨ)- ਪੰਜਾਬ 'ਚ 2022 ਦੀਆਂ ਚੋਣਾਂ ਨਜ਼ਦੀਕ ਆ ਰਹੀਆਂ ਹਨ ਤੇ ਸਾਰੀਆਂ ਪਾਰਟੀਆਂ ਸਰਗਰਮ ਹਨ ਤੇ ਇਕ ਦੂਜੇ 'ਤੇ ਵਾਅਦੇ ਪੂਰੇ ਨਾ ਕਰਨ ਨੂੰ ਲੈ ਕੇ ਤੰਜ਼ ਕੱਸ ਰਹੀਆਂ ਹਨ। ਆਮ ਆਦਮੀ ਪਾਰਟੀ ਵੀ 2022 'ਚ ਸੱਤਾ 'ਚ ਆਉਣ ਲਈ ਹਰ ਦਾਅ ਪੇਚ ਲਗਾ ਰਹੀ ਹੈ ਤੇ ਆਪ ਸੁਪ੍ਰੀਮੋ ਅਰਵਿੰਦ ਕੇਜਰੀਵਾਲ 3 ਵਾਰ ਪੰਜਾਬ ਆ ਚੁੱਕੇ ਹਨ ਤੇ ਪੰਜਾਬ ਦੇ ਲੋਕਾਂ ਨਾਲ ਕਈ ਵੱਡੇ ਦਾਅਵੇ ਕਰ ਚੁੱਕੇ ਹਨ। ਇਸੇ ਸਭ ਨੂੰ ਲੈ ਕੇ ਆਮ ਆਦਮੀ ਪਾਰਟੀ ਤੋਂ ਵਿਧਾਇਕ ਪ੍ਰੋ ਬਲਜਿੰਦਰ ਕੌਰ ਨਾਲ ਸਪੋਕਸਮੈਨ ਨੇ ਖਾਸ ਗੱਲਬਾਤ ਕੀਤੀ ਤੇ ਉਹਨਾਂ ਨੇ ਕਿਹਾ ਕਿ ਪੰਜਾਬ ਸਰਕਾਰ ਨੇ ਪਿਛਲੇ ਪੌਣੇ ਪੰਜ ਸਾਲਾਂ ਤੋਂ ਇਕ ਵੀ ਵਾਅਦਾ ਪੂਰਾ ਨਹੀਂ ਕੀਤਾ ਤੇ ਹੁਣ ਕੀ ਕਰ ਲੈਣਗੇ।

ਪਾਰਟੀ ਚਾਹੇ ਜਿਸ ਨੂੰ ਵੀ ਅਪਣਾ ਸੀਐੱਮ ਬਣਾ ਲਵੇ ਕੈਬਨਿਟ 'ਚ ਬਦਲਾਅ ਕਰ ਲਵੇ ਪਰ ਇਸ ਦਾ ਸਿੱਧਾ ਅਸਰ ਪੰਜਾਬ ਦੇ ਲੋਕਾਂ 'ਤੇ ਪੈ ਰਿਹਾ ਹੈ। ਉਹਨਾਂ ਕਿਹਾ ਕਿ ਕਾਂਗਰਸ ਦੇ ਕਾਟੋ ਕਲੇਸ਼ ਤੋਂ ਇੰਝ ਲੱਗ ਰਿਹਾ ਹੈ ਕਿ ਉਹ ਸਿਰਫ਼ ਅਪਣੀ ਸਿਆਸੀ ਜ਼ਮੀਨ ਬਚਾਉਣ ਦੀ ਕੋਸ਼ਿਸ਼ ਕਰ ਰਹੇ ਹਨ ਪਰ ਉਹਨਾਂ ਨੇ ਲੋਕਾਂ ਨੂੰ ਬੇਸਹਾਰਾ ਛੱਡ ਦਿੱਤਾ ਹੈ ਤੇ ਅਪਣੇ ਹੀ ਕਾਟੋ ਕਲੇਸ਼ ਵਿਚ ਰੁੱਝੇ ਹੋਏ ਹਨ। ਬਲਜਿੰਦਰ ਕੌਰ ਨੇ ਕਿਹਾ ਕਿ ਪਹਿਲਾਂ ਕੋਰੋਨਾ ਦਾ ਐਨਾ ਵੱਡਾ ਪ੍ਰਕੋਪ ਲੋਕਾਂ ਨੇ ਇਕੱਲਿਆਂ ਹੰਢਾਇਆ ਤੇ ਹੁਣ ਡੇਂਗੂ ਵਰਗੀ ਬਿਮਾਰੀ ਨਾਲ ਲੋਕ ਮਰ ਰਹੇ ਨੇ ਡੇਂਗੂ ਤਾਂ ਹਰ ਸਾਲ ਹੀ ਅਟੈਕ ਕਰਦਾ ਹੈ ਪਰ ਸਰਕਾਰ ਇਸ ਲਈ ਕੁੱਝ ਨਹੀਂ ਕਰ ਰਹੀ ਉਹ ਸਿਰਫ਼ ਅਪਣੇ ਹੀ ਕਲੇਸ਼ ਤੱਕ ਸੀਮਤ ਹੈ।

ਬਲਜਿੰਦਰ ਕੌਰ ਨੇ ਕਿਹਾ ਕਿ ਸਰਕਾਰ ਦਾਅਵੇ ਕਰ ਰਹੀ ਹੈ ਕਿ ਇਹਨਾਂ ਕੁੱਝ ਕੁ ਦਿਨਾਂ ਵਿਚ ਉਹ ਸਾਰੇ ਮਸਲੇ ਹੱਲ ਕਰ ਦੇਵੇਗੀ ਪਰ ਕਹਿਣ ਤੇ ਕਰਨ ਵਿਚ ਬਹੁਤ ਫਰਕ ਹੁੰਦਾ ਹੈ। ਉਹਨਾਂ ਕਿਹਾ ਕਿ ਅਮ ਆਦਨਮੀ ਪਾਰਟੀ ਜੋ ਸਿਰਫ਼ ਇਹ ਕਹਿੰਦੀ ਹੈ ਕਿ ਜੇ ਤੁਹਾਨੂੰ ਲੱਗਦਾ ਹੈ ਕਿ ਅਸੀਂ ਕੰਮ ਕੀਤਾ ਹੈ ਤਾਂ ਵੋਟ ਪਾ ਦਿਓ ਨਹੀਂ ਤਾਂ ਨਾ ਪਾਇਓ। ਉਹਨਾਂ ਕਿਹਾ ਕਿ ਅਮ ਆਦਮੀ ਪਾਰਟੀ ਇਕ ਅਜਿਹੀ ਪਾਰਟੀ ਹੈ ਉਹ ਜੋ ਕਹਿੰਦੀ ਹੈ ਕਰ ਕੇ ਦਿਖਾਉਂਦੀ ਤੇ ਇਹ ਤਾਂ ਵਰਲਡ ਰਿਕਾਰਡ ਹੈ। ਜਦੋਂ ਉਹਨਾਂ ਨੂੰ ਇਹ ਪੁੱਛਿਆ ਗਿਆ ਕਿ ਕੇਜਰੀਵਾਲ ਵੱਲੋਂ ਕੀਤੇ ਵਾਅਦਿਆਂ ਨੂੰ ਪੰਜਾਬ ਵਿਚ ਕਿਸ ਤਰ੍ਹਾਂ ਅਪਲਾਈ ਕਰੋਗੇ

ਤਾਂ ਉਹਨਾਂ ਕਿਹਾ ਕਿ ਇਹ ਤਾਂ ਸਭ ਨੂੰ ਪਤਾ ਹੈ ਕਿ ਪੰਜਾਬ ਤੇ ਦਿੱਲੀ ਦੇ ਹਾਲਾਤ ਅਲੱਗ ਹਨ ਪਰ ਜੇ ਦਿੱਲੀ ਦੇ ਲੋਕਾਂ ਨੂੰ ਸਿਹਤ ਸਹੂਲਤਾਂ ਚਾਹੀਦੀਆਂ ਤੇ ਸਿੱਖਿਆ ਚਾਹੀਦੀ ਹੈ ਤਾਂ ਉਹ ਪੰਜਾਬ ਦੇ ਲੋਕਾਂ ਨੂੰ ਵੀ ਚਾਹੀਦੀ ਹੈ। ਪੰਜਾਬ ਵਿਚ ਤਾਂ ਸਿੱਖਿਆ ਦਾ ਸਿਸਟਮ ਬਿਲਕੁਲ ਖ਼ਤਮ ਹੈ, ਸਿਹਤ ਸੇਵਾਵਾਂ ਬਿਲਕੁਲ ਸਹੀ ਨਹੀਂ। ਅਸੀਂ ਚਾਹੁੰਦੇ ਹਾਂ ਕਿ ਲੋਕਾਂ ਨੂੰ ਸਰਕਾਰ ਦੇ ਕੰਮ ਤੋਂ ਸਕੂਲ ਮਿਲੇ ਉਹਨਾਂ ਨੂੰ ਯਕੀਨ ਹੋਵੇ ਕਿ ਸਰਕਾਰ ਸਾਡੇ ਲਈ ਕੰਮ ਕਰ ਰਹੀ ਹੈ। ਉਹਨਾਂ ਨੇ ਇਹ ਸਪੱਸ਼ਟ ਤੌਰ 'ਤੇ ਕਿਹਾ ਕਿ ਆਮ ਆਦਮੀ ਪਾਰਟੀ ਪੰਜਾਬ ਨਾਲ ਖੜ੍ਹੀ ਹੈ, ਖੜ੍ਹੀ ਸੀ ਤੇ ਖੜ੍ਹੀ ਰਹੂਗੀ।