ਮਾਰਚ ਤੋਂ 12-14 ਸਾਲ ਦੇ ਉਮਰ ਵਰਗ ਦੇ ਬੱਚਿਆਂ ਲਈ ਟੀਕਾਕਰਨ ਹੋ ਸਕਦਾ ਹੈ ਸ਼ੁਰੂ

ਨਵੀਂ ਦਿੱਲੀ, 17 ਜਨਵਰੀ : ਟੀਕਾਕਰਨ ਸਬੰਧੀ ਰਾਸ਼ਟੀਰ ਤਕਨੀਕੀ ਸਲਾਹਕਾਰ ਸਮੂਹ ਦੇ ਕੋਵਿਡ 19 ਕਾਰਜਸਮੂਹ ਦੇ ਪ੍ਰਧਾਨ ਡਾ.ਐਨ.ਕੇ. ਅਰੋੜਾ ਨੇ ਸੋਮਵਾਰ ਨੂੰ ਕਿਹਾ ਕਿ ਭਾਰਤ ਵਿਚ ਮਾਰਚ ’ਚ 12-14 ਉਮਰ ਵਰਗ ਦੇ ਬੱਚਿਆਂ ਦਾ ਕੋਵਿਡ ਵਿਰੁਧ ਟੀਕਾਕਰਨ ਸ਼ੁਰੂ ਕੀਤਾ ਜਾ ਸਕਦਾ ਹੈ ਕਿਉਂਕਿ ਉਸ ਸਮੇਂ ਤਕ 15 ਤੋਂ 18 ਸਾਲ ਦੀ ਆਬਾਦੀ ਦੇ ਪੂਰੀ ਤਰ੍ਹਾਂ ਨਾਲ ਟੀਕਾਕਰਨ ਹੋਣ ਜਾਣ ਦਾ ਅੰਦਾਜ਼ਾ ਹੈ। ਉਨ੍ਹਾਂ ਕਿਹਾ ਕਿ 15 ਤੋਂ 18 ਸਾਲ ਦੇ ਉਮਰ ਵਰਗ ’ਚ ਅਨੁਮਾਨਤ 7.4 ਕਰੋੜ ਆਬਾਦੀ ਵਿਚੋਂ 3.45 ਕਰੋੜ ਤੋਂ ਵੱਧ ਨੂੰ ਹੁਣ ਤਕ ਕੋਵੈਕਸੀਨ ਦੀ ਪਹਿਲੀ ਖ਼ੁਰਾਕ ਦਿਤੀ ਜਾ ਚੁਕੀ ਹੈ ਅਤੇ ਉਨ੍ਹਾਂ ਨੂੰ 28 ਦਿਨਾਂ ’ਚ ਦੂਜੀ ਖ਼ੁਰਾਕ ਦਿਤੀ ਜਾਣੀ ਹੈ। ਉਨ੍ਹਾਂ ਕਿਹਾ, ‘‘ਇਸ ਉਮਰ ਵਰਗ ਦੇ ਬੱਚੇ ਟੀਕਾਕਰਨ ’ਚ ਖ਼ੁਸ਼ੀ ਖ਼ੁਸ਼ੀ ਹਿੱਸਾ ਲੈ ਰਹੇ ਹਨ ਅਤੇ ਟੀਕਾਕਰਨ ਦੀ ਇਸ ਰਫ਼ਤਾਰ ਨੂੰ ਦੇਖਦੇ ਹੋਏ, 15 ਤੋਂ 18 ਸਾਲ ਦੇ ਉਮਰ ਵਰਗ ਦੇ ਬਾਕੀ ਯੋਗ ਬੱਚਿਆਂ ਨੂੰ ਜਨਵਰੀ ਦੇ ਆਖ਼ਰ ਤਕ ਪਹਿਲੀ ਖ਼ੁਰਾਕ ਲੱਗ ਜਾਣ ਦੀ ਸੰਭਾਵਨਾ ਹੈ ਅਤੇ ਉਸ ਦੇ ਬਾਅਦ ਉਨ੍ਹਾਂ ਦੀ ਦੂਜੀ ਖ਼ੁਰਾਕ ਫ਼ਰਵਰੀ ਦੇ ਆਖ਼ਰ ਤਕ ਦਿਤੇ ਜਾਣ ਦੀ ਉਮੀਦ ਹੈ।’’ ਅਰੋੜਾ ਨੇ ਕਿਹਾ ਕਿ 15 ਤੋਂ 18 ਦੇ ਬੱਚਿਆਂ ਦਾ ਟੀਕਾਕਰਨ ਹੋ ਜਾਣ ਦੇ ਬਾਅਦ, ਸਰਕਾਰ ਮਾਰਚ ’ਚ 12 ਤੋਂ 14 ਸਾਲ ਦੇ ਬੱਚਿਆਂ ਲਈ ਟੀਕਾਕਰਨ ਮੁਹਿੰਮ ਸ਼ੁਰੂ ਕਰਨ ਬਾਰੇ ਫ਼ੈਸਲਾ ਲੈ ਸਕਦੀ ਹੈ। (ਏਜੰਸੀ)