ਸੰਗਰੂਰ:ਇਸ ਸਰਪੰਚ ਨੇ ਪਿੰਡ ਨੂੰ ਬਣਾ ਦਿੱਤਾ ਮਿੰਨੀ ਚੰਡੀਗੜ੍ਹ, ਕਰ ਦਿੱਤੇ ਪਿੰਡ ਦੇ ਅਧੂਰੇ ਕੰਮ ਪੂਰੇ
ਪਿੰਡ ਦਾ ਸਰਪੰਚ ਲੋਕਾਂ ਘਰ ਜਾ ਖੁਦ ਕਰਦਾ ਬਿਜਲੀ ਠੀਕ
ਸੰਗਰੂਰ( ਚਰਨਜੀਤ ਸਿੰਘ ਸੁਰਖਾਬ) ਅੱਜ ਪੰਜਾਬ ਦੀ ਨੌਜਵਾਨ ਪੀੜੀ ਬਾਹਰ ਜਾ ਕੇ ਚੰਗਾ ਭਵਿੱਖ ਬਣਾਉਣਾ ਚਾਹੁੰਦੀ ਹੈ ਕਿਉਂਕਿ ਉਹਨਾਂ ਨੂੰ ਪੰਜਾਬ ਵਿਚ ਆਪਣਾ ਭਵਿੱਖ ਧੁੰਦਲਾ ਵਿਖਾਈ ਦਿੰਦਾ ਹੈ ਪਰ ਪੰਜਾਬ ਦੇ ਬਹੁਤੇ ਨੌਜਵਾਨ ਅਜਿਹੇ ਵੀ ਹਨ ਜੋ ਪੰਜਾਬ ਦੀ ਨੁਹਾਰ ਬਦਲ ਕੇ ਇਸਨੂੰ ਕੈਨੇਡਾ, ਅਮਰੀਕਾ ਵਰਗਾ ਬਣਾਉਣਾ ਚਾਹੁੰਦੇ ਹਨ। ਅਜਿਹਾ ਹੀ ਜ਼ਿਲ੍ਹਾ ਸੰਗਰੂਰ ਦੇ ਪਿੰਡ ਛਾਹਾਰ ਦਾ ਨੌਜਵਾਨ ਸਰਪੰਚ ਪ੍ਰੀਤਮ ਸਿੰਘ ਹੈ। ਜਿਸਨੇ ਢਾਈ ਸਾਲਾਂ ਵਿਚ ਆਪਣੇ ਪਿੰਡ ਦੀ ਨੁਹਾਰ ਬਦਲ ਦਿੱਤੀ।
ਆਪਣੇ ਪਿੰਡ ਵਿਚ ਵਿਕਾਸ ਕਰਵਾਇਆ ਤੇ ਹੁਣ ਵੀ ਕਰਵਾ ਰਹੇ ਹਨ। ਰੋਜ਼ਾਨਾ ਸਪੋਕਸਮੈਨ ਨਾਲ ਗੱਲਬਾਤ ਕਰਦਿਆਂ ਸਰਪੰਚ ਪ੍ਰੀਤਮ ਸਿੰਘ ਨੇ ਦੱਸਿਆ ਕਿ ਜਦੋਂ ਕੋਈ ਹੋਰ ਸਰਪੰਚ ਹੁੰਦਾ ਤਾਂ ਸਾਰਿਆਂ ਦੇ ਮਨ ਵਿਚ ਇਕ ਹੀ ਖਿਆਲ ਹੁੰਦਾ ਵੀ ਜੇ ਮੈਂ ਸਰਪੰਚ ਬਣਾਂਗਾ ਤਾਂ ਪਿੰਡ ਦਾ ਵਿਕਾਸ ਕਰਵਾਂਗਾ ਪਰ ਜਦੋਂ ਉਹ ਸਰਪੰਚ ਬਣ ਜਾਂਦਾ ਤਾਂ ਉਸਦੀਆਂ ਕਹੀਆਂ ਗੱਲਾਂ ਵੀ ਦੂਜੇ ਸਰਪੰਚਾਂ ਵਾਂਗੂ ਲਾਰੇ ਬਣ ਕੇ ਰਹਿ ਜਾਂਦੀਆਂ ਹਨ।
ਪਿੰਡ ਦਾ ਕੋਈ ਵਿਕਾਸ ਨਹੀਂ ਹੁੰਦਾ। ਪਰ ਅਸੀਂ ਇਕ ਵੱਖਰੀ ਸੋਚ ਲੈ ਕੇ ਚੱਲੇ ਸੀ ਕਿ ਪਿੰਡ ਵਿਚ ਬਦਲਾਅ ਲੈ ਕੇ ਆਵਾਂਗੇ ਜੋ ਕਿ ਵੱਡੇ ਪੱਧਰ ਤੇ ਲੈ ਕੇ ਵੀ ਆਏ ਹਾਂ। ਉਹਨਾਂ ਕਿਹਾ ਕਿ ਮੈਂ ਜਦੋਂ ਸਰਪੰਚ ਨਹੀਂ ਬਣਿਆ ਸੀ ਤਾਂ ਮੈਂ ਵੇਖਦਾ ਹੁੰਦਾ ਸੀ ਕਿ ਪਿੰਡ ਦੇ ਸਕੂਲਾਂ ਵਿਚ ਕੋਈ ਚੰਗਾ ਪ੍ਰਬੰਧ ਨਹੀਂ , ਕੋਈ ਸਿਹਤ ਸਹੂਲਤ ਨਹੀਂ ਤੇ ਜਦੋਂ ਮੈਂ ਸਰਪੰਚ ਬਣਿਆ ਮੈਂ ਇਹਨਾਂ ਵੱਲ ਧਿਆਨ ਦਿੱਤਾ ਅੱਜ ਪਿੰਡ ਵਿਚ ਵਧੀਆਂ ਸਕੂਲ, ਸਿਹਤ ਸਹੂਲਤਾਂ ਹਨ। ਸਰਪੰਚ ਬਣਨ ਤੋਂ ਇਕ ਸਾਲ ਬਾਅਦ ਪਿੰਡ ਦੀਆਂ ਕੱਚੀਆਂ ਗਲੀਆਂ -ਸੜਕਾਂ ਨੂੰ ਪੱਕਾ ਕਰ ਦਿੱਤਾ।
ਪਿੰਡ ਦੀਆਂ ਬਜ਼ੁਰਗ ਔਰਤਾਂ ਨੇ ਗੱਲਬਾਤ ਕਰਦਿਆਂ ਕਿਹਾ ਕਿ ਪਿੰਡ ਦਾ ਸਰਪੰਚ ਬਹੁਤ ਹੀ ਵਧੀਆਂ ਹੈ। ਉਸਨੇ ਪਿੰਡ ਵਿਚ ਬਹੁਤ ਵਿਕਾਸ ਕਰਵਾਏ। ਸਾਰਿਆਂ ਦਾ ਕਹਿਣਾ ਸੁਣਦਾ ਹੈ ਤੇ ਉਸਨੂੰ ਪੂਰਾ ਵੀ ਕਰਦਾ ਹੈ। ਪਿੰਡ ਵਿਚ ਪਾਰਕ, ਸਟੇਡੀਅਮ ਦੇ ਵਧੀਆਂ ਪ੍ਰਬੰਧ ਕੀਤੇ।
ਪਿੰਡ ਨੂੰ ਪਹਿਲਾਂ ਨਾਲੋਂ ਪੂਰਾ ਬਦਲ ਦਿੱਤਾ। ਜੇ ਅੱਧੀ ਰਾਤ ਨੂੰ ਟਰਾਂਸਫਾਰਮ ਖਰਾਬ ਹੋ ਜਾਵੇ ਤਾਂ ਸਰਪੰਚ ਆਪ ਆ ਕੇ ਉਸਨੂੰ ਠੀਕ ਕਰਦਾ ਪੂਰੇ ਪਿੰਡ ਨੂੰ ਗਰਮੀ ਵਿਚ ਨਹੀਂ ਮਰਨ ਦਿੰਦਾ। ਪਿੰਡ ਦੇ ਬੱਚਿਆਂ ਨੇ ਦੱਸਿਆ ਕਿ ਪਿੰਡ ਦਾ ਸਕੂਲ ਬਹੁਤ ਵਧੀਆਂ ਹੈ।
ਸਕੂਲ ਵਿਚ ਸਾਰੇ ਪ੍ਰਬੰਧ ਹਨ। ਪੜਾਉਣ ਲ਼ਈ ਅਧਿਆਪਕ ਵੀ ਮਿਹਨਤੀ ਹਨ। ਪਿੰਡ ਦੇ ਵਸਨੀਕ ਗੁਰਮੇਲ ਸਿੰਘ ਨੇ ਦੱਸਿਆ ਕਿ ਸਰਪੰਚ ਪ੍ਰੀਤਮ ਸਿੰਘ ਨੇ ਪਿੰਡ ਦੀਆਂ ਗਲੀਆਂ- ਨਾਲੀਆਂ ਪੱਕੀਆਂ ਕਰਵਾਈਆਂ।
ਉਹਨਾਂ ਕਿਹਾ ਕਿ ਵੋਟਾਂ ਲੈਣ ਵੇਲੇ ਸਾਡੇ ਨਾਲ ਵਾਅਦੇ ਕਰ ਜਾਂਦੇ ਸੀ ਪਰ ਜਦੋਂ ਸਰਪੰਚ ਬਣ ਜਾਂਦੇ ਹਨ ਉਦੋਂ ਕੋਈ ਸਿਆਣਦਾ ਨਹੀਂ ਸੀ ਪਰ ਇਸ ਨੌਜਵਾਨ ਸਰਪੰਚ ਨੇ ਸਾਰੇ ਅਧੂਰੇ ਕੰਮ ਪੂਰੇ ਕਰਵਾਏ। ਲੋਕਾਂ ਦੀਆਂ ਗੱਲਾਂ ਤੇ ਖਰਾ ਉਤਰਿਆ। ਸੱਥ ਵਿਚ ਬੈਠੇ ਬਜ਼ੁਰਗ ਕੌਰ ਸਿੰਘ ਨੇ ਦੱਸਿਆ ਕਿ ਪਿੰਡ ਦਾ ਨੌਜਵਾਨ ਸਰਪੰਚ ਜਦੋਂ ਦਾ ਸਰਪੰਚ ਬਣਿਆ ਉਦੋਂ ਤੋਂ ਹੀ ਪਿੰਡ ਤਰੱਕੀ ਦੀ ਰਾਹ ਤੇ ਹੈ।
ਪਿੰਡ ਵਿਚ ਬਹੁਤ ਵਿਕਾਸ ਹੋਇਆ। ਉਹਨਾਂ ਕਿਹਾ ਕਿ ਸਰਪੰਚ ਦੇ ਕੀਤੇ ਕੰਮ ਬੋਲਦੇ ਹਨ। ਉਹਨਾਂ ਕਿਹਾ ਕੇ ਪ੍ਰੀਤਮ ਸਿੰਘ ਨੇ ਮੈਂਬਰੀ 'ਚ ਵੀ ਬਹੁਤ ਕੰਮ ਕੀਤੇ। ਇਸਨੇ ਉਹ ਕੰਮ ਵੀ ਕਰ ਦਿੱਤੇ ਜਿਸਦੇ ਬਾਰੇ ਸੋਚਿਆ ਨਹੀਂ ਸੀ ਵੀ ਇਹ ਕੰਮ ਹੋ ਜਾਣਗੇ। ਅੱਧੀ ਰਾਤ ਨੂੰ ਬਿਜਲੀ ਖਰਾਬ ਹੋ ਜਾਵੇ ਤਾਂ ਆਪ ਆ ਕੇ ਉਸਨੂੰ ਠੀਕ ਕਰਦਾ, ਇਹ ਲੋਕ ਸੇਵਾ ਕਰਦਾ। ਬਜ਼ੁਰਗਾਂ ਨੇ ਕਿਹਾ ਕਿ ਪਿੰਡ ਵਿਚ ਸਕੂਲ ਬਹੁਤ ਸੋਹਣਾ ਬਣਾਇਆ ਤੇ ਉਸ ਵਿਚ ਸਾਰੇ ਪ੍ਰਬੰਧ ਕੀਤੇ।
ਪਿੰਡ ਦੇ ਸਰਕਾਰੀ ਸਕੂਲ ਦੇ ਬੱਚਿਆਂ ਲਈ ਸਕੂਲ ਵੈਨ ਵੀ ਚਲਾਈ ਗਈ। ਜਿਸ ਨਾਲ ਬਹੁਤ ਸਾਰੇ ਪ੍ਰਾਈਵੇਟ ਸਕੂਲਾਂ ਤੋਂ ਬੱਚੇ ਹੱਟ ਕੇ ਸਰਕਾਰੀ ਸਕੂਲ ਵਿਚ ਲੱਗੇ। ਉਹਨਾਂ ਕਿਹਾ ਕਿ ਜੇ ਪ੍ਰੀਤਮ ਸਿੰਘ ਵਰਗੇ ਪੜ੍ਹੇ ਲਿਖੇ ਨੌਜਵਾਨ ਪਿੰਡ ਦੇ ਸਰਪੰਚ ਬਣਨ ਤਾਂ ਪੰਜਾਬ ਸੋਹਣੇ ਦੀ ਚਿੜੀ ਬਣ ਸਕਦਾ।
ਛਾਹਾਰ ਦੇ ਸਰਕਾਰੀ ਸਕੂਲ ਦੇ ਮੁੱਖ ਅਧਿਆਪਕ ਨੇ ਦੱਸਿਆ ਕਿ ਸਰਪੰਚ ਨੇ ਸਕੂਲ ਦੀ ਨੁਹਾਰ ਬਦਲ ਦਿੱਤੀ। ਹਰ ਵੇਲੇ ਕੋਈ ਨਾ ਕੋਈ ਕੰਮ ਹੁੰਦਾ ਰਹਿੰਦਾ। ਜੇ ਉਹਨਾਂ ਨੂੰ ਕਹਿ ਦੇਈਏ ਵੀ ਇਹ ਕੰਮ ਹੋਣਾ ਚਾਹੀਦਾ ਤਾਂ ਉਹ ਤੁਰੰਤ ਨਾਲ ਲੱਗ ਕੇ ਉਹ ਕੰਮ ਕਰਵਾਉਂਦੇ ਹਨ। ਨੌਜਵਾਨ ਸਰਪੰਚ ਨੇ ਕਿਹਾ ਕਿ ਸਰਪੰਚੀ ਲੋਕਾਂ ਨੂੰ ਰਾਸ ਆ ਗਈ ਇਹ ਮੇਰੇ ਲਈ ਬਹੁਤ ਵੱਡੀ ਗੱਲ ਹੈ।