ਕੋਟਕਪੂਰਾ, 18 ਜੂਨ (ਗੁਰਿੰਦਰ ਸਿੰਘ) : ਬਹਿਬਲ ਗੋਲੀਕਾਂਡ 'ਚ ਐਸਆਈਟੀ ਵਲੋਂ ਗ੍ਰਿਫਤਾਰ ਕੀਤੇ ਨੋਜਵਾਨ ਵਕੀਲ ਸੁਹੇਲ ਸਿੰਘ ਬਰਾੜ ਦੇ 21 ਜੂਨ ਤੱਕ ਮਿਲੇ ਪੁਲਿਸ ਰਿਮਾਂਡ ਤੋਂ ਬਾਅਦ ਵਿਸ਼ੇਸ਼ ਜਾਂਚ ਟੀਮ ਨੇ ਹੁਣ ਬਹਿਬਲ ਗੋਲੀਕਾਂਡ ਦੀ ਕਹਾਣੀ ਨੂੰ ਗਲਤ ਰੰਗਤ ਦੇਣ, ਮ੍ਰਿਤਕ ਨੌਜਵਾਨਾਂ ਦੇ ਪੋਸਟਮਾਰਟਮ ਦੌਰਾਨ ਸਰੀਰ 'ਚੋਂ ਨਿਕਲੀਆਂ ਗੋਲੀਆਂ ਦੀ ਟੈਂਪਰਿੰਗ ਕਰਨ, ਪੁਲਿਸ ਅਤੇ ਸਿਆਸਤਦਾਨਾ ਦੇ ਤਾਲਮੇਲ, ਸਬੂਤ ਖਤਮ ਕਰ ਕੇ ਨਵੇਂ ਸਬੂਤ ਤਿਆਰ ਕਰਨ ਵਰਗੇ ਅਜਿਹੇ ਮਾਮਲਿਆਂ ਦੀ ਤਫਤੀਸ਼ 'ਤੇ ਜੋਰ ਦੇ ਦਿੱਤਾ ਹੈ, ਜੋ ਆਮ ਲੋਕਾਂ ਲਈ ਬੜੇ ਰਹੱਸਮਈ ਅਤੇ ਅਸਚਰਜ ਹੋਣਗੇ।
ਜਾਂਚ ਟੀਮ ਵਲੋਂ ਅਦਾਲਤ 'ਚ ਪੇਸ਼ ਕੀਤੀ ਚਲਾਨ ਰਿਪੋਰਟ 'ਚ ਪਹਿਲਾਂ ਹੀ ਦਾਅਵਾ ਕੀਤਾ ਜਾ ਚੁੱਕਾ ਹੈ ਕਿ ਪੁਲਿਸ ਨੇ ਧਰਨਾਕਾਰੀਆਂ ਵਲੋਂ ਪਹਿਲਾਂ ਫਾਇਰਿੰਗ ਕਰਨ, ਐਸਐਸਪੀ ਦੀ ਪਾਇਲਟ ਗੱਡੀ ਉੱਪਰ ਫਾਇਰਿੰਗ ਕਰਕੇ ਨੁਕਸਾਨ ਪਹੁੰਚਾਉਣ, ਆਤਮ ਰੱਖਿਆ ਲਈ ਪੁਲਿਸ ਵਲੋਂ ਗੋਲੀ ਚਲਾਉਣ, ਪੁਲਿਸ ਦੀਆਂ ਗੱਡੀਆਂ ਨੂੰ ਅੱਗ ਲੱਗਣ ਵਰਗੀਆਂ ਸਾਰੀਆਂ ਕਹਾਣੀਆਂ ਝੂਠੀਆਂ ਤੇ ਫ਼ਰਜ਼ੀ ਸਨ।
ਕਿਉਂਕਿ ਜਾਂਚ ਟੀਮ ਕੋਲ ਮੌਕੇ ਦੇ ਗਵਾਹਾਂ ਵਲੋਂ ਦਿੱਤੇ ਬਿਆਨਾ 'ਚ ਸਪੱਸ਼ਟ ਹੋ ਚੁੱਕਾ ਹੈ ਕਿ ਪੁਲਿਸ ਨੇ ਆਪਣੀ ਆਤਮ ਰੱਖਿਆ ਲਈ ਧਰਨਾਕਾਰੀਆਂ 'ਤੇ ਗੋਲੀ ਨਹੀਂ ਚਲਾਈ, ਸਗੋਂ ਸ਼ਾਂਤਮਈ ਧਰਨੇ 'ਤੇ ਬੈਠੇ ਧਰਨਕਾਰੀਆਂ ਉੱਪਰ ਫਾਇਰਿੰਗ ਕਰਕੇ ਦੋ ਨੌਜਵਾਨਾ ਨੂੰ ਮਾਰ ਦਿੱਤਾ ਅਤੇ ਕੁਝ ਜ਼ਖ਼ਮੀ ਹੋ ਗਏ। ਪੁਲਿਸ ਨੇ ਖੁਦ ਆਪਣੀ ਜਿਪਸੀ ਉੱਪਰ ਗੋਲੀਆਂ ਮਾਰ ਕੇ ਝੂਠੀ ਕਹਾਣੀ ਘੜੀ ਤਾਂ ਕਿ ਸਾਰਾ ਦੋਸ਼ ਆਮ ਲੋਕਾਂ ਅਰਥਾਤ ਧਰਨਾਕਾਰੀਆਂ 'ਤੇ ਆ ਜਾਵੇ।
ਪੁਲਿਸ ਰਿਮਾਂਡ ਲੈਣ ਤੋਂ ਪਹਿਲਾਂ ਸੁਹੇਲ ਸਿੰਘ ਬਰਾੜ ਦਾ ਕੋਰੋਨਾ ਵਾਇਰਸ ਦੀ ਜਾਂਚ ਸਬੰਧੀ ਸੈਂਪਲ ਲੈਣ ਲਈ ਮੈਡੀਕਲ ਚੈੱਕਅਪ ਵੀ ਕਰਵਾਇਆ ਗਿਆ। ਜਾਂਚ ਟੀਮ ਨੇ ਅਦਾਲਤ ਨੂੰ ਇਹ ਵੀ ਦੱਸਿਆ ਕਿ ਸਰਕਾਰੀ ਜਿਪਸੀ 'ਚ ਗੋਲੀਆਂ ਐਸ.ਪੀ. ਬਿਕਰਮਜੀਤ ਸਿੰਘ ਵਲੋਂ ਮਾਰੀਆਂ ਗਈਆਂ ਅਤੇ ਇਹ ਸਾਰੀ ਕਾਰਵਾਈ ਰਾਤ ਸਮੇਂ ਸੁਹੇਲ ਸਿੰਘ ਦੇ ਘਰ ਹੋਈ। ਸੂਤਰਾਂ ਮੁਤਾਬਿਕ ਹੁਣ ਜਾਂਚ ਟੀਮ ਸੁਹੇਲ ਸਿੰਘ ਬਰਾੜ ਅਤੇ ਐਸ.ਪੀ. ਬਿਕਰਮਜੀਤ ਸਿੰਘ ਨੂੰ ਆਹਮੋ ਸਾਹਮਣੇ ਬਿਠਾ ਕੇ ਵੀ ਪੁੱਛਗਿੱਛ ਕਰ ਸਕਦੀ ਹੈ।
ਜਾਂਚ ਟੀਮ ਕੋਲ ਆਏ ਗਵਾਹਾਂ ਦੇ ਬਿਆਨਾ ਮੁਤਾਬਿਕ ਪੁਲਿਸ ਦੀ ਜਿਪਸੀ 'ਤੇ ਗੋਲੀਆਂ ਮਾਰਨ ਦਾ ਸਬੰਧ ਪੰਕਜ ਮੋਟਰਜ਼ ਫਰੀਦਕੋਟ ਦੇ ਮੁਲਾਜ਼ਮਾਂ ਨਾਲ ਵੀ ਜੁੜਿਆ ਹੋਇਆ ਹੈ। ਹੁਣ ਜਾਂਚ ਟੀਮ ਵਲੋਂ ਪੰਕਜ ਮੋਟਰਜ਼ ਦੇ ਮੁਲਾਜਮਾਂ ਦੀ ਗ੍ਰਿਫਤਾਰੀ ਲਈ ਕਾਰਵਾਈ ਸ਼ੁਰੂ ਕਰਨ ਦੀ ਖਬਰ ਵੀ ਮਿਲ ਰਹੀ ਹੈ। ਪੁਲਿਸ ਦੀ ਗੋਲੀ ਨਾਲ ਮਾਰੇ ਗਏ ਦੋ ਸਿੱਖ ਨੌਜਵਾਨਾਂ ਕ੍ਰਮਵਾਰ ਗੁਰਜੀਤ ਸਿੰਘ ਬਿੱਟੂ ਦੇ ਪਿਤਾ ਸਾਧੂ ਸਿੰਘ ਸਰਾਵਾਂ ਅਤੇ ਕਿਸ਼ਨ ਭਗਵਾਨ ਸਿੰਘ ਨਿਆਮੀਵਾਲਾ ਦੇ ਬੇਟੇ ਸੁਖਰਾਜ ਸਿੰਘ ਮੁਤਾਬਿਕ ਉਨਾਂ ਨੂੰ ਆਈ.ਜੀ. ਕੁੰਵਰਵਿਜੈ ਪ੍ਰਤਾਪ ਸਿੰਘ ਦੀ ਅਗਵਾਈ ਵਾਲੀ ਟੀਮ ਵਲੋਂ ਕੀਤੀ ਜਾ ਰਹੀ ਜਾਂਚ ਉੱਪਰ ਪੂਰਾ ਭਰੋਸਾ ਹੈ।