ਸਰਕਾਰੀ ਹਸਪਤਾਲ ਦੇ ਫ਼੍ਰੀਜ਼ਰ 'ਚ ਬੱਚੇ ਦੀ ਲਾਸ਼ ਰੱਖ ਕੇ ਭੁਲਿਆ ਸਟਾਫ਼

ਇੰਦੌਰ, 18 ਸਤੰਬਰ : ਮੱਧ ਪ੍ਰਦੇਸ਼ ਦੇ ਇੰਦੌਰ ਵਿਚ ਮਹਾਰਾਜਾ ਯਸ਼ਵੰਤ ਰਾਉ ਹਸਪਤਾਲ  ਦੇ ਮੁਰਦਾਘਰ ਵਿਚ ਹਾਲ ਹੀ ਵਿਚ ਇਕ ਲਵਾਰਸ ਸਰੀਰ ਦੇ ਸਟ੍ਰੈਰਚਰ ਉਤੇ ਸੜਨ ਅਤੇ ਪਿੰਜਰ ਬਣਨ ਦਾ ਮਾਮਲਾ ਸਾਹਮਣੇ ਆਇਆ ਸੀ। ਜਿਸ ਦੀਆਂ ਤਸਵੀਰਾਂ ਸੋਸ਼ਲ ਮੀਡੀਆ 'ਤੇ ਵੀ ਵਾਇਰਲ ਹੋਈਆਂ ਸਨ। ਇਸ ਮਾਮਲੇ ਦੀ ਜਾਂਚ ਹਾਲੇ ਪੂਰੀ ਨਹੀਂ ਹੋ ਸਕੀ, ਉਥੇ ਇਕ ਅਣਪਛਾਤੇ ਬੱਚੇ ਦੀ ਲਾਸ਼ ਮੁਰਦਾਘਰ ਵਿਚ ਬਣੇ ਇਕ ਡੱਬੇ ਵਿਚ ਬੰਦ ਪਈ ਮਿਲੀ। ਦਸਿਆ ਜਾ ਰਿਹਾ ਹੈ ਕਿ ਪਿਛਲੇ ਪੰਜ ਦਿਨਾਂ ਤੋਂ ਇਕ ਬੱਚੇ ਦੀ ਲਾਸ਼ ਨੂੰ ਮੋਰਚਰੀ ਵਾਲੇ ਕਮਰੇ ਦੇ ਫ਼੍ਰੀਜ਼ਰ ਵਿਚ ਰਖਿਆ ਹੋਇਆ ਸੀ। ਮੀਡੀਆ ਰਿਪੋਰਟਾਂ ਅਨੁਸਾਰ ਨਵਜੰਮੇ ਬੱਚੇ ਦੀ ਮੌਤ 5 ਦਿਨ ਪਹਿਲਾਂ ਯਾਨੀ 12 ਸਤੰਬਰ ਨੂੰ ਹੋਈ ਸੀ। ਅਜਿਹੀ ਸਥਿਤੀ ਵਿਚ ਬੱਚੇ ਦੀ ਲਾਸ਼ ਪੰਜ ਦਿਨਾਂ ਤੋਂ ਉਸੇ ਹਾਲਤ ਵਿਚ ਫ਼੍ਰੀਜ਼ਰ ਵਿਚ ਪਈ ਰਹੀ।