ਪੁਰਾਣੀ ਰੰਜਿਸ਼ ਤਹਿਤ ਨੌਜਵਾਨ ਨੂੰ ਦਰਿਆ ਵਿਚ ਡਬੋ ਕੇ ਮਾਰਿਆ

ਤਾਰਾਗੜ੍ਹ, 20 ਮਈ (ਪਪ): ਪੁਰਾਣੀ ਰੰਜਿਸ਼ ਨੂੰ ਲੈ ਕੇ ਕਸਬਾ ਤਾਰਾਗੜ੍ਹ ਵਿਚ ਪੈਂਦੇ ਪਿੰਡ ਗੱਜੂ ਖ਼ਾਲਸਾ ਦੇ ਇਕ ਨੌਜਵਾਨ ਰਾਕੇਸ਼ ਸਿੰਘ ਪੁੱਤਰ ਭੱਕ ਸਿੰਘ ਨੂੰ ਦਰਿਆ ਵਿਚ ਡਬੋ ਕੇ ਮਾਰਨ ਦੀ ਖ਼ਬਰ ਪ੍ਰਾਪਤ ਹੋਈ ਹੈ। ਇਸ ਸਬੰਧੀ ਮ੍ਰਿਤਕ ਰਾਕੇਸ਼ ਸਿੰਘ ਦੇ ਤਾਏ ਦੇ ਲੜਕੇ ਜੋਤੀ ਸਿੰਘ ਪੁੱਤਰ ਡਿਪਟੀ ਸਿੰਘ ਵਾਸੀ ਗੱਜੂ ਨੇ ਥਾਣਾ ਤਾਰਾਗੜ੍ਹ ਵਿਚ ਅਪਣੇ ਬਿਆਨ ਦਰਜ ਕਰਵਾਏ ਹਨ ਕਿ ਬੀਤੀ ਸ਼ਾਮ 6:30 ਵਜੇ ਉਹ ਅਪਣੇ ਘਰ ਮੌਜੂਦ ਸੀ ।

ਉਨ੍ਹਾਂ ਨੂੰ ਪਿੰਡ ਦੇ ਹੀ ਨਿਵਾਸੀ ਜਸਵਿੰਦਰ ਸਿੰਘ ਨੇ ਦਸਿਆ ਕਿ ਤੁਹਾਡੇ ਚਾਚੇ ਦੇ ਪੁੱਤਰ ਰਾਕੇਸ਼ ਸਿੰਘ ਦੇ ਪਿੱਛੇ ਮੁਕੇਸ਼ ਕੁਮਾਰ ਉਰਫ਼ ਮਿੱਠੂ, ਪੰਕਜ ਕੁਮਾਰ ਉਰਫ਼ ਪੰਕਾ, ਸੁਮੇਸ਼ ਕੁਮਾਰ ਉਰਫ਼ ਬਾਂਟੂ ਵਾਸੀ ਤਾਰਾਗੜ੍ਹ ਅਤੇ ਡਿੰਪਲ ਪੁੱਤਰ ਸੋਹਨ ਲਾਲ ਵਾਸੀ ਰਤਨਗੜ੍ਹ ਹੱਥਾਂ ਵਿਚ ਦਾਤਰ, ਕਿਰਪਾਨਾਂ ਅਤੇ ਹਾਕੀਆਂ ਲੈ ਕੇ ਉਸ ਨੂੰ ਮਾਰ ਦੇਣ ਲਈ ਉਸ ਦੇ ਪਿੱਛੇ ਪਏ ਹੋਏ ਹਨ ਅਤੇ ਰਾਕੇਸ਼ ਕੁਮਾਰ ਨੇ ਅਪਣੀ ਜਾਨ ਬਚਾਉਣ ਦੇ ਲਈ ਰਾਵੀ ਦਰਿਆ ਵਿਚ ਛਾਲ ਮਾਰ ਦਿਤੀ ਹੈ। ਜਦੋਂ ਰਾਕੇਸ਼ ਸਿੰਘ ਅਪਣੀ ਜਾਨ ਬਚਾਉਣ ਲਈ ਬਾਹਰ ਨਿਕਲਦਾ ਹੈ, ਤਾਂ ਉਕਤ ਸਾਰੇ ਵਿਅਕਤੀ ਉਸ ਨੂੰ ਹਥਿਆਰਾਂ ਨਾਲ ਡਰਾ ਕੇ ਬਾਹਰ ਨਹੀਂ ਨਿਕਲਣ ਦੇ ਰਹੇ।

ਜਦੋਂ ਜੋਤੀ ਨੇ ਅਪਣੇ ਲੜਕੇ ਜਸਬੀਰ ਸਿੰਘ ਨਾਲ ਮੌਕੇ ਉਤੇ ਜਾ ਕੇ ਉਨ੍ਹਾਂ ਵਿਅਕਤੀਆਂ ਨੂੰ ਅਜਿਹਾ ਕਰਨ ਤੋਂ ਰੋਕਿਆ ਤਾਂ ਉਨ੍ਹਾਂ ਨੇ ਸਮੇਤ ਉਸ ਦੇ ਲੜਕੇ ਜਸਬੀਰ ਸਿੰਘ ਨੂੰ ਅਪਣੇ ਹਥਿਆਰਾਂ ਨਾਲ ਮਾਰ ਦੇਣ ਦੀ ਨੀਅਤ ਨਾਲ ਵਾਰ ਕਰ ਕੇ ਜ਼ਖ਼ਮੀ ਕਰ ਦਿਤਾ।ਜੋਤੀ ਅਤੇ ਉਸ ਦੇ ਪੁੱਤਰ ਜਸਬੀਰ ਸਿੰਘ ਵਲੋਂ ਮਾਰ ਦਿਤਾ-ਮਾਰ ਦਿਤਾ ਦਾ ਰੌਲਾ ਪਾਉਣ ਉਤੇ ਉਕਤ ਸਾਰੇ ਵਿਅਕਤੀ ਸਮੇਤ ਅਪਣੇ ਹਥਿਆਰਾਂ ਮੌਕੇ ਤੋਂ ਦੌੜ ਗਏ। ਖ਼ਬਰ ਲਿਖੇ ਜਾਣ ਤਕ ਪੁਲਿਸ ਪ੍ਰਸ਼ਾਸਨ ਵਲੋਂ ਰਾਕੇਸ਼ ਕੁਮਾਰ ਦਾ ਮ੍ਰਿਤਕ ਸਰੀਰ ਰਾਵੀ ਦਰਿਆ ਵਿਚ ਲੱਭਣ ਦੀ ਕੋਸ਼ਿਸ਼ ਜਾਰੀ ਹੈ।