ਨਵਜੋਤ ਸਿੰਘ ਸਿੱਧੂ ਦੇ ਹੱਕ ਵਿਚ ਨਿਤਰੇ ਪਰਗਟ ਸਿੰਘ
ਗੁਰਦਾਸਪੁਰ, 20 ਨਵੰਬਰ (ਪਪ) : ਨਵਜੋਤ ਸਿੰਘ ਸਿੱਧੂ ਵਲੋਂ ਪਾਕਿਸਤਾਨ ਦੇ ਪ੍ਰਧਾਨ ਮੰਤਰੀ ਇਮਰਾਨ ਖ਼ਾਨ ਨੂੰ 'ਵੱਡਾ ਭਰਾ' ਕਹਿਣ 'ਤੇ ਨਵਾਂ ਵਿਵਾਦ ਛਿੜ ਗਿਆ ਹੈ | ਇਸ 'ਤੇ ਸਫ਼ਾਈ ਦਿੰਦੇ ਹੋਏ ਕੈਬਨਿਟ ਮੰਤਰੀ ਪਰਗਟ ਸਿੰਘ ਨੇ ਕਿਹਾ ਕਿ ਭਾਜਪਾ ਬਿਨਾਂ ਕਿਸੇ ਗੱਲ ਤੋਂ ਇਸ ਨੂੰ ਮੁੱਦਾ ਬਣਾ ਰਹੀ ਹੈ | ਪਰਗਟ ਸਿੰਘ ਨੇ ਕਿਹਾ ਕਿ ਥੋੜੇ ਦਿਨ ਹੋਏ ਹਨ ਅਸੀਂ ਪਾਕਿਸਤਾਨ ਨਾਲ ਕਿ੍ਕਟ ਦਾ ਮੈਚ ਖੇਡਿਆ | ਹੋਰ ਵੀ ਖੇਡਾਂ ਨੂੰ ਵਧਾ ਰਹੇ ਹਾਂ ਪਾਕਿਸਤਾਨ ਨਾਲ | ਜਿਸ ਧਰਤੀ 'ਤੇ ਮੱਥਾ ਟੇਕਣ ਲਈ ਗਏ ਹਾਂ ਉਸ ਦਾ ਮਕਸਦ ਹੀ ਇਹ ਹੈ ਕਿ ਨਫ਼ਰਤ ਦੂਰ ਹੋਵੇ ਮਨਾਂ ਦੀ ਕੁੜੱਤਣ ਦੂਰ ਹੋਵੇ |
ਉਨ੍ਹਾਂ ਕਿਹਾ ਕਿ ਨਵਜੋਤ ਸਿੰਘ ਸਿੱਧੂ ਕਰਤਾਰਪੁਰ ਸਾਹਿਬ ਮੱਥਾ ਟੇਕਣ ਗਏ ਸਨ | ਕਿਸੇ ਪੱਤਰਕਾਰ ਨੇ ਉਥੇ ਸਵਾਲ ਪੁੱਛ ਲਿਆ ਤਾਂ ਇਸ ਨੂੰ ਮੁੱਦਾ ਨਹੀਂ ਬਣਾਉਣਾ ਚਾਹੀਦਾ | ਪਰਗਟ ਸਿੰਘ ਨੇ ਕਿਹਾ ਕਿ ਬਰਲਿਨ ਦੀ ਦੀਵਾਰ ਲੋਕਾਂ ਨੇ ਖ਼ੁਸ਼ਹਾਲੀ ਲਈ ਤੋੜ ਦਿਤੀ, ਸਾਨੂੰ ਇਨ੍ਹਾਂ ਵਿਵਾਦਾਂ ਤੋਂ ਉਪਰ ਉੱਠਣ ਦੀ ਲੋੜ ਹੈ, ਅੱਜ ਰੁਜ਼ਗਾਰ ਕਿਥੇ ਜਾ ਰਿਹਾ ਹੈ |
ਪਰਗਟ ਸਿੰਘ ਨੇ ਕਿਹਾ ਕਿ ਸਿੱਧੂ ਇਕ ਸੈਲੀਬਿ੍ਟੀ ਹਨ, ਉਨ੍ਹਾਂ ਦਾ ਜੇਕਰ ਸਪੈਸ਼ਲ ਵੈੱਲਕਮ ਹੁੰਦਾ ਹੈ ਤਾਂ ਕੋਈ ਹਰਜ ਨਹੀਂ ਇਥੇ ਤਾਂ ਕਿਸੇ ਆਗੂ ਨੂੰ ਰਾਜਪੁਰਾ ਤਕ ਨਹੀਂ ਕੋਈ ਜਾਣਦਾ |
ਪਰਗਟ ਸਿੰਘ ਨੇ ਕਿਹਾ ਕਿ ਜਦੋਂ ਨਰਿੰਦਰ ਮੋਦੀ ਨਵਾਜ ਸ਼ਰੀਫ਼ ਦੇ ਜਨਮ ਦਿਨ ਦੀ ਵਧਾਈ ਦੇਣ ਦੇ ਲਈ ਪਾਕਿਸਤਾਨ ਗਏ ਸਨ ਅਤੇ ਉਨ੍ਹਾਂ ਨੂੰ ਜੱਫ਼ੀ ਪਾਈ ਤਾਂ ਭਾਜਪਾ ਨੇ ਕੋਈ ਮੁੱਦਾ ਨਹੀਂ ਬਣਾਇਆ, ਹੁਣ ਨਵਜੋਤ ਸਿੰਘ ਸਿੱਧੂ ਬਾਰੇ ਕਿਉਂ ਭਾਜਪਾ ਬਿਨਾਂ ਗੱਲ ਤੋਂ ਵਿਵਾਦ ਖੜਾ ਕਰ ਰਹੀ ਹੈ | ਤਿੰਨ ਖੇਤੀ ਕਾਨੂੰਨਾਂ ਦੀ ਵਾਪਸੀ 'ਤੇ ਪਰਗਟ ਸਿੰਘ ਨੇ ਕਿਹਾ ਕਿ ਕਾਨੂੰਨਾਂ ਨਾਲ ਪੰਜਾਬ ਨੂੰ ਕਿੰਨਾ ਨੁਕਸਾਨ ਹੋਇਆ, 700 ਤੋਂ ਵੱਧ ਕਿਸਾਨਾਂ ਦੀ ਮੌਤ ਹੋ ਗਈ ਪਰ ਫਿਰ ਵੀ ਅਸੀਂ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਦਾ ਧਨਵਾਦ ਕਰਦੇ ਹਨ |
ਫ਼ੋਟੋ : ਗੁਰਦਾਸਪੁਰ ਪ੍ਰਗਟ ਸਿੰਘ