ਜਲੰਧਰ, 22 ਅਗੱਸਤ (ਸ਼ਰਮਾ, ਲੱਕੀ): ਸ਼ਹਿਰ ਦੇ ਮਿਲਕਬਾਰ ਚੌਕ ਉਤੇ ਪੁਲਿਸ ਨੇ ਇਕ ਸੈਂਟਰੋ ਕਾਰ ਨੂੰ ਰੁਕਣ ਦਾ ਇਸ਼ਾਰਾ ਕੀਤਾ, ਤਾਂ ਉਸ ਵਿਚ ਸਵਾਰ ਨੌਜਵਾਨ ਰੁਕਣ ਦੀ ਬਜਾਏ ਨਾਕੇ ਦੇ ਬੈਰੀਕੇਡ ਨੂੰ ਟੱਕਰ ਮਾਰ ਕੇ ਭੱਜ ਨਿਕਲੇ। ਇਸ ਤੋਂ ਬਾਅਦ ਪੁਲਿਸ ਨੇ ਪਿੱਛਾ ਕਰ ਉਨ੍ਹਾਂ ਨੂੰ ਮਕੂਸਦਾਂ ਵਿਚ ਫੜ ਲਿਆ। ਪੁਲਿਸ ਨੇ ਕਾਰ ਸਵਾਰ ਤਿੰਨ ਨੌਜਵਾਨਾਂ ਨੂੰ ਗ੍ਰਿਫ਼ਤਾਰ ਕਰ ਲਿਆ ਹੈ। ਤਲਾਸ਼ੀ ਲੈਣ ਉਤੇ ਉਨ੍ਹਾਂ ਤੋਂ ਗ਼ੈਰ-ਕਾਨੂੰਨੀ ਰਿਵਾਲਵਰ ਵੀ ਬਰਾਮਦ ਹੋਈ ਹੈ।
ਥਾਣਾ ਡਵੀਜ਼ਨ ਨੰਬਰ 6 ਦੇ ਐਸਐਚਓ ਇੰਸਪੈਕਟਰ ਸੁਰਜੀਤ ਸਿੰਘ ਗਿੱਲ ਨੇ ਦਸਿਆ ਕਿ ਏਐਸਆਈ ਕਸ਼ਮੀਰ ਸਿੰਘ ਪੁਲਿਸ ਪਾਰਟੀ ਨਾਲ ਮਿਲਕ ਬਾਰ ਚੌਕ ਉਤੇ ਮੌਜੂਦ ਸਨ। ਇਕ ਸੈਂਟਰੋ ਕਾਰ ਤੇਜ਼ ਰਫ਼ਤਾਰ ਤੋਂ ਮਸੰਦ ਚੌਕ ਵਲੋਂ ਆਈ। ਉਸ ਵਿਚ ਤਿੰਨ ਨੌਜਵਾਨ ਬੈਠੇ ਹੋਏ ਸਨ। ਸਿਪਾਹੀ ਅਮਨਦੀਪ ਨੇ ਗੱਡੀ ਨੂੰ ਰੋਕਣ ਦਾ ਇਸ਼ਾਰਾ ਕੀਤਾ, ਤਾਂ ਕਾਰ ਸਵਾਰਾਂ ਨੇ ਨਾਅਕੇ ਉਤੇ ਲੱਗੇ ਬੈਰੀਕੇਡ ਨੂੰ ਟੱਕਰ ਮਾਰ ਦਿਤੀ ਜਿਸ ਨਾਲ ਸਿਪਾਹੀ ਅਮਨਦੀਪ ਦੇ ਸੱਜੇ ਹੱਥ ਵਿਚ ਸੱਟ ਲੱਗ ਗਈ ਤੇ ਉਸ ਨੇ ਬਹੁਤ ਮੁਸ਼ਕਲ ਨਾਲ ਅਪਣੀ ਜਾਨ ਬਚਾਈ।
image
ਇਹ ਮੁਲਜ਼ਮ ਪੁਲਿਸ ਨਾਕਾ ਤੋੜ ਕੇ ਕਾਰ ਭਜਾਉਂਦੇ ਹੋਏ ਲੈ ਗਏ। ਉਨ੍ਹਾਂ ਨੇ ਤੁਰਤ ਇਸ ਬਾਰੇ ਵਿਚ ਪੁਲਿਸ ਕੰਟਰੋਲ ਰੂਮ ਨੂੰ ਸੂਚਿਤ ਕੀਤਾ। ਇਸ ਤੋਂ ਬਾਅਦ ਪੁਲਿਸ ਪਾਰਟੀ ਨੇ ਉਨ੍ਹਾਂ ਦਾ ਪਿੱਛਾ ਕਰਦਿਆਂ ਮਕਸੂਦਾਂ ਚੌਕ ਨੇੜੇ ਇਕ ਬੰਦ ਗਲੀ ਵਿਚ ਉਨ੍ਹਾਂ ਨੇ ਫੜ ਲਿਆ। ਮੁਲਜ਼ਮਾਂ ਵਿਚ ਸ਼ਾਮਲ ਹੁਸ਼ਿਆਰਪੁਰ ਦੇ ਥਾਣਾ ਟਾਂਡਾ ਦੇ ਅਧੀਨ ਆਉਂਦੇ ਪਿੰਡ ਜਲਾਲਪੁਰ ਦਾ ਰਹਿਣ ਵਾਲਾ ਰਵਿੰਦਰ ਸਿੰਘ ਖੇਤੀ ਬਾੜੀ ਕਰਦਾ ਹੈ। ਦੂਜਾ ਨੌਜਵਾਨ ਲਖਵਿੰਦਰ ਸਿੰਘ ਪਿੰਡ ਦਾ ਪੰਚਾਇਤ ਮੈਂਬਰ ਹੈ ਅਤੇ ਖੇਤੀਬਾੜੀ ਕਰਦਾ ਹੈ। ਤੀਜਾ ਨੌਜਵਾਨ ਰਸ਼ਮਿੰਦਰ ਸਿੰਘ ਪਿੰਡ ਜਲਾਲਪੁਰ ਵਿਚ ਹੀ ਬੱਬਰ ਜਵੈਲਰਸ ਦੇ ਨਾਂ ਤੋਂ ਸੁਨਿਆਰੇ ਦੀ ਦੁਕਾਨ ਕਰਦਾ ਹੈ।
ਪੁਲਿਸ ਨੇ ਜਦੋਂ ਉਨ੍ਹਾਂ ਦੀ ਕਾਰ ਦੀ ਤਲਾਸ਼ੀ ਲਈ ਤਾਂ ਉਸ ਵਿਚ ਇਕ 32 ਬੋਰ ਦਾ ਰਿਵਾਲਵਰ ਤੇ 25 ਜ਼ਿੰਦਾ ਕਾਰਤੂਸ ਤੇ ਚਾਰ ਕਾਰਤੂਸ ਬਰਾਮਦ ਹੋਏ। ਪੁਲਿਸ ਨੇ ਉਨ੍ਹਾਂ ਵਿਰੁਧ ਕੇਸ ਦਰਜ ਕਰ ਲਿਆ ਹੈ। ਇੰਸਪੈਕਟਰ ਸੁਰਜੀਤ ਸਿੰਘ ਨੇ ਕਿਹਾ ਕਿ ਮੁਲਜ਼ਮਾਂ ਤੋਂ ਬਰਾਮਦ ਹੋਏ ਰਿਵਾਲਵਰ ਦੇ ਸਬੰਧ ਵਿਚ ਪੁਛਗਿੱਛ ਕੀਤੀ ਜਾ ਰਹੀ ਹੈ, ਤਾਂ ਜੋ ਪਤਾ ਲਗਾਇਆ ਜਾ ਸਕੇ ਇਹ ਰਿਵਾਲਵਰ ਉਹ ਕਿੱਥੋਂ ਲੈ ਕੇ ਆਏ ਸਨ ਤੇ ਕਿਉਂ ਲੈ ਕੇ ਆਏ ਸਨ।