ਰਾਜਸਥਾਨ : ਕੰਬਲ ਵੰਡ ਸਮਾਰੋਹ ਦੌਰਾਨ ਭਾਜਪਾ ਦੇ ਸਾਬਕਾ ਸੰਸਦ ਮੈਂਬਰ ਵਿਵਾਦਾਂ ’ਚ ਘਿਰੇ
ਔਰਤ ਤੋਂ ਧਰਮ ਪੁੱਛ ਕੇ ਦਿਤਾ ਹੋਇਆ ਕੰਬਲ ਵਾਪਸ ਲਿਆ
ਜੈਪੁਰ : ਰਾਜਸਥਾਨ ਦੇ ਟੋਂਕ ਜ਼ਿਲ੍ਹੇ ਵਿੱਚ ਸਾਬਕਾ ਭਾਰਤੀ ਜਨਤਾ ਪਾਰਟੀ (ਭਾਜਪਾ) ਸੰਸਦ ਮੈਂਬਰ ਸੁਖਬੀਰ ਸਿੰਘ ਜੌਨਪੁਰੀਆ ਇੱਕ ਵੱਡੇ ਵਿਵਾਦ ਦੇ ਕੇਂਦਰ ’ਚ ਆ ਗਏ ਹਨ। ਇੱਕ ਵੀਡੀਓ ਸਾਹਮਣੇ ਆਈ ਹੈ ਜਿਸ ਵਿੱਚ ਉਹ ਇੱਕ ਮੁਸਲਿਮ ਮਹਿਲਾ ਤੋਂ ਉਸ ਦਾ ਧਰਮ ਪੁੱਛਣ ਤੋਂ ਬਾਅਦ ਉਸ ਨੂੰ ਦਿੱਤਾ ਕੰਬਲ ਵਾਪਸ ਲੈਂਦੇ ਨਜ਼ਰ ਆ ਰਹੇ ਹਨ। ਇਹ ਘਟਨਾ ਨਿਵਾਈ ਤਹਿਸੀਲ ਦੇ ਖਰੇਡਾ ਪਿੰਡ ਦੇ ਮੰਦਰ ਪਰਿਸਰ ਵਿੱਚ ਵਾਪਰੀ, ਜਿੱਥੇ ਜੌਨਪੁਰੀਆ ਲੋਕਾਂ ਨੂੰ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਦੀ 28 ਫਰਵਰੀ ਨੂੰ ਅਜਮੇਰ ਯਾਤਰਾ ਲਈ ਸੱਦਾ ਦੇਣ ਗਏ ਸਨ।
ਵੀਡੀਓ ਵਿੱਚ ਜੌਨਪੁਰੀਆ ਕਹਿੰਦੇ ਸੁਣੇ ਗਏ ਕਿ “ਜੋ ਪ੍ਰਧਾਨ ਮੰਤਰੀ ਮੋਦੀ ਨੂੰ ਗਾਲਾਂ ਕੱਢਦੇ ਹਨ, ਉਹਨਾਂ ਨੂੰ ਕੰਬਲ ਲੈਣ ਦਾ ਕੋਈ ਹੱਕ ਨਹੀਂ।”ਇਸ ਘਟਨਾ ਨੇ ਸੋਸ਼ਲ ਮੀਡੀਆ ’ਤੇ ਤੀਖੀ ਪ੍ਰਤੀਕਿਰਿਆ ਜਨਮ ਦਿੱਤੀ ਹੈ। ਕਾਂਗਰਸ ਨੇਤਾ ਟਿਕਾਰਾਮ ਜੁੱਲੀ ਨੇ ਇਸਨੂੰ ਧਰਮ ਅਧਾਰਿਤ ਭੇਦਭਾਵ ਕਰਾਰ ਦਿੰਦਿਆਂ ਕਿਹਾ, “ਇੱਕ ਗਰੀਬ ਮਹਿਲਾ ਤੋਂ ਉਸ ਦਾ ਧਰਮ ਪੁੱਛ ਕੇ ਕੰਬਲ ਵਾਪਸ ਲੈਣਾ ਬਹੁਤ ਹੀ ਨਿੰਦਣਯੋਗ ਹੈ।”
ਟੋਂਕ-ਸਵਾਈ ਮਾਧੋਪੁਰ ਤੋਂ ਕਾਂਗਰਸ ਸੰਸਦ ਮੈਂਬਰ ਹਰੀਸ਼ ਚੰਦਰ ਮੀਣਾ ਨੇ ਕਿਹਾ ਕਿ ਇਹ ਸੋਚ ਸਮਾਜਕ ਤਾਨੇਬਾਨੇ ਨੂੰ ਤੋੜਦੀ ਹੈ। ਉਨ੍ਹਾਂ ਨੇ ਕਿਹਾ, “ਗਰੀਬ ਮਹਿਲਾਵਾਂ ਨੂੰ ਕੰਬਲ ਦੇ ਕੇ ਫਿਰ ਧਰਮ ਦੇ ਆਧਾਰ ’ਤੇ ਵਾਪਸ ਲੈਣਾ ਬਹੁਤ ਹੀ ਸ਼ਰਮਨਾਕ ਅਤੇ ਅਣਮਨੁੱਖੀ ਹੈ।’’
ਟੋਂਕ ਦੇ ਵਿਧਾਇਕ ਸਚਿਨ ਪਾਇਲਟ ਨੇ ਵੀ ਇਸ ਘਟਨਾ ਦੀ ਨਿੰਦਾ ਕੀਤੀ। ਉਨ੍ਹਾਂ ਨੇ ਕਿਹਾ, “ਧਰਮ ਅਤੇ ਜਾਤੀ ਦੇ ਆਧਾਰ ’ਤੇ ਵਿਤਕਰਾ ਕਰਨਾ ਨਾ ਸਿਰਫ਼ ਨੈਤਿਕ ਤੌਰ ’ਤੇ ਗਲਤ ਹੈ, ਸਗੋਂ ਸੰਵਿਧਾਨਕ ਅਧਿਕਾਰਾਂ ਦੀ ਵੀ ਉਲੰਘਣਾ ਹੈ।”
ਦੂਜੇ ਪਾਸੇ, BJP ਵਿਧਾਇਕ ਬਾਲਮੁਕੁੰਦ ਆਚਾਰਿਆ ਨੇ ਜੌਨਪੁਰੀਆ ਦਾ ਬਚਾਅ ਕਰਦਿਆਂ ਕਿਹਾ ਕਿ ਮਹਿਲਾ ਨੇ ਸ਼ਾਇਦ ਪ੍ਰਧਾਨ ਮੰਤਰੀ ਬਾਰੇ ਕੁਝ ਗਲਤ ਕਿਹਾ ਹੋਵੇ। ਆਚਾਰਿਆ ਨੇ ਕਿਹਾ, “ਮੋਦੀ ਜੀ ਨੇ ਇਤਿਹਾਸਕ ਕੰਮ ਕੀਤੇ ਹਨ ਅਤੇ ਉਹ ਰਾਸ਼ਟਰ ਦੇ ਹਿੱਤ ਲਈ ਕੰਮ ਕਰ ਰਹੇ ਹਨ। ਹਰ ਨਾਗਰਿਕ ਉਨ੍ਹਾਂ ਦੇ ਪਰਿਵਾਰ ਦਾ ਹਿੱਸਾ ਹੈ।’’
ਉਧਰ ਘਟਨਾ ਤੋਂ ਬਾਅਦ ਕਾਂਗਰਸ ਯੂਥ ਨੇਤਾ ਵਿਕਰਮ ਚੌਧਰੀ ਨੇ ਪਿੰਡ ਵਿੱਚ ਜਾ ਕੇ ਕੁਝ ਮਹਿਲਾਵਾਂ ਨੂੰ ਕੰਬਲ ਵੰਡੇ ਅਤੇ ਕਿਹਾ, “ਤੁਸੀਂ ਕਿਸੇ ਧਰਮ ਦੀ ਬੇਇਜ਼ਤੀ ਨਹੀਂ ਕੀਤੀ, ਇਹ ਪੂਰੇ ਟੋਂਕ ਜ਼ਿਲ੍ਹੇ ਦੇ ਸਵੈ-ਸਮਾਨ ਦੀ ਬੇਇਜ਼ਤੀ ਹੈ।”
ਪਿੰਡ ਵਾਸੀਆਂ ਅਤੇ ਕਾਂਗਰਸ ਵਰਕਰਾਂ ਨੇ ਸੋਮਵਾਰ ਨੂੰ ਵਿਰੋਧ ਪ੍ਰਦਰਸ਼ਨ ਕੀਤਾ ਅਤੇ ਜੌਨਪੁਰੀਆ ਦਾ ਪੁਤਲਾ ਫੂਕਿਆ। ਇਹ ਮਾਮਲਾ ਹੁਣ ਸਿਆਸੀ ਤੌਰ ’ਤੇ ਭੜਕ ਗਿਆ ਹੈ ਅਤੇ ਧਰਮ ਅਧਾਰਿਤ ਭੇਦਭਾਵ ’ਤੇ ਵੱਡੀ ਚਰਚਾ ਛੇੜ ਦਿੱਤੀ ਹੈ।